UNIVERSITARIU SIRA ESPERA IV LEJISLATURA APROVA LEI ANTI KORUPSAUN

Estudante Universitariu sira iha Timor-Leste husu ba ba deputado sira Parlamentu Nasional (PN) IV lejislatura nian atu tau matan ba lei Anti Korupsaun, tamba lei dala barak kondena de’it ba povu ki’ik.

“Hau nia esperansa ba IV legislativu Parlamentu Nasional hau husu ba membru Parlamentu sira atu haree didiak ba lei Anti Korupsaun ,tamba durante ne’e lei kondena de’it ba ami povu ki’ik,”  hatete estudante UNDIL, Leodencio da Costa ba GMN , Kuarta (5/9). Tuir estudante universitariu ne’e nia hare katak, lei ne’e maioria kondena de’it ba povu ki’ik ,tamba ema bo’ot sira halo korupsaun hodi han osan Estadu nian ho valor bo’ot, maibé lei la kondena. Nia hatutan povu ki’ik halo sala oituan lei kondena lalais hodi ba hatan iha tribunal no lori liu kedas ba prizaun Becora no balun tama ho oras 72  too tinan Ida ba leten, maibé ba ema bo’ot sira ema nunka kondena hodi ba investiga no ba hatan iha tribunal. Nunee mos Leopoldo Sanches, estudante UNDIL hatete IV legislatura Parlamentu Nasional ne’e foun, maibé membru parlamentu balun tuan sira mak sei kontinua, iha kada bankada nune’e deputadu sira ne’ebé mak foun ne’e tenki hamutuk ho tuan sira hodi diskute lalais lei Anti Korupsaun. Nia dehan lei Anti Korupsaun nee desde iha terseiru legislatura mai to’o agora seidauk iha diskusaun ida ne’ebé mak klean no halo aprovasaun, tuir lolos ida ne’e mak importante atu diskute hodi implementa ba ema hotu. Nia afirma Sistema Judisiariu iha Timor-Leste tenki la’o didiak hodi tuir nia dalan, signifika lei ne’e kondena ba ema hotu, laos ba kondena de’it ba povu ki’ik, maibé tenki mós ba ema bo’ot sira. Alénde Adriano Dano Silva, estudante UNTL nia esperansa ba IV Legislatura katak, sé bele deputadu sira tenki diskute ba lei saida de’it tenki ho seriu, tamba dala balun membru Parlamentu Nasional sira balun diskute no balun rai hela to’o nia mandatu remata. Estudante ne’e dehan lei ne’ebé mak importante ba povu Timor-Leste mak lei rai ho KAK ,sé wanhira lei rua ne’e mak lá implementa, povu ki’ik sira mak sei sai vitima ba lei hirak ne’e. tos