JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Ponte foun iha Bidau atinji ona 100%, CTL sei entrega ba governu antes 30 Agostu

Ponte foun iha Bidau atinji ona 100%, CTL sei entrega ba governu antes 30 Agostu

Komisaun E ne’ebé trata asuntu infra-estrutura, Kuarta (07/08/2019), halo fiskalizasaun hodi haree direita ba ponte foun ne’ebé konstroe iha Bidau área tasi ibun Metiaut, atinji ona 100%, no jardim ne’ebé konstroe iha ponte ninin atinji ona 65%.

Tanba ne’e, kompaña Carya Timor-Leste (CTL), sei intrega ba governu antes komemorasaun loron konsulta popular 30 de Agostu tinan ne’e, hodi halo inagurasaun.

“Komisaun E haree katak,  selebrasaun tinan 20 ba loron referendum 30 de Agostu ne’e importante tebes, tanba ne’e mak ami mós hakarak haree progresu preparasaun ba selebrasaun ida ne’e, ami mai iha ne’e atu haree, tanba ponte ida ne’e, importante ba preparasaun ne’e hotu, depois ida ne’e mós sei reprezenta relasaun di’ak entre Timor-Leste ho Indonézia, tanba ne’e ita agradese tebes ba maun Xanana nia obra, agora dadaun ba selebrasaun ne’e mós maun Xanana mak Xefe ba komisaun organizadora,  ami mós preokupa para oinsa ita hotu atu kontribui, nune’e halo preparasaun ne’e la’o di’ak”, hateten Prezidente Komisuan E, Abel Pires ba jornalista sira, hafoin fiskaliza konstrusaun ne’e, iha Bidau Díli, Kuarta (07/08/2019).

Reprezentante povu ne’e observa, jardim ne’ebé konstroe iha ponte ninin, nu’udar fatin estratéjia ida hodi halibur joven sira ne’ebé iha talentu ba desportu, tanba ne’e iha benefisiu mós ba joven sira.

“Ami kontenti ho preparasaun iha ne’e, fatin ne’e kapaz tebes, ne’e sei atrai joven sira mai halimar, fatin seguru liu, tanba dala barak kuandu liu iha ne’e, ita nia alin sira ne’e halimar fali besik estrada ninin, se ida ne’e remata, sira mai iha fatin ne’ebé seguru tebes, ne’e sei di’ak liu, ita hotu hatene, maioria ita-nia populasaun ne’e mesak joven sira ne’ebé mak  halo atividade desportu, ida ne’e fó mós fatin ba sira, para atu halo atividade sira hanesan ne’e. Ohin ami mós husu ona katak, preparasaun ne’e sira sei halo prontu iha dia 20 de Agostu katak, natón tebes atu tama selebrasaun 30 de Agostu, hanesan enjeneiru ida, halo kalkulasaun ida katak, ida ne’e bele tuir duni saida mak sira hato’o mai ami katak, dia 20 ou 23 sira ne’e bele rezolve ka finaliza ona, tanba obra bo’ot ne’e hotu tiha ona, agora ne’e halo de’it ona nia jardin”, hateten Prezidentre Komisaun E ne’e.

Lee hotu :   PM Taur halo tinan ba 62, Husu Timor-oan sira servisu maka’as

Iha fatin hanesan, diretur Jerál Agensia Dezenvolvimentu Nasionál (ADN) Samuel Marçal relata, tuir loloos ponte refere remata iha 2018, bazeia ba kontratu ne’ebé iha, maibé lakonsege finaliza tuir tempu ne’e, tanba mosu impasse polítika.

“Ba ponte ne’e milaun USD 4, jardin ne’e tanba tékniku sira sei sura hela, total kuaze milaun USD 5, tanba jardin ne’e sei to’o iha sorin ne’eba, la’os para de’it iha ponte nian, tanba sei halo kampu futsal, tanba iha ne’e joven barak tebes, labarik sira iha ne’e laiha fatin ba sira atu halimar, entaun ita presiza kria kondisaun ba ita-nia oan sira, para sira bele halimar, la’os tu’ur iha uma hanoin mak halo krime, ne’e ladun di’ak. Tuir loos, bazeia ba kontratu hotu tiha ona finaliza iha  2018 ne’e, maibé tanba ita hasoru kondisaun polítika ita-nia hanesan ne’e, ne’eduni ita la’o tarde uitoan, ita espera katak, antes dia 30 de Agostu, parte ida ne’e bele finaliza ona”,  relata Samuel Marçal ba jornalista.

Samuel haktuir, ponte refere komisaun organizadora ba komemorasaun loron referendum deside ona tau naran BJ Habibie, nu’udar onra ida ba eis Prezidente Indonézia ne’e, tanba la’os Timor-oan de’it mak luta ba libertasaun nasionál.

“Komisaun deside ona ponte ne’e hanesan ita-nia onra ida, ba eis Prezidente Indonézia BJ Habibie, tanba iha tempu ne’eba nia mak fó opsaun, maske iha tempu ida difísil, nia konsege foti desizaun para halo referendum, ne’e onra Timor nian ida ba Habibie, para ita labele haluha ita-nia istória, luta ne’e la’os ita mesak mak luta, ema hotu envolve iha laran mak ita hodi manan ita-nia rai, no liberta ita-nia rain. Ne’eduni ita presiza fó konsiderasaun, maske la’os Timor-oan maibé nia mós partisipa no fó kontribuisaun iha luta ne’e nia laran”, tenik Diretur Jerál ADN ne’e.

Lee hotu :   Kliente W Four reklama sosa na’an kontaminadu ho ular

Samuel Marçal garante konstrusaun refere kualidade, maske jardin kategória urjensia, no kompromete sei tau matan nafatin, tanba fatin refere estratéjiku tebes ba joven no komunidade sira.

“Hakarak di’ak no át ne’e depende ita, maibé ba parte ida ne’e ami sei tau matan, tanba ne’e fatin di’ak tebes, estratéjiku tebes ba labarik sira. Ba manutensaun, ha’u tau nafatin orsamentu, atu jere ba jardin ida ne’e labele sai át, tanba ita gasta osan barak, tenki kuidadu, para ita uza ba tempu naruk”, promete DJ ADN ne’e.

Nune’e, project manager CTL, Ahmad irfan mós reforsa tan, kompañia halo esforsu másimu, atu bele finaliza obra ne’e, antes komemorasaun loron referendum nian.

“Eskedul ne’ebé ADN fó ne’e loron 25 fulan Agostu ne’e atu entrega, maibé ami garante ida ne’e dalaruma prontu iha dia 20 ou 23, tanba ami servisu to’o kalan bo’ot, ha’u garante ida ne’e tanba jardin ne’e to’o 65%, no servisu ne’ebé todan no difisil remata hotu ona, hela servisu restu atu halo kompletu de’it ona”, salienta Ahmad Irfan.

Ponte ne’ebé ho nia medida naruk metru 114 no luan metru 10 kompostu ho fatin la’o ain nian ne’e, posibilidade kompañia sei entrega ba governu, hamutuk ho jardin ne’ebé konstroe ida ponte ninin, iha loron 20 fulan Agostu ne’e, tanba ponte no jardin refere, sei inaugura iha ámbitu komemorasaun loron konsulta popular ba dala rua nulu.say

 

Add to Comments Here!!!!

error: Content is protected.
Secured By miniOrange
You might also like:
PLP husu FRETILIN tenki distingi nostaljia ho istória TL

Deputadu bankada Partidu Libertasaun Popular (PLP),...

Atu halo diálogu ka lae, Lere: Lalika preokupa no hanorin líder ParPol sira

Veteranu tinan 24 atual Xefe Estadu...

Dia 08/08/2019 || GMNTV LIVE STREAM || DADER KMANEK

Close