JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Saudozu Francisco hakotu iis ho idade 79, Família senti lakon aman inspirador di’ak ida

Saudozu  Francisco hakotu iis ho idade 79,  Família senti lakon aman inspirador di’ak ida

Saudozu Francisco da Silva hakotu ís iha loron (03/05) iha Hospital Nasional Guido Valadares (HNGV), ho idade tinan 79, hafoin transporta ho helikoptru husi sentru saúde Munisípiu Vikeke, tanba sofre moras pulmaun grave.

Família eis Administrador Munisípiu Vikeke ne’e, senti lakon aman inspirador ida ne’ebé di’ak tebes, tanba durante nia moris, saudozu sempre responsabiliza ba servisu hotu.

Deolindo da Silva, hanesan, família  senti triste tebes, tanba lakon aman ne’ebé durante ne’e sai inspirador ba sira, oinsa sai ema ne’ebé mak responsavel no aman diak ba oan sira.

“Saudozu ha’u nia pai matebian nia alin, nia ema di’ak, nia ema ne’ebé mak servisu maka’as responsavel no aman di’ak ba  hau nia alin sira  no ami hotu, nia sempre hanorin mai ami atu ami sai ema ne’ebé mak hatene responsavel ba buat ne’ebé mak ami halo, no aman di’ak ba ami nia oan sira, ida ne’e mak ami nunka haluhan”, hatete Deolindo da Silva ba GMN iha Comite Central FRETILIN (CCF)  Comoro Díli, Sabadu (4/5/2019).

Nune’e mós Ediu José Maria Guterres, hateten, saudozu Francisco da Silva alende inspirador ba família, nia mós ema ne’ebé mak sempre preokupa ba situasaun rai laran, liu-liu estrutura  VIII Governu konstitusional ne’ebé mak to’o agora seidauk kompletu.

“Iha fulan hirak liu ba, bainhira ha’u iha asuntu privadu ida ha’u ba Ossu,  saudozu telefone ha’u, no ha’u mós ba hasoru nia no iha ami nia hasoru malu, ami sempre ko’alia sobre situasaun rai laran, no iha buat barak ne’ebé ami sempre diskuti, no bainhira ha’u atu fila, ha’u ba despede, no iha nia baki leten ne’ebe mak iha los estrada ninin, nia hameno katak,  ha’u hatene katak, o agora besik liu Sekretáriu Jeral FRETILIN, Mari Alkatiri, ha’u husu ba o atu hato’o hela ha’u nia lia menon ba Mari Alkatiri katak, ha’u lakohi FRETILIN sai aitonka, ha’u harakarak ha’u nia lia menon ne’e o tenki hato’o ba Mari, ida ne’e la’os tanba nia la gosta lider ruma ou partidu ruma, maibé tanba nia preokupa ho situasaun rai laran, ne’ebé mak la’o ladun los, mas  realidade ha’u seidauk hasoru Sekretáriu Jeral Partidu FRETILIN, hodi hato’o liamenon ne’e, Maromak bolu ona nia , no maske nune’e ha’u bele hato’o iha uma fukun ida ne’e”, relata Ediu.

Lee hotu :   Relatorio JSMP sai referensia ba setor justisa

Enkuantu, Adjuntu Sekretáriu Jeral Partidu FRETILIN, José Reis, konsidera, saudozo Francisco da Silva merese atu hetan últimu homenagen husi Partidu FRETILIN, tanba saudozu Francisco da Silva, hanesan, ema ida ne’ebé mak   durante nia moris, fó aan tomak ba ema barak nia moris,  hanesan  komunidade iha Munisípiu Vikeke, no mós ba Falintil Forsa Defeza sira  durante invazaun Indonézia.

“Hafoin ita rona nia Biografia, Saudozu Francisco fó aan tomak atu servi ema barak, liu husi organizasaun oi-oin, liu-liu 1974-1975 tama hamutuk ho organizasaun polítika ne’ebé mak ema hotu rekuñse, ho kontribuisaun ne’ebé mak saudozu halo hatudu katak,  independénsia ne’e la’os ema ida rua nia luta de’it, maibé ema barak nia kontribuisaun”, José Reis hateten.

Saudozu Francisco da Silva moris iha Samanu, Aldeia Lekibuti, Suku Uiabobo, Postu Administrativu Ossu, Munisípiu Vikeke, oan husi Rolando Fereira da Silva, Uai–Lu, no mós Maria Guterres da Silva.

Saudozu Francisco da Silva oan ba da ikus husi maun alin hamutuk na’in sanolu resin ida (11).

Sadozu Francisco da Silva hahú nia estudu  iha tinan 1955, no frekuenta eskola primária to’o tinan 1961, iha Koléjio Santa Terezinha do Menino Jesus Ossu, husi tinan 1962 to’o 1965, saudozu kontinua nia estudu iha semináriu Dare, maibé tanba nia idade bo’ot ona, saudozu la konsege frekuenta nia estudu iha semináriu ne’e, maibe estuda fali iha eskola profesor katekista. Hafoin remata estudu hanesan profesor katekista, saudozu hala’o kedas kna’ar iha semináriu ne’e, hanesan mós profesor katekista,  hahú husi tinan 1966 to’o tinan 1968.

Iha tinan 1969, saudozu  estuda fali enfermazen iha Díli, iha tinan 1972 no hafoin remata estudu enfermazen hanesan enfermeiru, saudozu fila ba Ossu no kaben ho nia kaben Felizmina Sarmento Guterres iha loron  3 fulan novembru tinan 1973.

Lee hotu :   Veteranu Andre da Costa ‘L4’ hakotu iis

Hafoin kazamentu, Saudozu hetan fiar husi Governu Portugés hodi sai enfermeiru iha Munisípiu Cova Lima, Postu Administrativu Suai.  Aldende sai hanesan enfermeiru, iha memontu ne’eba saudozu mós inklina aan iha partidu ASDT, hanesan Vise Sekretáriu Komite Rejional ASDT iha Suai.

No iha tinan 1974, saudozu muda husi Covalima mai Díli, no iha fulan Novembru tinan hanesan mós, saudozu ho nia familia muda ba Ossu hodi hala’o kna’ar hanesan enfermeiru.

Alende sai hanesan enfermeiru, saudozu mós  konsege sai lider komunitária hanesan Xefi Suku iha Postu Administrativu Ossu, enkuantu ukun aan ne’e,  hahú iha husi tinan 2000 to’o tinan 2014,  saudozu Francisco da Silva  hetan fiar husi Primeiru Governu konstitusional, hodi sai hanesan Administrador Munisípiu Vikeke, no iha tinan 2013, saudozu husu hato’o karta hodi hetan reformasaun, tanba problema saúde, maibé Administrasaun Estatal la aseita, tanba Governu sei presiza nia,  no Saudozu foin hetan reformasaun iha tinan 2014, hodi deskansa tanba nia saúde la premiti.

Entretantu, iha tinan 2019 loron tolu fulan Maiu, saudozu Francisco hakotu ís iha Hospital Nasional Guido Valadares, ho idade tinan 79 tanba sofre moras pulmaun.  Hafoin hakotu ís, família lori mate isin saudozu Fransico da Silva ba deskansa iha Akadiruhun, no iha loron 4 fulan Maiu tinan ne’e, família matebian lori saudozu nia mate isin ba CCF hodi hetan últimu homenajen.

No hafoin ultimo homenajen, familia trasporta kedas mate isin saudozu Francisco ba Munisípiu Vikeke, hodi halo prosesu funebre tuir tradisaun Postu Administrativu Ossu nian.ola

Add to Comments Here!!!!

error: Content is protected.
Secured By miniOrange
You might also like:
Akademista TL apoia Governu empresta osan investe ba GS

Akademista Timor-oan sira, fó apoiu másimu...

PNTL detein suspeitu deskonfia oho aman rasik

Polísia Nasionál Timor-Leste (PNTL) Munisípiu Díli,...

PPN Arão Noe: TL-Australia konkorda sei ratifika FM iha data hanesan

Prezidenti Parlamentu Nasionál (PPN), Arão Noe...

Close