PNTL lá identifika autor rama ambon

Polisia Nasional Timor Leste (PNTL) seidauk identifika autor rama ambon ne’ebe hana vitima Maria de Fatima, iha area Praia dos Ququeiros-Dili, Sesta (13/4/2018).

Vitima Maria de Fatima hetan hana husi ema deskoñesidu  iha parte kabas iha madrugada, no hetan kedas primeiru sukoru hodi hetan atendementu mediku iha Hospital Nasional Guido Valadares (HNGV).

Komandante Jeral PNTL, Komisariu Julio Hornay hatete, oras ne’e dadauk parte PNTL elabora hela kazu rama ambon tanba prosesu kriminal entaun tempu deit sei kaptura ema deskoeñesidu ne’e.

“Ne’e prosesu kontinua la’o kualker krimi iha prosesu kriminal, sé ida ne’e fragante de leitu ohin halo ita kaer sira, mais la fragente de leitu  ita buka, ita buka neneik ka lalais kriminozu ita sei kaptura hanesan uluk imi husu ha’u bainhira mak kaer Juga Gama ho Alcino  ne’e tempu deit ita kaptura,” hateten Julio Hornay ba Jornalista sira iha Kaurtel Jeral PNTL- Caicoli, Segunda (16/04/2018).

Komandante Jeral PNTL aprofunda liutan Polisia la kaptura wainhira halai ba subar iha tasi laran tun liu ba okos ka ba subar tiha iha lalehan, maibe sei moris iha rai leten sei kaptura nia.

“Tempu ida sei kaptura nia, nia bele halai to’o ne’ebe deit oin seluk nia subar iha tasi okos,subar iha lalehan maibe, sei moris iha rai maran loron ida kaptura nia,” hateten Julio Hornay.

Timor-Leste iha periódu kampaña eleitoral, maibé Komandante Jeral PNTL deklara akontesimentu nee la iha ligasaun ho polítika iha rai laran, tuir relatoriu ne’ebe nia parte simu diariomente husi komandante munisipiu sira kona-ba kampaña to’o agora laiha akontesementu ne’ebe hatudu iha kampaña ne’e. Tuir observasaun Komando PNTL nian katak,  hahuu husi kampaña dahuluk to’o agora situasaun la’o hakmatek, katak la iha probelma ruma ne’ebe mak mosu.eus