JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Timor-Leste sosa asaun ConocoPhillips 30% ■Xanana:Ha’u-nia responsabilidade defende povu

Timor-Leste sosa asaun ConocoPhillips 30% ■Xanana:Ha’u-nia responsabilidade defende povu

Reprezentante espesiál Governu Timor-Leste, Kay Rala Xanana Gusmão, iha Domingu (28/9/18), asina ona akordu istóriku ida ho Kompañia Internasional ConocoPhillips hodi sosa sira-nia asaun (Saham) iha kampo  Greater Sunrise ba Governu Timor-Leste  ho montante orsamentu millaun US$350 ka 30%.

Akordu ne´e asina iha tuku ida ho  balun oras Bali-Indonesia, iha Hotel  Conrad Nusa Dua Bali. Akordu ne’e asina husi Reprezentante espesiál Governu Timor-Leste, Kay Rala Xanana Gusmão, ho Prezidenti  Kompañia ConocoPhillips, Crish   Wilson, ho posibilidade aseitadu dada  kadoras ka  pipeline Greater Sunrise mai Timor-Leste.

Atu hatene akordu istóriku ne’e, Grupo Media Nacional mak iha direitu exkluzivu atu oferese informasaun no hala’o entrevista ho Reprezentante Espesiál Governu Timor Leste, Kay Rala Xanana Gusmão, no Prezidenti Kompañia Internasional ConocoPhillips, Chris Wilson ho nia ekipa sira.

Hafoin iha loron 6 fulan Marsu tinan 2018,  Timor-Leste no Australia desidi hodi defini lolos Fronteira Marítima, hodi hamosu akordu ne´ebé realiza iha sede sentral Organizasaun Nasoens Unidas (ONU)   iha Nova Iorque Estados Unidos da América  (EUA).

Hafoin de asina akordu kona-ba fronteira marítima entre Timor-Leste ho Australia, Xefi Negosiador Prinsipal, Kay Rala Xanana Gusmão, kontinua kedas negosiasaun ho Kompañia Internasional ConocoPhillips kona-ba explorasaun Greater Sunrise nian iha tasi Timor.  Hafoin negosiasaun entre Reprezentante Espesial Governu Timor Leste ho  Australia ho Kompañia ConocoPhillips, hamosu konkordansia hodi rezulta akordu entre Kompañia ConocoPhillips ho Xefi Negosiador Kay Rala Xanana Gusmão.

“Pontu importante mak ida deit sira fa’an ita sosa, ita iha diskusaun ne’ebé barak, maibe ha’u tenki apresia tebes ConocoPhillips ninia dispozisaun, tamba tuir sira hatete komprende tebes Timor nia hakarak atu haruka kadoras mai Timor, ne’eduni maka sira halo esforsu tomak iha sira-nia laran rasik, atu nune’e bele iha tiha tranzasaun ka fa’an no sosa  ida ne’e, hosi mos ajuda ita, atu nune’e hala’o ba saida mak ita planeia  tiha ona,  ne’e duni ha’u agradese tebes ba Chris no nia ekipa tomak, ba sira-nia kompriensaun ida ne’e”,dehan Xefi Reprezentante espesiál Governu Timor-Leste, Kay Rala Xanana Gusmão, iha entrevista eskluzivu  ho Jornalista GMN, semana kotuk  iha Hotel Condrad Nusa Dua Bali.

Xanana Gusmão hatutan, ba Timor saida mak estabelese tiha ona planu estratéjiku dezenvolvimentu iha tinan 2011 to’o tinan 2030 hetan dadaun ona. Maske durante ne´e mosu iha sosiedade nia le´et,  ema barak dúvida no la fiar ho negosiasaun  Xefi Negosiador ne´e,  maibe nia fiar no optimista  katak dúvida sira  ne´e dudu nia hodi luta ba povu no nasaun nia di’ak.

“Balun la fiar, uluk ita funu hasoru Indonesia mos balun la fiar, ba fali fronteira marítima mos balun la fiar, agora dehan dada kadoras mos balun la fiar, maibe la’os tamba balun la fiar maka ita la bele esforsu a’an”, akresenta atual Xefi Negosiador ne’e.

Lee hotu :   Telkomcel mantein fibra ótika

Lider funu nain Xanana Gusmão, senti  ne’e nu’udar nia responsabilidade hodi defende povu no Nasaun doben Timor-Leste,  hodi hetan  benefisiu sosiais no ekonómiku mina no gas,  ne’ebé  konsege aseita ona iha akordu ne’e  maske la fasil ho komplexu tebes no sei iha  servisu  barak nafatin ba oin.

“Tamba ne’e hau kontenti la’os tamba buat seluk, maibe ha’u kontenti tamba saida mak ita koalia kona-ba benefisiu sosiais no ekonomia, ne’ebé mina ho gas, atu fo mai  povu  Timor, mak agora ita dehan katak, hahú ohin ne’e ita bele dehan katak  ita konsege, klaru la fasil sei komplexu tebes nafatin, servisu sei barak nafatin, ne’e duni ha’u senti katak ha’u- nia responsabilidade ba povu no ba ita-nia rai doben mak ida ne’e, maibe balun dehan ha’u-nia responsabilidade ne’e atu hala’o diálogu, maibe lae. Ha’u-nia responsabilidade mak atu defende povu no rai  doben Timor nia interese tomak”,refirma Xanana Gusmão.

Kay Rala Xanana Gusmão subliña katak, parte rua hala’o tranzaksaun ka Fa’an no Sosa,  ho nune’e mak  ConocoPhillips fa’an asaun Greater Sunrise ba Governu Timor-Leste   ho montante orsamentu millaun atus tolu lima nulu (350 Milloens)  ho porsentu tolu nulu (30%).

Liu husi diskusaun liu fulan neen,  husi kontaktu formal no  infromal sira, envolve Timor Leste kompostu husi  Kompañia Nasional Timor GAP, Autoriedade Nasional Petroleu no Minerais (ANPM), reprezentante espesial Governu Timor-Leste no Kompañia Internasional ConocoPhillips,  to’o ikus konkorda hamosu akordu dada Greater Sunrise mai Timor leste.

“Negosiasaun ba Greater Sunrise ne’e kleur mos no la konsege , tuir lolos asina akordu ne’e, sira hanoin katak iha loron 1 fulan marsu tinan ne’e hetan ona akordu atu dada ba Darwin, no la konsege, como depois ita tama iha Eleisaun  Antesipada, ha’u hatete ba sira katak agora para lai, ho ne’e mak iha kontaktu informal,  no kontaktu formal dala rua, fulan kotuk ho fulan ida ne’e”,subliña reprezentante espesial Governu Timor Leste  ne’e.

Kona-ba atu dada Greater Sunrise mai Timor leste,  reprezentante espesial Governu Timor-Leste, Kay rala Xanana Gusmão, hatete, la’os tinan  ida ka rua dada  mai,  nune´e mos sei la liu husi tinan 20.

Maske durante ne´e mosu iha sosiedade nia le´et,  ema barak dúvida no la fiar ho negosiasaun  Xefi Negosiador ne´e, maibe nia fiar no optimista  katak dúvida sira  ne´e dudu nia hodi luta ba povu no nasaun nia di’ak.

“Ha’u labele dehan aban, mas ha’u mos la bele dehan iha tinan 20, la buat ida  ema barak dúvida katak atu manan fronteira, ha’u halo tiha mak haree, husik sira dúvida ba, tamba iha mundu ne’e iha Demokrasia nia laran se mak la fiar, la fiar ba”,salienta lider karismátiku, Xanana Gusmão.

Lee hotu :   Molok halo pagamentu ba projetu Estadu, CCI-TL rekomenda forma komisaun avaliasaun

“Ba povu Timor ha’u la husu dehan atu fiar ha’u, hau husu deit katak kuandu hau kompremete hau nia a’an ba interese povu nian, hau sei halo, ne’e duni ita hein, no povu hein tok, hau la promete buat barak,  no promete uma ba ema hotu hotu, servisu ba ema hotu, no osan ba ema hotu, maibe saida mak sei halo sei halao” deklara Kay Rala Xanana Gusmão.

Entretantu Crish Wilson, nu’udar Prezidenti Conoco Phillips, hato’o kongratulasaun ba Governu Timor -Leste hodi hala’o ona tranzaksaun ba Greater Sunrise ne’e,  no Chris iha esperansa ba Timor-Leste  hodi bele dezenvolve greater sunrise ne’e iha Timor.

“Uluk nanain ha’u hakarak hatete parabens ba Governu Timor-Leste tanba halo ona tranzaksaun ida ne’e. Ami koalia ona ho Governu ba fulan balun kona-ba ami-nia interese iha dezenvolvimentu Greater Sunrise, no Governu husu se ami hakarak atu fa’an ami-nia asaun ka interese ba Timor-Leste no ami aseita ona atu halo ida ne’e ohin loron. Tanba ne’e ha’u hakarak kongratula Timor-Leste ba ida ne’e, no ha’u dezeizu boa sorte bainhira dezenvolve kampu ida ne’e atu dezenvolve ba fali Timor-Leste. Ha’u-nia esperansa ba Timor-Leste, kampo Greater Sunrise ne’e kampo ida ne’ebé di’ak tebes. Ami hakarak tebe-tebes atu haree dezenvolvimentu kampo ne’e”, dehan Chris.

“Ami iha opiniaun diferente husi Timor-Leste kona-ba dalan diak liu atu dezenvolvimentu kampo ne’e, maibe ami respeita tebes Timor ninia dezeizu atu dezenvolve kampu ne’e ba fali Timor-Leste. Tan ne’e, maske ami iha vizaun oinseluk kona-ba ekonomia (gastus) ba ida ne’e, no iha ami nia kompañia laran, ida ne’e la’os investimentu ne’ebé ami preparadu atu halo, maibe ami hakarak tebes atu haree kampo ne’e dezenvolvidu husi Timor-Leste no sira seluk, no ami iha esperansa bo’ot ba ida ne’e atu  akontese  iha loron ida ba Timor”,realsa Prezidenti ConocoPhillips ne’e.

Kompañia Nasional Timor Gas And Petroleum (GAP),   ne´ebe halo operasaun kampo Greater Sunrise, ne´ebe envolve ativa  mos iha prosesu negosiasaun ne´e afirma,  ho akordu ne´e bele envolve direta Kompañia Nasional Timor GAP, partisipa iha dezenvolvimentu Greater Sunrise.

Tuir  Prezidenti Kompañia Nasional Timor GAP, Francisco Monteiro,  afirma katak, ho akordu ne´e hamosu tan pasu importante ida hodi hakat ba parte sira seluk, nune´e bele dada Pipeline mai Timor-Leste.

“Ba ami akordu ne’e signifika buat rua, importante tebes ba Timor GAP no mos ba Estadu no povu Timor-Leste, tamba iha akordu ida ne’e, permite katak Timor-Leste liu husi Timor GAP bele partisipa ativamente iha prosesu dezenvolvimentu Greater Sunrise hodi foti parte ConocoPhillips nian iha Joint Venture ka parseiru iha Greater Sunrise nia laran, no ida ne’e ondra no privilejiu ida hanesan Kompañia Nasional fo oportunidade ida para ita bele hamutuk liu husi mekanizmu oi oin, ho akordu ida ne’e bele halo ita pasu ida tan, besik liu tan atu dada Pipeline ba ita-nia rain Timor”, dehan Francisco.

Lee hotu :   PM Rui Araújo: Tribunal Rekursu preokupa ezekusaun OJE 2014-2015

Alende  ne´e Prezidenti  Autoridade Nasional Petroleo no Minerais,  Gualdino da Silva, orgullu ho akordu ne´e tamba pasu importante ba Governu Timor-Leste, hola parte iha dezenvolvimentu projetu bo´ot Greater Sunrise nian .

“Parabens ba Timor-Leste tomak, tamba ho ita-nia lideransa ne’ebé mak iha, reprezentante espesial  Governu Timor Leste Kay Rala Xanana Gusmão nian ba prosesu negosiasaun  sosa Saham ka asoens, partisipasaun husi kontratu Greater Sunrise ho ConocoPhillips ne’e la’o ho di’ak mezmu ita hatene katak Kompañia ConocoPhillips nu’udar partisipante ida iha kontratu Greater Sunrise, sira iha hanoin seluk atu dezenvolve Greater Sunrise ne’e, maibe akordu refere la’o ho situasaun ne’ebé amigavel tebes entre parte rua ne’ebé tuir loron hetan duni nia susesu”,afirma Gualdino.

Iha parte seluk, veteranu Timor-Leste,  ne´ebe hamriik metin iha Xefi Negosiador Kay Rala Xanana Gumão,  hodi apoiu luta ba delimitasaun Fronteira Marítima,  nune´e mos luta ba dada kadoras Greater Sunrise mai Timor-Leste,  hato´o sentimentu kontenti,  ho akordu ne´e tamba bele loke ona dalan ba Timor-Leste ba oin bele dada kadoras mai Timor leste.

“Hanesan Sekretáriu Task Force  Veteranus ba Asuntu Interese  Nasional, hakarak kongratula ba kompañia ConocoPhillips, ne’ebé ho laran  luak tebes, hakarak servisu hamutuk ho Governu Timor Leste, liu liu ita koalia kona-ba kanalizasaun Greater Sunrise, iha parte seluk ita mos agradese ba kontribuisaun hotu ba Veteranu sira, liu liu Veteranu  Australia sira ne’ebé dala barak sira mos hakarak kadoras mai Timor, no eventu asina akordu ne’e, ne’ebé importante tebes ba povu no Nasaun Timor-Leste, tamba ita iha esperansa katak kadoras tenki mai duni Timor, tamba ne’e lori veteranu Timor-Leste nia naran hakarak agradese mos Komandante Xefi Falintil Kay Rala Xanana Gusmão ho nia ekipa tékniku tomak, ne’ebé hala’o luta hodi hetan greater sunrise la’os ida ne’ebé fasil, maibe konsege ita hetan duni rezultadu”,afirma Jorge Alves.

Tuir Jorge ALves, maske Timor-Leste hanesan nasaun kiik ida,  maibe ho lideransa karismátiku Kay Rala Xanana Gusmão,  ho kapasidade no esperiensia ne´ebe iha,  konsege lori  Timor-Leste manan fronteira marítima ho Australia,  nune´e mos negosia ho kompañia Internasional ConocoPhillips,  hodi hamosu akordu dada kadoras mai Timor-Leste.

Tamba ne´e nia dehan, Xefi Negosiador husu ba Povu Timor-Leste,  atu la bele dúvida ho nia esforsu, tamba nia promete ona ba povu no rai ida ne´e,  buat  ne´ebe nia halo nia sei bele halo,  tamba ne´e husu nafatin apoiu entidade hotu, servisu hamutuk lori Timor-Leste ba futuru ne´ebé nabilan.Oly

 

Add to Comments Here!!!!

error: Content is protected.
Secured By miniOrange
You might also like:
TL lidera enkontru SEAMEO INNOTECH, Aprezenta kriatividade materiais prátika ba siensia

Timor-Leste lidera enkonrtu Konsellu diretiva organizasaun...

Mundu ho Tétun GMNTV 29 Setembru 2018

Konstrusaun Estádiu Munisipal seidauk remata, FFTL deside jogu Suzuki Cup uza Estadiu rua iha Thailandia no Malázia

Federasaun Futeból Timor Leste (FFTL), Segunda...

Close