Governu sei halo dekretu Governu ba ezekusaun OJE

Ministra Finansas em Exercicio, Sara Lobo Brites, koalia ho Primeiru Ministru Taur Matan Ruak, atu halo dekretu Governu ida hodi regula ministeriu sira nia ezekusaun Orsamentu Jeral Estadu tinan 2019. 

“Hau informa ba Primeiru Ministru Taur Matan Ruak, orsamentu promulga ona, ita finansas prepara hela instala, hela sistema no prepara mos dekretu Governu ezekusaun OJE 2019 ne’ebe mak sei aprezenta iha tempu badak”, dehan Ministra Finansas em Exercicio Sara Lobo Brites,ba Jornalista sira iha Palasiu Governu Segunda (11/02/2019).

Ministra Interina ne’e iha esperansa katak , dekretu governu nee sei konklui iha semana oin atu nunee ministeriu idai-dak bele ezekuta ninia orsamentu.

Sara Brites hein katak iha semana oin dekretu Governu ne’e konklui nune’e iha loron 18, fulan Fevereiru ,tinan ne’e ministeriu sira bele hahú ona ezekuta sira nia orsamentu ida-idak ona.

“Espera que fim de semana ami bele konklui iha semana oin dia 18 bele loke ba ajensia Govermentais sira para sira bele ezekuta sira nia osan semana oin”, dehan Sara Lobo Brites.

Konaba orsamentu ratifikativu ne’ebe Governu liu husi Konsellu Ministru aprova iha semana kotuk ho montante  USD 94 Milhões Governu kansela ona, tanba Prezidente Republika promulga ona OJE 2019.

“Orsamentu ratifikativu ne’e aprova kuandu OJE seidauk promulga ,maibe kuandu promulga ona automatikamente ida ne’e ita kansela, OJE aprova ho lei nune’e ,entaun Governu estabelese fali dekretu Governu ezekusaun ida para regula fali oinsa ministeriu sira bele ezekuta sira nia osan”, termina  Ministra Finansas Interina. tos