Oknum PNTL baku veteranu João Xavier iha Aileu

Oknum membru Polisia Nasionál Timor-Leste (PNTL), halo asaun  agresaun fíziku hasoru veteranu João Xavier ne’ebé nu’udar komunidade afetadu iha aldeia Sari, suku Bandudatu Lausi,postu administrativu Aileu,Munisipiu Aileu.

Sasin Elsa Xavier , fó  sasin, katak akontesimentu iha momentu membru polisia akompaña ekipa interministeria ba foti dadus husi komunidade sira afetadu, iha momentu nee vítima koalia hela ho ninia kolega derepeti deit oknum polisia nee lori stick baku vítima ninia kotuk laran.

  “Hau husu Ministru Defeza no Interior Interinu Filomeno Paixão,konabá seguransa atitude ne’ebé PNTL Aileu halo mai ami povu ki’ik ,wanhira tun ba iha ami nia terenu sempre ho brutalismu ho ameasa makas mai ami ami iha video kompletu ,baku ami nia aman veteranus João Xavier ne’ebé ho idade tinan 68 anos  lori estik fai to’o dada ami nia bin inan feton Fatima to’o monu tun ba rai ida ne’e mak Timor ukun a’an dezenvolve tenki halo ema vitima hanesan ne’e nusa ita la koalia didiak ba malu”, dehan Elsa Xavier  ba Primeiru Ministru Taur Matan Ruak, iha diálogu ho komunidade, Kinta (14/11), iha salaun Administrasaun munisipiu Aileu Vila.

Tuir kronologia ne’ebé konta husi Sasin Elsa Xavier, katak, membru polisia hirak ne’ebé akompaña ekipa interministerial hodi ba foti dadus iha fatin afetadu nune’e vítima ho nia kolega sira seluk sei koalia hela oknum PNTL ida foti stik hodi baku ba vítima nia kotuk.

Hatan ba kestaun ne’e Komandante PNTL Munisípiu, Aileu Jorge Monteiro, klarifika deklarasaun ne’ebé vitíma hato’o ne’e balun lá los, tamba momentu ne’e nia rasik akompaña ho nia membru sira iha terenu.

Jorge Monteiro, esplika wanhira Governu no Estadu hala’o dezenvolvimentu iha rai ida ne’e hodi hetan salva husi ema ne’ebé de’it ne’e krime. Tamba ne’e nia dehan diak liu komunidade koopera ho seguransa hodi nune’e PNTL  fó seguransa ho diak, tamba wanhira komunidade la koopera ne’e ladun diak.

Relasiona ho erru ne’ebé akontese ne’e,Primeiru Ministru Taur Matan Ruak, husu ba komunidade sira iha munisipiu Aileu atu hadomi no respeita pesoal seguransa sira ,tamba sira mak loro-loron fó seguransa ba ema hotu.

Xefe Governu ne’e mós apela ba komunidade sira iha teritóriu laran tomak espesial ba munisípiu Aileu atu koalia ho polisia no F-FDTL sira tenki sukat lia fuan no hanoin didiak wanhira komunika ho sira atu nune’e komunikasaun entre komunidade ho seguransa la’o ho diak.Tos