JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Dom Basílio admira ho reasaun povu TL, Diálogu importante tebes hodi hetan bom sensu

Dom Basílio admira ho reasaun povu TL, Diálogu importante tebes hodi hetan bom sensu

Bispu Diocese Baucau Dom Basilio do Nascimento, admira no kontente ho reasaun povu Timor-Leste (TL) nian perante situasaun polítika ne’ebé oras ne’e dadaun la’o iha rai laran, maski seidauk iha solusaun, maibé povu Timor-Leste kontinua mantein hakmatek.

Bispu Diocese Baucau Dom Basilio do Nascimento, halo entrevista ba Jornalista sira hafoin enkontru ho Prezidente Republika (PR) Francisco Guterres Lú Olo. Foto MPR

Tuir Bispu Diocese Baucau ne’e katak, povu TL kontinua hatudu nia maturidade hodi mantein moris iha paz no dame laran.

Dom Basílio do Nascimento hato’o asuntu ne’e hafoin hamutuk ho bispu Diocese Díli Dom Virgílio do Carmo da Silva no bispu Diocese Maliana Dom Norberto do Amaral halo enkontru ho Prezidenti Repúblika, Francisco Guterres Lú OLo iha Palácio Prezidensiál Nicolau Lobato Bairro Pite, Sesta (10/11).

“Ha’u hakarak hatete buatida katak, ha’u sente admiradu no kontente ho reasaun povu Timor Leste nian. Sé ita haree ba tinan lima ba kotuk liuba situasaun sira hanesan ne’e bele kria ona pániku iha povu nia leet. Mai ha’u pasu ida ke agora ita haree ema simples sira kolia ho bom sensu du ke responsável balun”, hateten Dom Basílio do Nascimento.

Iha fatin hanesan, Prezidenti Repúblika Francisco Guterres Lú Olo mós sente kontente ho hanoin di’ak husi reprezentante uma kreda Katólika nian, husi Diocese Díli, Baucau no Maliana konaba atu buka forma ne’ebé di’ak atu solusiona situasaun polítika iha rai laran.

“Ohin Prezidenti Repúblika, ha’u rasik (Lú Olo) halo sorumutu ho ita nia amu bispu na’in tolu, tuir ha’u nia ajenda ne’ebé mak determina ona iha semana kotuk liuba, amu Bispu na’in tolu mai to’o iha Palásiu Prezidensiál atu fó netik sira nia hanoin ruma konaba situasaun ne’ebé oras ne’e dadaun ita nia povu ka sarani sira infrenta. Ne’ebé ho haksolok bo’ot tebes ha’u simu sira hodi rona sira nia ideia”, Xefi Estadu Francisco Guterres Lú Olo haklaken.

Lee hotu :   Mota Comoro sobu moru protesaun, Komunidade ejiji governu halo investigasaun

Entretantu tuir nota komunikadu imprensa husi gabinete Relasaun Públika Prezidensia Repúblika nian haktuir katak, enkontru ne’e nu’udar inisiativa husi Prezidenti Repúblika nian, atu rona pontu de vista no hanoin sira husi Amu Bispu na’in-tolu ba situasaun polítika atuál.

“Iha enkontru ne’e Prezidente-da-Repúblika informa ba Bispu sira kona-ba prosesu formasaun VII Governu Konstitusionál ne’ebé fó kbi’it no kompeténsia tomak ba Prezidente-da-Repúblika.  Hafoin Tribunál Rekursu anunsia rezultadu eleisaun lejislativa, Prezidente-da-Repúblika rona hanoin sira husi partidu polítiku ho asentu parlamentár kona-ba formasaun Governu. Liuhusi sorumutuk sira ne’ebé Prezidente-da-Repúblika inisia, partidu polítiku hotu-hotu hatudu sira-nia hakarak atu kontribui ba páz no estabilidade. Partidu oposizaun CNRT, PLP no KHUNTO ida-idak deklara katak sira sei halo oposizaun konstrutiva”, nota komunikadu imprensa ne’e haktuir.

Dokumentu ba imprensa ne’e hatutan tan katak, iha enkontru ne’e Amu Bispu sira apresia no louva korajen Prezidente-da- Repúblika nia desizaun hodi forma VII Governu Konstitusionál no fó konfiansa nafatin ba Prezidente hodi tau matan no jere situasaun ne’e tuir kompeténsia ne’ebé hatur ona iha Konstitusaun RDTL.

Amu Bispu Diocese Baucau Dom Basílio do Nascimento hateten,  “iha situasaun polítika agora dadaun halo ita hetan kursu ida aseleradu ba demokrasia. Iha situasaun sira ne’e iha profesores mais brilhante no mós iha estudante mais brilhante,” nota imprensa ne’e  esplika tan.

Alénde ne’e Dom Norberto do Amaral  no Pe. Juvito do Rego hato’o mós katak desizaun hotu ne’ebé Prezidente-da-Repúblika halo sei iha hela koridór konstituisaun, nune’e husu atu kontinua nafatin la’o tuir konstituisaun.

Amu Bispu sira fó hanoin ba Xefe-de-Estadu kona-ba oinsá atu ultra pasa situasaun atuál. Nune’e, Amu Bispu sira hato’o katak iha kontestu ne’e husu ba Presidente-da-Repúblika atu foti desizaun ne’ebé bom sensu no tuir Konstituisaun.

Lee hotu :   Kondisaun merkadu Becora grave

Iha sorin seluk Amu Bispu sira kontinua sujere ba Xefe-de-Estadu atu uza nia kompeténsia tomak tuir konstituisaun hodi previlejia nafatin diálogu ho entidade oioin. Tamba tuir Amu Bispu sira katak diálogu ne’e laiha ida lakon no ida manan, maibé diálogu importante tebes hodi hetan bom sensu ba responde interese Estadu no nasionál ba rai no povu ida-ne’e.

Prezidente-da-Repúblika mós rona Bispu sira-nia opiniaun kona-ba espekuladores sira iha merkadu ne’ebé hanoin buka lukru iha oportunidade ne’e, hodi fa’an sasan ho folin aas no fó todan de’it ba povu sira.

Prezidente-da-Repúblika kontente no apresia tebes tanba bele hasoru Amu Bispu na’in-tolu.

“Ha’u agradese no apresia ba disponiblidade Amu Bispu sira hodi mai hamutuk ho ha’u ohin. Ha’u apresia tebes ho hanoin sira ne’ebé mak ohin hato’o iha enkontru ne’e. Lós duni, diálogu permanente hodi hetan konsensu ne’e importante duni. Diálogu ne’e fó espasu ba parte hotu atu fó sira-nia hanoin hodi hetan solusaun”, Lú Olo haktuir iha komunikadu imprensa ne’e.

Prezidente-da-Repúblika mós apresia no hahí povu ne’ebé hatudu sira-nia vontade no kontribuisaun ba paz no establidade. Povu ne’e nia maturidade polítiku boot ba nafatin.

Amu Bispu sira laran metin nafatin  ba esforsu no vontade Prezidente-da-Repúblika hodi halibur ukun na’in sira atu buka solusaun ba situasaun polítika hafoin Programa Governu la passa iha Parlamentu Nasionál.ias

Add to Comments Here!!!!

error: Content is protected.
Secured By miniOrange
You might also like:
PR husu F-FDTL-PNTL tenki servisu neutru ”Lere: Povu agora tauk”

Prezidente Repúblika (PR), Francisco Guterres ‘Lú...

PNTL liberta minoridade involve iha arte ritual ”Polisia Militar la tolera kriminozu”

Polisia Nasional Timor Leste (PNTL) Munisipiu...

MS deve Hospital Internasional sira milaun 6 USD

Vise Ministru Saude, Luis Lobato hatete...

Close