Lucas Rama Metan mate sofre moras Kankru “Timor- Leste lakon intelektual diak ida”

Reitor Universidade da Paz (UNPAZ), Lucas da Costa alias Rama Metan, hakotu iis iha ICU Hospital Nasional Guido Valadares (HNGV), iha oras tuku 08:30 Otl dader horseik.

Reprezentante família  no Universidade da Paz, Primeiru Vise Reitor UNPAZ, Apolinário Marsan do Rego, hato’o sentimentu   triste no sokadu ba moras  kankru colon ne’ebé matebian   Lucas Rama Metan infrenta, tanba sira nunka iha informasaun kona ba nia moras.

Apolinário senti triste, tanba durante ne’e maske matebian sai hela deit ba rai liur hodi halo tratamentu maibé, la klarifika moras saida mak nia infrenta.

“Kauza husi nia  mate ida ne’e, tanba  nia  sofre moras kankru Intestinal (kanker usus-red), ne’ebé nia enfrenta hodi nune’e, médiku serugia foti desizaun  hodi halo operasaun iha loron 27 fulan Agostu tinan ne’e, ne’ebé  hafoin operasaun, matebian halo observasaun iha sala ICU durante loron sia no hori kalan médiku sira desidi fila fali hodi halo operasaun  ba dala rua tanba fatin operasaun antes ne’e mak nakloke fila fali, no operasaun ne’e hala’o durante oras tolu nia laran no hafoin operasaun remata matebian hala’o fila fali observasaun iha sala ICU no ohin dader oras tuku 8:30 Otl, nia hakotu is”, relata Apolinário Marsan do Rego ba jornalista sira iha Hospital Nasional Guido Valadares (HNGV), Bidau Toko Baru Díli (5/9/2019).

Apolonário haktuir, kauza ba  matebian Lucas Rama Metan hodi hakotu is ne’e, tanba tuir juntamediku Hospital Nasional Guido Valadares, matebian infrenta moras kankru Colon ne’ebé to’o ona iha estadiun ikus, tanba ne’e família senti triste no sokadu tanba  matebian nunka ko’alia sai moras ne’ebé nia enfrenta, nune’e bele hetan tratamentu sedu.

“Nia moras ne’e kleur ona maibé, nia sei la’o ba mai rai liur iha Indonézia no Malaysia hodi  Cek up, maibé ataka makaas ne’e iha loron  24  loron rua antes operasaun iha loron 27, moras ne’e hakaas nia iha oras tuku 8 kalan entaun ami lori kedas nia mai no halo kedas operasaun iha loron 27, no moras ida ne’e ami  nunka hatene tanba nia la fó hatene ami, mesmu durante ne’e nia sai hela deit ba rai liur hodi halo tratamentu maibé, morass saida ami lahatene, no ami foin hatene bainhira moras ne’e hakaas nia iha loron 24, tanba nia ema ida taka an kuandu buat ne’ebé mak kona ba nia aan rasik”, katak Apolinário.

Sentimentu triste hanesan mós, hato’o husi Prezidente Partidu Demokratiku, Mariano Asanami Sabino katak, Povu Timor Leste lakon ema intelektual ida no ema kotribuidor, inklui ema rejistensia ida ne’ebé mak forte ba rai doben TL.

“Ba RENETIL, ba Partidu Demokratiku, UNPAZ família rua tolu ne’ebé mak besik, ho família rasik ita hotu senti lakon aman ida, mestri ida, ema ne’ebé senti kontribui no ohin ami sira ne’ebé mak agora hamriik iha ita bo’ot sira-nia oin hodi ko’alia, servi no halo buat ruma ba povu ida ne’e, tanba mestri ida ne’e mak ami sempre aprende hamutuk”, Asanami espresa nia sentiment triste.

Matebian Reitor Universidade da Paz, Lucas da Costa Alias Rama Metan, hakotu iis iha Hospital Nasional Guido iha oras tuku 8 dader, hafoin hala’o operasaun segundu iha loron hat  fulan Setembru oras tuku 7 kalan, tanba hetan infesaun husi operasaun antes ne’ebé  hala’o husi ekipa médiku serugia iha loron 27 fulan Agusto tinan ne’e, tanba tuir relatóriu Junta médiku matebian hetan moras kankru  intestinal ho estadiun  ikus ona.

 PD husu  Estadu halot Rama Metan  hanesan heroi

Alende ne’e, Prezidente Partidu Demokrátiku (PD), Mariano Asanami Sabino husu ba Prezidente Repúblika, Francisco Guterres Lú Olo, no Primeiru Ministru Taur Matan Ruak, atu desidi fatin halot mate isin  Reitor Universidade da Paz Lucas da Costa Rama Metan,  tanba konsidera matebian hanesan ema rejistensia.

Mariano haktuir, matebian Rama Metan hanesan aman no mestri ida ne’ebé mak  kontribuidor no rejistensia na’in, tanba ne’e husu ba ukun na’in sira, liu-liu Prezidente Repúblika no Primeiru Ministru Atu haree no desidi fatin halot matebian ne’ebé  los no merese hanesan ho heroi sira seluk.

“Hakruk ba nai Prezidente Repúblika, no nai Primeiru Ministru atu haree katak, oinsa mak halot mate isin Rama Metan ne’e iha fatin ne’ebé mak merese hanesan mós heroi sira seluk,  tanba nia heroi no ami mak testamunha hamrik iha ne’e”, tenik Asanami Sabino

Nia haktuir,  Governu  no Estadu iha kompetensia atu desidi fatin halot Rama Metan nian, tanba matebian Rama Metan hanesan heroi ne’ebé la’os ema ida rua deit mak sai testamunha maibé kuaze ema lubun  bo’ot iha rai ida ne’e mak sai sasin katak, Rama Metan ema  heroi duni.

“Ohin mós ami bele halo buat ruma tanba mai husi nia matenek, ne’ebé ami hein katak, ita hotu konsidera ida ne’e tanba nia ema ida ne’ebé mak sempre ho nia espíritu diak ne’ebé servi UNPAZ ne’ebé mak nia harii ne’e, fatin ida ne’ebé mak nia harii atu kontribui ba libertasaun ba povu nian ida ne’e mak sei kontinua nafatin ohin instituisaun ne’ebé mak nia iha kontinua nafatin ba oin”, Asanami afirma.