MJ aloka USD rihun 100 sosa pistola ba PCIC

Governu liu husi Ministériu Justisa (MJ) aloka ona osan ho montante USD rihun 100 ba Polícia Científico Investigacão Criminal (PCIC), hodi sosa kilat ba membru PCIC ne’ebé hala’o servisu iha baze.

“Dekretu lei númeru 15/2014 ne’ebé altera ba lei núdmeru 21/2014 kona-bá orgánika PCIC iha artigu 20 hateten, PCIC bele uza no lori kilat wainhira halo investigasaun kriminal, maibé kilat ne’e MJ maka sei defini tuir diploma ministerial númeru 33/2017 ne’ebe hetan ona aprovasaun katak, pistola ne’ebé PCIC atu lori ne’e ki’ik ho 9 vezes 19 mm”, Ministru Justisa (MJ), Manuel Cárceres ba GMN iha ninia kna’ar fatin, Colmera-Díli, Sesta (17-05-2019).

Nia esplika, iha diploma ministerial ne’e regulariza mós kona-bá bainhira maka bele utiliza pistola ne’e.

“Sira labele lori kilat tuir sira nia hakarak, tanba iha diploma ministerial ne’ebé sei regulariza sira no wainhira atu ba  ka’er ema ruma maka foin bele uza kilat ba defeza pesoal, tanba sira nia kilat tau fatin mós iha”, dehan Manuel.

Governante ne’e hatutan, akizasaun sosa kilat la’os ilegal, tanba lei fó dalan no servisu PCIC mós liga ho krimi ne’ebé perigu.

“Tuir diploma ministerial 33/2017, artigu 6, servisu PCIC maka hanesan ba ka’er no investiga ema ne’ebé komete krimi organizadu, hanesan krimi kontra paz no umanidade, tráfiku umanu, explorasaun abuzu sexual, asosiasaun kriminoza, tráfiku droga ne’ebé fó risku mós ba sira nia vida, tanba dalabarak sira mai husu orden servisu atu ba ka’er ema ruma ne’ebé perigu, sira uza de’it kakutak, ibun no fiar maka hodi bosok atu nune’e ema bele rende”, relata MJ, Manuel Cárceres.

Entretantu governante ne’e husu ba komunidade tantu sosiedade sivil sira atu labele hamosu polémika kona-bá sosa kilat ou pistola ba PCIC, tanba lei maka haruka no sira mós hanesan polísia ne’ebé treinadu duni atu ba ka’er ema kriminozu sira. ita