PN konsidera funsionamentu Aeroportu Suai ho RAEOA denpende aviaun

Deputadu Parlamentu Nasionál (PN) konsidera funsionamentu Aeroportu Suai ho Rejiaun Amdministrativa Espesial Oe-cusse Ambeno no Zona Ekonomia Espesial Sosial Merkadu(RAEOA-ZESSM) depende ba aviaun. Tanba dadaun ne’e aviaun ZEESM de’it mak halo sirkulasaun iha aeroportu rua ne’e, no seidauk iha iha aviaun seluk.

“ Ha’u lakohi dehan rame liu iha aeroportu Suai ka rota de sândalo, maibe sirkulasaun ne’e aviaun ZEESM mesak mak la’o ba iha Suai no ba iha Oe-cusse. Ha’u lakohi politiza katak aeroportu RAEOA mak rame liu ka Suai, tanba ita iha aviaun ida de’it, aviaun ida ne’e mak sei halo sirkulasaun, tanba Timor seidauk iha aviaun barak, Dili de’it mak sei sai sentru ba aviaun hodi halo movimentasaun ba mai, ba komersial no passazeirus babain. Tanba ne’e, funsionamentu aeroportu depende ba aviaun, sorte aviaun ZEESM ne’e iha hodi ba, se laiha mós lahatene loos paradu karik,”hateten deputadu FRETILIN, Fabião de Oliveira ba jornalista iha PN, Kuarta(31/07/2019) ne’e.

Iha sorin seluk, deputadu bankada PLP, Abel Pires, afirma, aeroportu Kay Rala Xanana Gusmão sei funsiona di’ak liu, bainhira projetu tasi mane la’o.

“ Suai ninia funsaun ne’e atu suporta kualker operasaun tasi Timor nian, liu-liu mina ho gas iha tasi Timor, maibe projetu ne’e agora dadaun seidauk la’o, kuandu la’o ona, buat hotu sei di’ak,

Tanba aeroportu ne’e, Maun Xanana halo para atu suporta ninia negosisaun ho Australia, hodi hatudu ba Australia katak Timor prontu, maibe kestau uza ne’e, ne’e hein tempu de’it ona,

Kuandu operasaun greater sunrise ne’e la’o, Betanu ho Beasu ne’e sei transforma teb-tebes, tanba polítika, ema halo buat sira ne’e sai ladi’ak hotu ba povu,”akresenta deputadu Abel.

Entretantu, Aeroportu Kay Rala Xanana Gusmão Kovalima, inagura iha loron 20 fulan Juñu no tinan 2017, no Aeroportu Rota do sândalo inagura iha loron 18 fulan Juñu tinan 2019 ne’e.Say