JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Governu apoia millaun USD 10 ba Konferénsia Episkopál TL

Governu apoia millaun USD 10 ba Konferénsia Episkopál TL

Governu asina akordu subvensaun, hodi apoiu Dolar Amerikanu Milaun 10 ba  Konferénsia Episkopál Timor-Leste (TL). Akordu subvensaun ne’e asina husi Primeiru Ministru, Taur Matan Ruak ho Prezidente Konferénsia Episkopál, Bispo Diocese Maliana, Dom. Norberto Amaral, Segunda (23/09) iha Ministeriu Finansas, Aitarak Laran, Díli.

Primeiru Ministru Taur Matan Ruak,hatete, akordu ne’e prevé mós kuantitativu no modalidade husi subvensaun ne’e , sei regula ho akordu espesífiku sira entre Governu no Konferénsia Episkopál Timor-Leste.

Xefe Governu ne’e esplika, husi valór orsamentu ne’e , Konferénsia Episkopál sei fó prioridade 50% ba atividade edukativu , pursentu 25% ba atividade sosiál , 15% ba atividade Governu Ekleziál , no 10% uza ba jestaun subvensaun ne’ebé fó ona.

Prezidente Konferénsia Episkopál Timor-Leste, atual Bispu Dioceze Maliana Dom Norberto Amaral, agradese ba Governu nia atensaun no apoiu ba igreja.

“Hau agredese ba Governu Timor-Leste nia atensaun ba igreja katólika ,ohin asina akordu ne’e governu apoiu $ 10 Mihlões ba igreja hodi investe ba prioridade hirak ne’ebé PM Taur temi ona”, dehan  Dom Norberto Amaral.

Iha loron 14 , fulan Agustu, tinan 2015 ,Governu Timor-Leste asina ona akordu ida ho Santa Sé ho objetivu atu hatuur ho dalan ne’ebé estavel, kuadru jurídiku konaba relasaun entre Estadu rua ne’e.

Akordu ne’ebé hetan ratifikasaun liu husi rezolusaun Parlamentu Nasionál , Númeru 18 / 2015 / loron 11 / fulan Novembru, prevé kontribuisaun anuál ida, tuir disponibilidade finanseira governu nian , ba atividade ho karekter sosiál ,edukativu , no atividade governu ekleziál ingreja katólika nian.

PN husu KO rekoñese kontribuisaun Igreja Katólika

Parlamentu Nasionál (PN), husu Komisaun Omenajen (KO) atu rekuñese kontribuisaun ne’ebé Igreja Katólika fó prosesu luta libertasaun nasional, liu husi nia lider reliziozu sira, liu-liu hanesan João de Deus ne’ebé hakotu ona nia peregrinasaun ikus iha mundu, iha Domingu loron 22/09.

Deputadu bankada PD, Mariano Asanami Sabino, Igreja Katólika mós fó kontribuisaun maka’as ba prosesu luta libertasaun nasional, tanba ne’e Estadu tenki rekuñese lideransa relizioju sira.

“Ho hakruk fó votus pezár ba amu João ne’ebé mak laiha ona, ita hotu hatene katak, desde hahú kedan ita-nia luta ne’e, apoiu maka’as liutan bainhira partisipasaun Igreja iha laran,  hahú amu rua ne’ebé fasilita, amu Afónso ho amu Luis mak fasilita para Dom Martino bele hasoru maun bo’ot Kay Rala Xanana Gusmão, iha liurai Miguel nia fatin, iha Mehara. Husi ne’ebá kedas, partisipasaun Igreja nian aumenta ativu iha rezistensia maibé, Estadu iha de’it úniku dalan mak rejistu ema nia naran, entaun iha Igreja katólika, balun lakohi tau naran, tanba nia senti nia kontribui de’it, Komite Homenajen mak tenki identifika sira duni, tanba ita haree partisipasaun Igreja ne’e maka’as tebes, liu-liu amu João ne’ebé mak laiha ona iha ita-nia leet, amu Locateli ne’ebé mak sei iha, no instituisaun, liu-liu kongregasaun salezianu ne’ebé kontribui amu lubuk ida, ne’ebé mak envovle iha tempu rezistensia, iha tempu ne’ebé disifisil, amu Tavares, amu Maubere no amu Sico, inklui amu Filomeno Jaco ne’ebé mak ka’er Komisaun Planeamentu- no Kordenasaun Kampaña CNRT nian, (CP-CC), nia mak koordena iha kampaña ne’e, iha tempu ne’ebé difisil ne’e maibé, iha momentu ita selebra 30 de Agostu ne’e, ita la haree, halo tu’ur iha kotuk, depois protokolu mak fóin bolu ba oin maibé, ne’e mós tanba deputadu David Mandati mak ba husu para muda, ne’e hatudu katak, Estadu ne’e la respeitu no la melloria ba ninia  ema ne’ebé mak envolve iha luta, ema sei presiza tenki tau naran, so rejistu, se la rejistu Estadu mós haluha ona nia,” hatete Mariano Asanami Sabino iha nia deklarasaun polítika, liu husi sesaun plenária, Segunda (23/09/2019).

Lee hotu :   IGREJA AIMUTIN HEIN FINISHING

Reprezentante povu ne’e konsidera, Estadu no governu seidauk fó rekoñesimentu ida loloos, ba líder igreja katólika sira ne’ebé fó ona nia kontribuisaun durante luta iha tempu rezistensia nia laran.

Tanba ne’e, atual prezidente partidu demokrátiku ne’e mós sujere ba Parlamentu Nasionál no Estadu Timor-Leste, atu respeitu no rekoñese kontribuisaun husi sira ne’ebé mak merese duni.

“Ita haree madre no padre lubuk ida, inklui madre Guilhermina, governu la haree sira katuas no ferik ona, maske ita apoiu osan ba Igreja, dioseze maibé, ita tenki tau matan espesial ba sira, hanesan amu Dom Carlos Filipe ne’ebé agora hakerek hela livru iha ne’ebá maibé, ita la apoiu nia pensamentu ne’e, maske sira tau importansia nafatin ba konstrusaun Estadu ne’e. Ita-nia libertasaun nasionál ne’e, liberta patria e povu, tanba ne’e mak, libertsaun patria ita liberta ona, hela liberta povu, maske sira Igreja Katólika la’os envolve iha partidu polítiku, tanba ne’e, ukun Estadu ne’e tenki nakloke, tanba governu ne’e la’os partidu polítiku nian, Estadu ne’e la’os partidu polítiku nian maibé, hanesan instrumentu ida, para hetan konfiansa ba povu hodi kaer ukun maibé, jestaun tenki nakloke nafatin, para ema hotu bele envolve. Tanba ne’e, husu ba ita hotu iha Parlamentu Nasionál no Estadu tomak, atu tau matan no respeitu, no fó omenajen, ba sira ne’ebé merese duni, ita mós haree katak, iha jardim dos herois Metinaru mós bele, karik ita husu kongresianu sira aseita, amu mós bele fó fatin iha jardim dos herois, ba sira ne’ebé mak durante ne’e envolve iha luta”, tenik Asanami.

Alende ne’e, bankada FRETILIN, liu husi deklarasaun polítika, husu meza Parlamentu Nasionál (PN) atu prezide votus pezár ba Pe. João de Deus.

“Lori Bankada FRETILIN nia naran hakarak konvida Parlamentu Nasionál tomak atu fó ita-nia respeita ba Pe. João de Deus Pires SDB, ne’ebé husik ona mundu ne’e, horseik iha Hospital Nasional Guido Valadares. Hala’o ninia misaun nu’udar nai lulik iha Baucau, mak iha tinan-1963, Pe. João de Deus harii Eskola Fatumaka, hafóin ko’alia ho Bispu Dom Jaime Garcia Goulart no Liurai Fatumaka, Uailili hodi hetan rai ba harii eskola ne’e. Eskola Fatumaka prodús ona matenek Timor-oan rihun ba rihun no ohin loron kontinua fó edukasaun kualidade ba Timor-oan sira. Pe. João de Deus mós mak hahú misaun Igreija Katólika iha Baucau, Venilale, Laga, Quelicai no Baguia. Iha tinan-1975 nia rohan wainhira fórsa invazor Indonésia sira tama Baucau, halibur ema Portugés no estranjeiru sira hotu iha zona Leste no lori ba Aerportu Baucau no haruka fila hotu ba sira-nia rain. Pe. João de Deus ema lori mós ba maibé, sae tiha aviaun nia deside hodi tu’un fali tan hanoin povu Timor-Leste. Iha tinan sira dahuluk okupasaun Indonésia nian, Pe. João de Deus hasoru persegisaun oi-oin to’o hetan kaer husi militar Indonésia no hetan mós torturasaun hanesan ho Timor oan barak. Hafóin baze de apoiu Matebian rahun no populasaun sira hahú tu’un mai villa, Pe. João de Deus harii orfanatu sira iha Baguia, Laga, Quelicai no Venilale hodi halibur labarik órfaun sira ne’ebé lakon sira-nia inan aman iha funu laran. Pe. João de Deus mós salva Timor-oan barak, feto no mane sira ne’ebé hetan persegisaun husi militar Indonésia”, relata Vise Xefe banakda FRETILIN, Francisco Miranda Branco liu husi deklasaun polítika iha plenária.

Lee hotu :   Selebra festa Ed ul-Adha, PR Lú Olo oferese karau ida ba musulmanu TL

Vise Xefe bankada  FRETILIN ne’e haktuir, maske kontribui barak ona iha prosesu luta ba independensia maibé, iha Pe.João de Deus kontinua fó nia kontribuisaun iha prosesu dezenvolvimentu humana.

 “Iha tinan-1988/89, Komandante Nino Konis Santana iha reziaun IV presiza no husu kilat husi reziaun II. Hatan ba pedidu ida ne’e, mak Pe. João de Deus akompaña husi eis prizoneiru polítiku husi levantamentu 10 de Juñu Marabia, Francisco de Carvalho “Kalohan”, tula kilat metralladora ida husi Kelikai mai Díli. Alende ne’e, Pe. João de Deus mós halo kontribuisaun direita barak seluk ba povu Timor-Leste nia funu ba ukun rasik aan. Ba ninia serbisu sira ne’e mak FALINTIL sira fó naran kódigu “Liras” ba Pe. João de Deus. To’o nia husik iis ikus liu, Pe. João de Deus kontinua kontribui ba prosesu dezenvolvimentu humana Timor-oan sira nian. Ba ida ne’e Sr. Prezidente, Bankada FRETILIN hanoin katak Pe. Joao de Deus merese Parlamentu nia votus de pezár”, tenik Branco.

Hatan ba asuntu ne’e, Prezidente Parlamentu Nasional interinu, Luis Roberto da Silva konfirma, meza simu rekomendasaun, hodi realiza fó votus iha sesaun plenária Tersa ohin.

Pe. João de Deus moris iha loron-15 fulan-Abril tinan-1928 iha Mirandela, Braganca – Portugal. Nia simu ordenasaun sai Nai lulik Salesianu iha loron-8 fulan-Jullu tinan-1956. Tinan rua deit hafóin nia ordenasaun sacerdotal, Pe. João de Deus mai hala’o ninia misaun iha Timor-Leste iha tinan-1958.

Ninia misaun sacerdotal tomak nia hala’o iha Timor-Leste hahú husi husi tinan-1958 to’o nia hakotu iis iha loron-22 fulan-Setembru tinan-2019.

CSTL -Dioseze Baucau senti lakon figura Pe. João

Alende ne’e, Congregasaun Salesianu Timor-Leste (CSTL), no Dioseze Baucau senti lakon figura Pe. João De Deus Pires SDB, ne’ebé durante ne’e fó ona  kontribuisaun maka’as ba Uma Kreda Timor-Leste.

Nai lulik João de Deus ema portugés, no nia prezensa iha Timor hanesan Misionáriu ida husi Congregasaun Saleziano, hodi hala’o misaun Maromak nian iha Timor Leste.

Durante hakna’ar aan iha nia misaun, Pe. João halo ona kontribuisaun barak ba Igreja hanesan, tau matan ba labarik orfanatu sira, serbí ema kiak no mukit sira, tanba ne’e, antes atu lori ba Dioseze Baucau  iha segunda loron 23 fulan ne’e, Padre Agustinho Soares realiza misa requem ba matebian Padre João de Deus Pires SDB  iha Kapella Don Bosco Kaza Fórmasaun Saleziano Comoro.

Lee hotu :   PR PROMETE APOIA CECRD NO CETL

Iha nia homilia, Padre Agustinho Soares SDB hatete, Padre João de Deus Pires SDB durante nia moris fó nia kontribuisaun barak tebes ba Igreja no mós ba luta libertasaun nasional iha Timor-Leste.

 “Tempu barak liu iha ninia moris tomak ne’e, iha Munisípiu Baucau no ema ne’e bele dehan katak, iha tempu okupasaun indonézia maske situasaun difisil maibé, kontinua hala’o servisu, haree ema kbiit laek sira iha parte Lorosa’e, ne’eduni ema ne’e servisu la senti kole. Alende ne’e, bapa sira mós kaer baku nia no iha tinan 1980, nia mós buka dalan oinsa mak ema sira hahan laiha bele ajuda aihan ba. Dala barak ha’u aprende husi Padre João kona ba servisu balun, tanba iha momentu ne’eba ha’u sei frater, sempre la’o hamutuk ho nia hodi aprende servisu sira ne’e, to’o ha’u sai amu lulik, nia sei haruka ha’u ba iha ne’ebé deit ha’u prontu atu ba, tanba Padre João ne’e antes haruka ita ba, buat hotu kompletu ona, tanba buat hotu kordenadu ona, no parte seluk, Padre João mós loke eskola Seleciano no mestri ho katikista sira, osan laiha maibé, nia tau osan iha amflope hodi fó profesores sira”, katak Agustinho.

Iha fatin hanesan, Oan hakiak Padre João de Deus, Inacio Moreira infórma, Padre João de Deus mak hari’i  Coléjiu Fatumaka, Don Bosco, iha ne’ebé konsidera nu’udar fatin matenek ba Timor-oan sira, tan ne’e nu’udar antigu alunu Seleziano, fó kondolénsia profunda ba maktoban Padre João de Deus Pires SDB, no família bo’ot Saleziana iha Timor Leste.

 “So Padre João de Deus Pires SDB hanesan Misionário ida husi Congregasaun Saleziano hodi hala’o misaun Maromak nian iha Timor Leste, durante hakna’ar aan iha misaun Timor, halo ona kontribuisaun barak ba Igreja hanesan, tau matan ba labarik orfanatu sira, serbí ema kiak no mukit sira. Nia (Padre João) hela iha Díli, ne’ebe instala hela eskola Congregasaun Saleziano ne’ebé alunu primeiru barak inklui Dr. Mari Bim Amuda Alkatiri, ne’eduni  bainhira padre ne’e moras, Alkatiri mós ba vízita, haree Padre João de deus Pires iha Hospital Nasional  Guido Valadares, hodi haree amu João nia moras,    Padre João de Deus Pires SDB hela iha timor  no mate ho idade 91”, katak Inacio.

Entretantu, partisipa iha misa Requem ne’e, Ministra Solidaridade Sosial no inkluzaun, ho nia kometiva sarani sira inklui estudante sira husi escola São Pedru, São Miguel, no Maria Auxiliadora

Tuir planu, loron 24 fulan ne’e, sei lori mate isin Padre João de Deus Pires SDB ba Munisípiu Baucau, no sei halot iha loron 25 maibé, antes halot Arcebispo Arquidioseze Díli, Dom Virgílio do Carmo da Silva SBD, mak sei predize misa requem ikus iha Coléziu Fatumaka.Tos/say/aba.

Add to Comments Here!!!!

error: Content is protected.
Secured By miniOrange
You might also like:
Animal mate nab-naban iha Díli, Estadu tenki kontrola servisu karantina

Reprezentante povu iha uma fukun Parlamentu...

Xina-TL hametin liu tan kooperasaun bilaterál

Embaixadór Xina ba Timor-Leste, Xiao Jianguo,...

Konfrontu iha Aimutin, rezulta ema ida mate no nain rua kanek ■ Polísia detein ona suspeitu nain haat

Joven ida mate ho naran, Ivon...

Close