2019, tau atensaun espesiál ba F-FDTL no PNTL ■Díli labele iha bandidu ho rama ambon

Ministru Defeza  no Seguransa, Filomeno Paixão, hatete, Ministériu Defeza no Seguransa, planeia ona iha tinan 2019, sei tau  atensaun espesial ba Falintil  Forsa Defeza Timor-Leste (F-FDTL) no Polísia  Nasionál Timor-Leste (PNTL) , atu nune’e F-FDTL hala’o seguransa iha tasi Timor hodi asegura  kadoras ne’ebé  sei dada mai Timor-Leste, no PNTL husi diresaun tránzitu no Polísia Komunitaria atu hala’o kontrolu másimu ba kapital Díli, hodi labele mosu tan kazu krimi entre joven sira.

“Iha elabora orsamentu jeral tinan 2019 nian, atu haree kona-ba Dezenvolvimentu Forsa Armada no PNTL, iha Forsa Armada nian ita tau atensaun espesial ida ba seguransa iha  Mar de Timor (Tasi Timor), kona-ba investimentu ne’ebé sira hala’o iha Costa Sul, no ita iha mos perspetiva atu dada kadoras mai Timor, entaun ita mos tenki hanoin ba oin, oinsa mak  ita fo seguransa ba ita-nia tasi Timor”, dehan Filomeno Paixão ba Jornalista hafoin remata enkontru ho Prezidenti Repúblika, Francisco Guterres ‘Lú Olo’, iha Palásiu Prezidensial Nicolau Lobato Bairo Pite, Díli, Tersa (09-10-2018).

Filomeno  afirma, iha parte PNTL nian halo kontrolu tr’anzitu no Polísia Komunitaria, tantu fo ba fatin rua ne’e tamba atu halo  kontrolu másimu ba kapital, atu iha loron no kalan, tenki kontorladu.

“Díli labele hela ho bandidu sira ho rama ambon, ho ha’u ba tinan ida no rua, Díli tenki kontroladu, depois  Díli hotu sai ezemplu ida, atu nune’e ita komesa estabelese mos orden iha Munisípiu sira seluk”,realsa Ministru Defeza ne’e.

Nia akresenta, nia hasai ona diretiva no forma ona komisaun hotu,  tantu iha Defeza no mos Interior, para depois revé lei no regulamentu ne’ebé tun mai iha parte operasional nian.Oly