JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

OPOZISAUN AKUZA AMP-FDD BUKA LUKRU HARII BANGKADA KETAK ■ TENGKI SEPARA PROSESU PARLAMENTAR HO ELEITORAL

OPOZISAUN AKUZA AMP-FDD BUKA LUKRU HARII BANGKADA KETAK ■ TENGKI SEPARA PROSESU PARLAMENTAR HO ELEITORAL

Deputadu bankada opozisaun FRETILIN no bankada Partidu Demokrátiku (PD) iha Parlamentu Nasional (PN), akuza Aliansa Mudansa ba Progresu (AMP) no Frenti Dezenvolvimentu Demokratiku (FDD), tamba harii bankada ketak-ketak iha PN, hodi hetan lukru husi Orsamentu Jeral Estadu.

Deputadu Antoninho Bianco husi bankada FRETILIN hateten, iha kampaña eleitoral, partidu PUDD, UDT, FRENTI Mudança (FM), PDN deklara-an ida de’it hodi manan povu nia votus, maibé hetan tiha konfiansa husi povu, ida-idak hakarak la’o ketak.

“Tanba ne’e atu harii bankada iha Parlamentu Nasional ne’e, tenki bankada AMP, labele fahe fali ba bankada tolu atu hetan saida? Ida ne’e tanba Prezidenti tolu sei mosu no Vise Prezidenti 6 sei mosu iha AMP, saida mak sei fó impaktu ba povu, tanba ida ne’e iha relasaun ho pozisaun no osan iha laran,” relata  Antoninho Bianco iha plenária PN, Kinta (21/06).

Tanba ne’e, Antoninho Bianco dehan, FRETILIN nia hakarak mak tenki harii bankada tuir rezultadu ne’ebé mak Tribunal Rekursu fó sai ona mak hanesan, AMP, FRETILIN, PD no FDD.

“Ita labele mai tanba oportunidade, ita hakarak aproveita Estadu, tanba bankada harii ne’e, konsekuensia ba Orsamentu Jeral Estadu. Governu imi reprezenta bar-barak ona, agora kria fali estrutura bar-barak iha AMP iha Parlamentu Nasional hodi hetan lukru,” lamenta Antoninho Bianco.

Deputadu FRETILIN ne’e dehan, agora mai tiha iha Parlamentu Nasional, koligasaun sira ne’e hakarak la’o ketak-ketak fali ne’e lalos ona.

“Dehan katak, FDD desolvidu, entaun partidu tolu ne’ebé mai iha Parlamentu Nasional ne’e, reprezenta se? se reprezenta UDT, sistema bareira ne’e UDT ultrapasa ka la’e, hanesan mós FM, entaun ida ne’e povu bele dehan, imi ba ho naran seluk, mai Parlamentu ho naran seluk,” lamenta Antoninho Bianco.

Lee hotu :   PM TAUR SIMU RELATORIO HOSI GOVERNASAUN ALKATIRI

Nia haktuir, AMP mós iha kampaña la’os temi CNRT mak manan, ka PLP no KHUNTO mak manan, maibé bandeira AMP ho figura oi-oin ne’e mak manan.

Alende ne’e, deputadu Adriano do Nascimento husi bankada Partidu Demokratiku husu ba deputadu nain tolu husi FDD atu esplika, tanba saida mak sira fahe malu iha Parlamentu Nasional.

“Se FDD disolvidu hodi fahe malu ba tolu hanesan, UDT, FRENTI Mudança ho PUDD, maibé kestaun primeiru kona ba bareira, no kestaun segundu oinsa ho PDN nia votus, tanba votus FDD ne’e la’os mai de’it husi partidu tolu, maibé PDN nia votus mós tama iha ne’eba,” relata Adriano.

Entretantu, deputadu António de Sá Benevides afirma, PUDD prefere liu atu diskuti povu nia nesesidade, la’os atu diskuti interese partidu ida-idak nian.

Maibé António de Sá Benevides dehan, tanba deputadu sira preokupa tebes ho situasaun FDD nian ne’e, nia tenki halo klarifikasaun.

“Ami nia karta husu disolusaun ba FDD ne’e, ami manda mós ba Tribunal Rekursu, iha karta ne’e, Prezidenti nain hat ho Sekretáriu Jeral partidu sira no komisaun polítika nasional FDD nian, ami hotu asina no ami hotu konkorda atu halo disolusaun ba FDD,” katak António Benevides.

Tanba ne’e, António dehan, kazu ida ne’e la sai polémika iha FDD nia laran, no ema ida la foti kestaun katak, FDD ne’e partensia ba PUDD, UDT, FM ka PDN nian.

Nia esplika, reprezentasaun FDD iha Parlamentu Nasional ne’e, PDN la tama, maibé PDN mós konkorda atu disolve FDD.

Hatan ba kestaun ne’e, Prezidenti Parlamentu Nasional, Arão Noe, esplika, direitu atu konstitui ne’e, direitu bankada ida-idak ninian.

Lee hotu :   PM Alkatiri atribui deviza kapitaun ba Cristiana ho Emilia •Lori aviaun Cessna T207A ba Oecusse, Suai ho Lospalos

“Ita labele foti desizaun ida, tanba rejimentu hateten klaru ona katak, ida ne’e kompetensia partidu ida-idak nian ne’ebé hetan asentu Parlamentar, ita labele liga fali ba lei eleitoral mai fali Parlamentu nia rejimentu, tanba ida ne’eba prosesu eleitoral nian, ida ne’e prosesu Parlamentar nian,” esplika Arão.cos

Add to Comments Here!!!!

error: Content is protected.
Secured By miniOrange
You might also like:
SOMOTXO REKOÑESE AVIAUN F-FDTL PARA DE´IT

Ministru Defeza no Seguransa, José Agustinho...

ALKATIRI SEI LA PARTISIPA SERIMONIA POSSE MEMBRU VIII GOVERNU

Primeiru Ministru sesante,  Mari Alkatiri  sei...

HAMETIN RELASAUN BILATERAL, EMBAIXADOR 6 ENTREGA KREDENSIAL BA PR

Ministru Negosiu Estranjeiru no Kooperasaun (MNEK),...

Close