JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Saudozu Abessy halót iha Jardim dos Herois

Saudozu Abessy halót iha Jardim dos Herois

Saudozu Belchior Bento Alves Pereira alias Abessy, neebé hakotu nia iis iha Hospital Nacional Guido Valadares (HNGV), iha loron 26 Maiu 2018, Segunda feira (28/05/2018) loraik, ba halót iha Jardim dos Herois da Pátria Metinaro.

Família lubun boot inklui kompaneiru no kamarada sira husi ogranizasaun rezisténsia oi-oin no mós lider polítiku sira, akompaña saúdozu nia mate isin lori ba fatin deskansa ikus nian, neébé preparadu ona husi Estadu no família iha Jardim dos Herois da Pátria.

Saudozu halót hanesan ema revolusionáriu ida no konsidera heroi ida tanba, saudozu nia dedikasaun durante nia moris iha luta frente klandestina neébe simu orientasaun frente armada ba auto determinasaun.

Maski lakon husi família nia moris maibé, matebian Belchior Bento Alves Pereira alias Abessy, iha nia karakterístika ida ne’ebé mak, ne’ebé nunka lakon husi família sira nia memoria, maka Abessy sempre tane-as nia família doque nia-an rasik no atividade seluk iha liur.

Maria de Fátima Viana dos Santos nu’udar kaben husi matebian nian lembra Abessy nia hahalok ne’e, wainhira iha entrevista ida ho GMN iha nia rezidénsia Kuluhun Díli, Segunda (28/05/2018), molok hasai mate isin husi nia uma ba seremonia rinebre.

Inan husi oan nain rua ne’e haktuir, nia kaben matebian Abessy nu’udar, aman ida ne’ebé hadomi liu nia família, maske okupadu ho atividade seluk.

Tanba ne’e wainhira rona nutísia triste ne’e, sente sokada tebes.

“Ha’u mós lahatene, tanba ha’u ho ha’u nia oan na’in rua iha hela Bali, nia hanesan bai-bain sei hase ami, komprimenta ami no iha kalan antes mate nia sei koalia ho ha’u no oan sira dehan Sábadu ami fila mai nia (Abessy) maka atu ba hasoru. Iha tuku 2 ho balun kalan ne’e maka ha’u nia banin sira telefone dehan Abessy iha ona emerjénsia no iha dia 26 de Maiu ne’e, ami tenki mai kedas ona,” haktuir Maria de Fatima Viana ho matanwen.

Nia dehan tan, matebian maske okupadu ho servisu barak, maibé nia nunka haluha atu hamutuk ho família, to’o haluha atu kuidadu nia saúde.

Nune’e mós Tobias Alves Pereira, aman husi matebian Abessy hateten, buat ne’ebé Maromak tau hotu-hotu simu ho kontente, maibé kuandu Maromak bolu, hotu-hotu simu ho matawen.

“Nia (Abessy) mate nu’udar aman, inan, fen, oan no família sira terus. Ha’u kuandu ba foti nia ha’u labele hatete buat ida porque haree mós ba nia saúde ne’e. Nia tiu Padre mós hatete mai ha’u dehan katak, Abessy tenki kontrola nia isin ne’e, tanba nia isin ne’e terlalu liu, mas buat hotu ita la espera, ita hakarak mas kuandu Maromak bolu ita tenki simu Nai Maromak nia bolu,” dehan nia.

Matebian Abessy hakotu nia iis iha Hospital Nacional Guido Valadares (HNGV) iha loron 26 fulan maiu tinan 2018.

No mate rai iha nia uma durante loron rua kalan rua, hamutuk ho nia família sira, molok hala’o seremónia funébre, iha Segunda feira (28/05/2018).

Matebian nia isin hasai husi uma matebina nian iha Kuluhun, iha tuku 13:30 OTL, hodi kontinua ba iha matebian nia uma, iha Metiaut hodi hatur iha nia rezidénsia ne’e durante minutu balun, depois kontinua ba iha Igreja Santo António Motael hodi halo misa funébre nian.

Padre Domingos Alves iha nia homília konseilla no enkoraza família matebian Abesy nian, atu laran metin no fiar katak, maski isin bele mate maibé Abesy nia klamar sei moris hias iha mundu seluk.

“Nia mate la’os mate hodi ba oin, maibé mate para ba moris, ida ne’e maka ita nia fé, fé Katólika nian tanba ita fiar iha Jesus nia liafun ne’ebé temi iha evanjellu São João nian. Abeesy nia ema ne’ebé laran luak, ajuda Madre no Padre sira inklui Igreja, Abessy nia família liu-liu inan no aman sira mós loron-loron ativa ba misa,” dehan Pe. Domingos Alves.

Lee hotu :   SEJT garante transparensia haruka trabalhador ba Korea Sul-Australia

Matebian Belchior Bento Alves Pereira nu’udar oan daruak husi Tobias Alves Pereira no Domingas da Silva Bento ne’ebé moris iha Díli, loron 27 fulan Outubru tinan 1974.

Matebian Belchior Bento Alves Pereira iha tempu rezisténsia hanesan mós membru husi FITUN ou Frente iha Timor Unidos Nafatin. Além de ne’e matebian mós iha tinan 1990 lés bandeira Merah Putih no hadau pistola husi SGI.

Matebian mós nu’udar autór ba manifestasaun iha loron 29 fulan Outubru tinan 1991 iha Igreja Motael.

Matebian Abessy mós nu’udar autór ba demonstrasaun pasífika Masakre Santa Cruz iha loron 12 fulan Novembru tinan 1991 no matebian hetan kaptura husi militar Indonézia.

Iha tinan 1998 wainhira CNRM transforma ba CNRT matebian hetan kargu nu’udar membru Komisaun Juridisaun Frente Polítika Interna to’o iha 30 de Agusto 1999 hodi hala’o refrendum ba ukun-an. Matebian mós nu’udar joven ne’ebé ho aten brani hodi luta ba ukun rasik-an.

Matebian Abessy hakotu iis husik hela nia kaben ho oan na’in rua.

Biografia Abessy

Tuir mai biografia badak no sasin husi Abessy konaba ninia kontribuisaun iha luta ba libertasaun ne’ebé publika husi Centro Nacional CHEGA (CNC).

Memória Saudozu Belchior Francisco Bento Alves Pereira (Abesy) Tuir Audiensia Publika Nasional Kona-ba “Labarik ho Konflitu” iha Komisaun Akolhamentu, Lia los ho Rekonsiliasaun (CAVR) iha Timor-Leste.

Iha tinan 1990, ha’u foin mak tinan 13. Iha loron ida, iha tinan 1990, ami to’o iha ami nia eskola São Jose iha Dili, ami haree ema hakerek iha didin lolon hotu-hotu no ema na’ok tiha eskola nia bandeira Merah Putih. Iha hakerek ida tau hanesan ne’e “Integrasaun ne’e la di’ak”. Ami lakohi fó atensaun barak ba ida ne’e no ami kontinua ami nia eskola. Maibé la kleur de’it, ema Intel barak mai ami nia eskola. Ami la gosta sira atu mai tama iha ami nia eskola tan ne’e ami protesta no tuda sasán hasoru sira.

Ami nia mestre sira ema Indonéziu hotu. Iha tuku sanulu dadeer, Governador Abilio Soares mai to’o iha ami nia eskola. Nia atu baku de’it ona ami. Hafoin Sr. A (naran segredu) no polísia B (naran segredu) lori ha’u ba Sr. C (naran segredu) nia uma atu hala’o inkéritu. Inkéritu hotu tiha, nia lori ha’u ba estasaun polísia nian iha Dili, no iha ne’ebá sira baku ha’u to’o ha’u lakon sentidu, no sira kolu molik tiha ha’u.

Iha kalan sira lori fali ha’u ba estasaun polísia sektór Dili nian. Sira halo inkéritu beibeik ba ha’u no bainhira ha’u la hatán, sira tebe ha’u. Sira dadur ha’u iha ne’ebá to’o fulan haat. Ha’u nia moris iha dadur laran hanesan loos moris iha nakukun laran. Bainhira dadur foun ida mai sira haruka ami baku malu hanesan serimónia simu ema foun. To’o ona oras han meiudia, guarda sira hateten ami aat loos.

Ha’u la hatene katak ha’u-nia kolega sira seluk mós dadur iha tempu ida-ne’e. maibé iha kalan sira lori ha’u ba haree sela sira seluk no husi ne’e ha’u haree ha’u-nia maluk sira seluk hanesan Nelson, Luciano, Francisco Magalhaes, ho Jojo Gusmão. Militár sira interoga no halo intimidasaun mai ami to’o ami dehan no simu de’it buat hotu ne’ebé sira dun ba ami maski ami la hatene liu buat ida kona-ba buat hirak ne’e. iha estasaun polísia, iha polísia ida naran D (naran segredu). Bainhira nia halo inkéritu ba ami, nia lori mós ho tudik ida hodi ameasa ami. Iha tempu tomak ami dadur iha ne’ebá, sira inkéritu hela de’it ami. Sira lori beibeik tudik bainhira halo inkéritu. Bainhira ami dehan buat sala ruma iha inkéritu laran, polísia baku ami.

Lee hotu :   Komunidade Bidau hala’o orasaun tama-sai uma

Iha tinan 1990, sira hasai tiha ha’u husi dadur. Hafoin semana balun liu tiha, ha’u tama ona iha grupu fitun nian. Grupu ne’e nia xefe mak Armando da Silva. Ha’u mós iha relasaun di’ak ho Aleixo kobra ho Julião. Ha’u foin mak tama de’it organizasaun ida ne’e fulan tolu hafoin mosu ona insidente 12 de Novembru 1991. Hamutuk ho ami nia kolega sira seluk husi Kuluhun ho família Sebastião nian, ami ba Motael atu tuir misa ai-funan moruk.

To’o la kleur de’it iha rate Santa Krús, militár sira hahú tiru. Ha’u subar iha leet ida besik didin semitériu nian. Polísia D (naran segredu) mai atu revista rate. Soldadu sira ne’ebé iha rate laran, sona ema naranaran de’it. Ha’u subar nafatin iha leet ne’e hodi haree. La kleur de’it ha’u rona D (naran segredu) bolu ha nia naran hodi dehan: “Ha’u hakarak hasoru alunu oan sira husi Santu Paulus”. Nia bolu ha’u hodi haruka ha’u tuur tiha rate leten, hafoin nia baku ha’u-nia isin to’o sai metan no azúl tiha.

Ha’u haree militár sira lori sai isin mate ho Hino trek ida, maibé ha’u la hatene sira lori loos ba ne’ebé. Sira lori ha’u ba ospitál Wira Husada iha Lahane. No sira seluk fali, sira lori ba estasaun polísia nian. Amu Bispu Belo ho Helena Carascalão mai haree duni ami. Bainhira ami iha karreta nia laran, soldadu sira sama ami. Bainhira sira hatún ami husi trek laran, sira soe ami hanesan loos sira soe fahi. Hafoin sira tau ketak tiha eis prizioneiru sira. Ami besik 200 maibé ami 24 de’it mak dadur. Sira dadur ha’u hamutuk ho Jacinto Alves.

Iha kalan ida, sira hanorin ami kona-ba prinsipiu Pancasila nian, no sira haruka atu sa’e ba karreta ida. Sira haruka ami na’in tolu atu hela iha uma ki’ik-oan ida iha Tasi Tolu. Uma ne’e batallaun 744 nian. Iha kalan ne’e kedas, sira lori ami sai husi Tasi Tolu ho Hino ida sa’e ba Ainaro. Iha Ainaro, sira fahe keta tiha ami. Komandante ida naran Suratman foti ha’u ho Jose Barreto, lori tiha ami ba Fatudu, atu nune’e sira bele fase ami nia kakutak. Sira dadur ami iha Fatudu besik tinan rua no sira hasai fali ami iha fulan Agostu tinan 1994.

La kleur de’it iha Ainaro komandante ida naran E (naran segredu) kaer fali ha’u. Bainhira sira halo operasaun iha ai-laran ha’u mak lori moxila kilat ho kilat-musan. Sira fó mai ha’u farda militár ne’ebé foun no sira uza ha’u hanesan “lasu”. Sira soe ha’u husi batallaun ida ba batallaun seluk, nune’e ha’u hela ho batallaun 613, 641, 642 no 643. Batallaun hirak ne’e servisu maibé hetan orden husi sira nia komandante boot F (naran segredu) ema Kalimantan ne’ebé hela iha Fatudu.

Ikus mai sira husik ha’u sai no ha’u fila mai ha’u nia família iha Dili. Maske ha’u livre ona, maibé bainhira vizita internasionál ida mai ka iha selebrasaun espesiál ida, sira bolu beibeik ha’u ba halo inkéritu no baku ha’u. Ha’u nunka fó informasaun ida kona-ba atividade klandestina nian, maibé iha loron ida sira kaer ha’u tanba ha’u nia belun ida dehan ba koramil katak ha’u organiza reuniaun sub-subar ho joven sia iha Kuluhun atu prepara ba vizita embaixadór ida nian.

Lee hotu :   Dom Virgílio: Kuaresma tempu refleksaun mos ba polítiku nain sira

Sira lori ha’u ba Intel nia sentru iha Colmera no iha ne’ebá ha’u hasoru polísia G (naran segredu) husi Oekusi. Nia lori ha’u ba uma ida ne’ebé sira uza atu tortura ema. Sira obriga ha’u atu hatán katak ha’u mak organiza reuniaun iha Kuluhun. Polísia G (naran segredu) kolu molik tiha ha’u, baku ha’u to’o ha’u la hatene tuir an. Hafoin nia borgol ha’u no husik hela de’it nune’e besik tinan tolu nia laran. To’o oras ne’e nia marka sei iha ha’u nia liman.

Sira lees tiha ha’u nia ibun hodi hatama ha’u nia faru ba ha’u nia-nia ibun laran, hafoin sira tebe ha’u ho sira nia botas. Sira baku ha’u ho fiu eletrisidade nian. Sira taka tiha ha’u-nia matan, hafoin sira lori mane grupu ida hodi mai baku ha’u. sira xoke ha’u ho eletrisidade. No nune’e nafatin husi dadeer to’o kalan. Ha’u lakon sentidu to’o dala barak.

Buat ida tuir mai ne’ebé ha’u hakarak dehan ba imi hotu, mak buat ne’ebé ha’u seidauk konta sai ba ema ida. Ha’u iha segredu ida ne’ebé ha’u seidauk dehan ba ema ida to’o oras ne’e, maibé ohin ha’u hakarak dehan sai. Ema sira be fó terus ha’u lori ha’u ba haree isin mate ida ne’ebé isin ne’e dodok daudaun ona, no iha isin ne’e, kanek barak iha nia isin lolon, no nia matan fuan naklosu sai tiha ona. Sira hakarak haree katak ha’u iha deseju seksuál ba isin mate ne’e ka lae. Isin mate ne’e sai aat liu ona no ha’u labele dehan katak ne’e feto ka mane. Hafoin sira hodi eletrisidade xoke ha’u-nia órgaun vitál.

H (naran segredu) ne’ebé ema treinu daudaun atu sai polísia hamoos tiha fo’er ne’ebé belit hela iha ha’u nia isin, maibé sira la fó faru ida mai ha’u. Sira lori ha’u molik de’it atu ba hasoru Komandante. Komandante la baku ha’u. Nia naran colonel I (naran segredu) ho ninia Vise Komandante husu tansá ema baku ha’u. Nia hateten katak tuir loloos ha’u ne’e sira lori mai atu inkéritu de’it la’ós atu baku. Nia husu deskulpa ba hahalok ida ne’e.

Sira bolu J (naran segredu) atu haree fali loloos kona-ba nia informasaun, maibé nia dehan katak nia tenke dehan ha’u nia naran tan ema fó terus nia. SGI nia boot dehan ba ha’u, “O hakarak ha’u oho tiha nia?” Ha’u dehan katak di’ak liu husik sai tiha nia maibé komandante SGI dehan katak nia iha sala.

SGI lori Aleixo Kobra ho ha’u ba han iha Pasir Putih maibé ha’u labele han tan ha’u kanek todan loos. Bainhira ami han hotu tiha, sira lori ha’u mai ha’u-nia uma. Ha’u tun husi karreta, ha’u tama ba uma laran, ha’u lakon tiha sentidu. Foin mak ha’u nia família hatene katak ha’u kanek todan. Sira kbiit laiha atu bele hatán ba soldadu Indonéziu nia hahalok ne’ebé halo ba ha’u.

Hafoin ha’u hetan oportunidade ba Indonézia atu ba eskola tan. Husi ne’e, mak ha’u sente katak ha’u livre loloos.

Família Boot Centro Nacional Chega! hato’o Kondelensia Profunda ba Família Saudozu Belchior Francisco Bento Alves Pereira (Abesy) ne’ebé fila hikas ba Aman Maromak Nia Kadunan Santo. Nes/CNC

Add to Comments Here!!!!

error: Content is protected.
Secured By miniOrange
You might also like:
Promosaun Koronel na’in 4 ba jeneral, depende ba desizaun PR

Xefi Kaza Militar Prezidenti Repúblika, Koronel...

TR proklama rezultadu EA  AMP sai vensedor tuir FRETILIN

Tribunal de Recurso (TR) proklama rezultadu...

City Fetures GMNTV Edisaun 10

Close