UE hakarak halais akordu deskonsentrasaun no desentralizasaun administrativa

Embaixador Uniaun Europia (UE) Alexandre Leitão aprezenta evolusaun programa kooperasaun ne’ebe mak hala’o ona iha Timor Leste ba Prezidenti Repúblika Francisco Guterres Lú Olo.

Iha aprezentasaun ne’e, Embaixador Uniaun Europia foka liu kona-ba prosesu negosiasaun iha area Deskonsentrasaun no Desentralizasaun Administrativa ne’ebe presiza halais akordu hodi bele realiza iha tempu badak.

Embaixador Uniaun Europia iha Timor Leste, Alexandre Leitão koalia lia hirak nee hafoin aprezenta programa kopersaun Prezidente Repúblika Francisco Guterres Lu Olo, iha Palasio Prezidensial Nicolau Lobato, Bairo Pite, Tersa (28/05/2019).

Antes ne’e, kooperasaun Uniaun Europeia ho Estado Timor Leste ne’ebe halo ona mak hanesan, iha Área Nutrisaun, Gestão de Boa Governação, Gestão das Finanças no Agrofloresta.

“Enkontro ida ne’e ha’u mai fo hatene ba Prezidenti Repúblika no atu rona mos opiniaun husi Xefe Estado kona-ba evolusaun programa kooperasaun sira ne’ebe durante ne’e Uniaun Europeia ho Estado Timor-Leste halo ona, hanesan iha área nutrisaun, gestão de boa governação, gestão das finanças no agrofloresta ne’ebe Xefe Estado iha nia programa rasik”, hatutan Alexandre Leitão.

“No mos programa sira seluk ne’ebe mak sei iha hela prosessu negosiasaun no ami nia parte hakarak assina lalais iha tempo badak maka iha área deskonsentrasaun no desentralisasaun administrativa,’’ dehan Embaixador Uniaun Europia Alexandre Leitão.

Konaba oinsa respotsa Prezidente Republika ba programa Uniaun Europeia nian nee, diplomata Uniaun Europeia nee hatan katak Prezidenti Repúblika Francisco Guterres Lú Olo seidauk hato’o opiniaun ka konkluzaun ruma kona ba programa hirak nee. Eus