KAZU TIRU IHA MALIANA, KOMJER PNTL HUSU KOMANDU MUNISÍPIU FO INFORMASAUN

Komandante Jeral Polisia Nasional Timor Leste (PNTL ) Komisariu Julio Hornay, fo ona orden ba Komandu Munisípiu Bobonaro atu hatete ba membru PNTL sira nune’e fo informsaun lolos ba ekipa konjunta PNTL no F-FDTL bainhira hala’o  hela investigasaun ba kazu tiru kilat entre PNTL no F-FDTL iha Postu Administrativu Maliana, Munisípiu Bobonaro.  

“Ami informa situasaun servisu PNTL nian no seguransa ba Prezidenti Repúblika, kona-ba kazu  balun ne’ebé akontese iha semana kotuk,  hanesan kazu Maliana PNTL no F-FDTL ne’ebé iha kilat tarutu no mos iha Igreja Bidau Mota-Klaran, iha ajente PNTL ida halo problema no mos situasuau PNTL nian iha teritoriu Timor Laran tomak,”dehan Komisariu Julio Hornay ba Jornalista sira Kinta (09/08/2018), iha Palasiu Prezidensial Nicolau Lobato, Bairo Pite, Dili.

Nia afirma, konaba kazu  Maliana nian, sira nia parte halo korespondensia ona ho Administrador ne’ebé marka  prezensa iha tempu ne’eba, no ema mak hala’o konsertu, no mos joven sira, atu rekolla imformasaun sira ne’e hotu hafoin halo investigasaun ba membru PNTL no F-FDTL, no agora dadaun iha Dili, komesa bolu ona Komandante no soldadu sira, ajente no sarjentu sira hodi halo investigasaun ne’ebé klean.

“Ha’u fo orden ona ba komandu munisípiu atu informa ba membru  tomak, atu hato’o informasaun hotu  ho onestu, tuir buat ne’ebé akontese iha terenu, tamba iha ne’eba ema barak asisti, diak liu ita onestu hasai informasaun ne’ebé tuir realidade, para depois komandu foti desizaun tuir buat ne’ebé mak akontese duni, no lalika subar informasaun, ida ne’e mak ami-nia ezijensia ba komandu, no ekipa investigasuan informa ona mai ha’u deklarasaun sasin lubuk ida mak  sira foti ona, no sei aumenta tan buka  sasin seluk ba kazu refere,”subliña Julio.Oly