Juventude Covalima refleta masakre Setembru negro

Atu komemora loron masakre Setembru negro, tinan 1999-2018 ba dala  19, Juventude Covalima organiza atividade refelesaun ba juventude no komunidade Covalima ne’ebé hala’o servisu no estudu iha Munisipiu Dili, atu refleta hikas Masakre Setembru Negro Suai, ne’ebé konta husi vítima sira ne’ebé sei moris.

“Objetivu husi reflesaun ne’e, ami Juventude husi Covalima nia hakarak mak organiza malu, hodi hanoin hikas fali, akontesimentu ne’ebé akontese iha tinan 19 liu ba, hodi hanoin  hikas katak  momentu ne’eba ita-nia maluk Timor oan  sira ne’ebé  sakrifika sira a’an hodi foti fali sira-nia espíritu kontinua  nafatin sai jerasaun kontinuador, haree ba sira ne’ebé liberta ona rai Timor, no ita hanesan joven sai kontinuador, atu liberta povu no rai doben ne’e ba future,”dehan Xefi Komisaun Organizadora Jermano da Silva hatete, ba Jornalista sira, foin lalais ne’e iha salaun Asosiasaun Hak, Farol, Díli.

Nia afirma, tuir lolos sira hakarak atu organiza malu, selebra loron setembru negro ne’e iha Suai, maibe tamba kestaun  okupadu liu-liu iha Munisípiu Díli, kuaze ema barak mak estudante no barak mak servisu, entaun sira la konsege realiza iha Suai.

“Ema husi Covalima iha Munisípiu Dili ne’e barak tebes, maibe ami realiza eventu refere, la presiza ema barak,  maibe ita hahú ho ema oituan, ho hanoin ida deit hanoin ba terus  ne’ebé ita maluk sira hasoru iha tempu difisil, no foti nu’udar forsa foun ba juventude sira, atu iha espíritu nasionalizmu la’o ba oin,”dehan nia.

Entretantu Deputado Adriano do Nascimento, husi bankada Partidu Demokrátiku nu’udar mos Suai oan ne’e konsidera, inisiativa husi juventude sira hodi realiza reflesaun ne’e, tamba joven sira  hakarak atu hatene istória ne’ebé ema barak hetan  torturasaun kanek no mate iha momentu ne’eba.

“Inisiativa ne’e hodi bele hatutan historia, tamba ita ukun a’an ona, la hatene sofrimentu  ne’ebé ita-nia ukun nain sira halo no sakrifika sira-nia vida, mai kuandu ita la konta, juventude sira-nia nasionalizmu no patriotizmu ne’e menus, ha’u hanoin ho Suai  oan sira halibur malu ne’e, hodi koalia fila fali no fo hanoin malu, konta istória, espera katak bele habo’ot no hametin liu tan juventude sira-nia patriotizmu no nasionalizmu, nune’e bele  hateke ba future,”katak Adriano.Oly