Konflitu iha Moris Foun C, Juventude estrada Leten no Kraik aplika tara bandu

Juventude Aldeia Moris Foun C, Suku Comoro, husi estrada leten no kraik, realiza tara bandu ho tidin ai metan hodi bandu  juventude bairu leten no kraik  ba oin sei laiha tan problema bainhira problema sei selu US$ 200.000 (dozentos mil) ho karau ida ne´ebé kontribuisaun husi komunidade.

Tara bandu ne´e hala´o iha  Ponte Comoro 3, Suku Comoro, Postu Administartivu Dom Alexio, Munisípiu Díli, Domingu (11/8/18).

Ho tara bandu ne´e Juventude sira sei hakruk no kumpri de´it ba lei ne´ebé mak vigora  iha Timor-Leste no  sira sei garante pas  no estabilidade iha bairu laran.

Nune’e buka  kolabora hamutuk  PNTL hO F-FDTL hodi pasa  informasaun ba malu  ba ema sira  ne´ebé mak kria konflitu  hodi fó impaktu ba vida sosiedade.

“Ami garantia  ho  asaun tara bandu ida  ne´e sei la repete fila-fali  problema  konflitu uluk. Tanba  agora dadauk ami haree malu hanesan familia, hanesan viziñu, hanesan mós maun ho alin,  ami laiha  tan ema rua ka tolu, maine ami ida de´it,   estrada de´it mak fahe ami leten no kraik maibe ami lao hamutuk,“esplika   Xefe Juventude estrada leten Deolindo do Rosario Rai-Lakan, ba jornalista sira, iha Ponte Comooro 3 Aldeia Moris Foun C.

Sorin seluk  Xefe Juventude Estrada Kraik, Luis Monis Maia,  ho tara bandu  ne´e nia garante katak, sei laiha tan problema iha bairu estrada leten no kraik.

“Akordu  ne´ebé mak ami  hala’o hodi jura tiha ona katak, sei laiha tan  problema, bainhira se mak la halo tuir akordu juramentu tara bandu  nian nia sei hetan sansaun,“dehan  Luis Monis Maia.

Liu husi juramentu entre juventude estrada leten no kraik  promete ba  futuru sei hamutuk ho lia nain sira hodi aplika sansaun ba ema sira ne´ebé mak halo komflitu ka aktu elesitu sei hetan multa sei selu administrasaun Suku nian duzentus dolar,  nune´e  sei aumenta duzentus mil dolar no karau ida  ne´ebé kontribuisaun husi komunidade.

Atu realiza serimonia ne’e komisaun organizadora ida husi aldeia ne’e tau hamutuk osan dolar amerikanu rihun ida atus hat resin hodi sosan karau no materia sira seluk ne’ebé presiza.

Xefe Suku Comoro Eurico da Costa de Jesus hateten, eventu tara bandu ne’e akontese tanba esforsu komisaun ne’e hodi hala’o  asaun kultural liuhosi mediasaun.

“Konflitu sira mak mosu ami halo mak liu husi asaun tara bandu kultural, depois hamulak tiha husi lia nain sira, foin mak asina akordu

kona-ba asaun dame ne´ebé mak iha no sira konfremete liu hisi ailuluik, no deklarasaun entre Juventude estrada leten no kraik, iha ne´eba sei aplika sansaun para ikus mai labele repete tan  konflitu populasaun sira iha Aldeia Moris Foun C,“dehan  Eurico da Costa de Jesus.

Entretantu, konflitu entre Juventude bairro rua ne’e hahu akontese iha loron rua nulu resin neen fulan Jullu, bainhira sira tebe bola iha area Ponte Komoro tres

Problema ne´e alarga too iha loron rua nulu resin sia fulan Julhu hodi rezulta joven nain hat estrada leten kanek todan.

joven nain hat  ne´ebé mak kanekhanesan João Teodoziuo neebe kanek iha parte ulun suku pontu tolu Jaçinto  Gomes  Pinto no Frederico Nunu Guterres kanek kaman inklui Plinio  Laurindo da Silva  Guterres kanek iha tilun no kotuk laran.

Paritisipa  iha seremonia tara bandu ne´e Autoridade Lokal Comoro, Autoridade Ofisial Polísia Suku Comoro   ho komunidade no bainaka sira seluk tan.avi