JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN kansela viajen PR Lú Olo ba Nova Iorke ■ PD lamenta PPN vota kontra

PN kansela viajen PR Lú Olo ba Nova Iorke ■ PD lamenta PPN vota kontra

Parlamentu Nasionál (PN), kontinua la autoriza Prezidente Repúblika (PR), Francisco Guterres ‘Lú Olo’ hala’o vizita Estadu ba estranjeiru, tanba seidauk iha solusaun ba asuntu improtante rua promulgasaun Orsamentu Jeral Estadu (OJE) 2018 ho pose ba membru governu balun ne’ebé seidauk kompletu.

Pedidu viajen Prezidente Repúblika (PR) Francisco Guterres ‘Lú Olo’ ne’ebé atu hala’o vizita traballu ba estranjeiru kontinua la pasa iha Parlamentu Nasionál (PN) tanba maioria deputadu ho votus kontra 33, a favor 25 no abstensaun 0.

Liu hosi sesaun plenaria ho lian português ne’e, deputada PLP, Maria Angelina Sarmento, argumenta, viajen Xefi Estadu nian ne’e importante, maibe la’os momentu oportunu, tanba asuntu prioridade rua ne’ebé nu’udar responsabilidade Xefi Estadu nian, seidauk iha solusaun.

“Asuntu prioridade rua ne’ebé sai responsabilidade Prezidente Repúblika nian, primeiru mak pose ba membru governu balun ne’ebé seidauk simu pose, segundu mak promulgasaun Orsamentu Jeral Estadu (OJE) no ita hotu hatene katak, iha fim fulan Setembru saldo tezouru mós lato’o ba viajen PR no sustenta mákina Estadu, tanba ne’e tuir ha’u-nia hanoin, kooperasaun bilateral no multilateral ho instituisuaun internasional sira importante tebes, maibe ba momentu ida ne’e la oportunu,”hateten deputada bankada PLP, Maria Angelina Sarmento iha plenaria Tersa (18/09/2018).

Deputada AMP ne’e afirma tan, viajen PR nian sei diskute hikas, bainhira pozisaun PR nian loos ona OJE 2018 ne’ebé inklina mós ba viajen PR nian.

“Ami hakarak hatene, PR nia pozisaun konaba promulgasaun OJE ne’ebé PN aprova ona iha semana kotuk, tanba orsamentu ba PR mós inklui iha OJE ne’e, inklui mós viajen PR nian, ita sei diksute konaba viajen PR nian ba rai liur, maibe ita tenke hatene uluk, PR nia pozisaun konaba aprovasaun OJE 2018,”katak Angelina Sarmento.

Lee hotu :   PN hein pedidu Tribunal ba levatamentu imunidade Kalbuadi ■MP tenki kontinua investiga Kalbuadi

Alende ne’e, deputadu bankada FRETILIN, Joaquim dos Santos, dehan, Prezidente Repúblika ezerse nia funsaun tuir konstituisaun, no sei lakon osan saugati, bainhira PN impede viajen ne’e, tanba servisu protokolu nian feitu ona.

“Parlamentu la autoriza vizita ne’e, halo problema bo’ot ho despeza ba viajen, faktu hanesan uluk ne’e, kuandu Parlamentu la autoriza  PR nia vizita ba Portugal, lakon sentu e tal mil dollar, agora tan, PR iha ona nia planu programa viajen ne’ebé feitu, se kuandu Parlamentu impede pakote vizita ne’e, ita halo problema bo’ot, lakon tan osan bo’ot iha ne’e, labele hanoin promulga ka la promulga orsamentu 2018 ne’e, maibe impedimentu vizita PR ne’e, kria hela marjen para lakon osan bo’ot, tanba servisu protokolu ba Prezidente Repúblika feitu hotu tiha ona,”esplika deputadu Joaquim dos Santos.

Enkuantu, pedidu viajen PR nian ne’e haruka ba PN ho pakote, ne’ebé hahú husi  fulan Setembru to’o Dezembru, tinan ne’e.

Ho ajenda dahuluk husi loron 21, fulan Setembru to’o 3 Outubru PR Lú Olo hetan konvite husi Sekretariu Jeral Organizasaun Nasoens Unidas (ONU) António Guterres, hodi partisipa 73a sesaun asembleia jeral ONU, inklui simeira Dame Nelson Mandela no enkontru bilateral seluk.

No ajenda daruak nian, husi loron 7 to’o 10 fulan Outubru, atu halo vizita ba Australia, hodi hametin lasu amizade entre Australia ho Timor-Leste, konvida husi Governador Australia Peter Cosgrove.

Loron 11 to’o 14 Outubru nian, hetan konvite husi Prezidente Repúblika Guinea Equatorial atu partisipa iha selebrasaun loron proklamasaun independensia Guinea nian ba 50, nu’udar nasaun maun alin.

Ajenda husi loron 28 to’o 1 Novembru, Xefi Estadu Lú Olo mós hetan konvite husi PR Indonesia, Joko Widodo, hodi paritisipa iha Bali forum, no iha loron 17 to’o 26 Novembru nian, PR hetan mós konvite santidade Papa Francisco nian, ne’ebé igreza katólika ne’ebé luta Timor-Leste nia libertasaun.

Lee hotu :   PM Taur : Laiha obstáklu iha atividade esplorasaun

Xefi Estadu nia ajenda ikus liu mak atu halo dezlokasaun ba Maroko, iha loron 7 to’o 14 fulan Dezembru, hodi partisipa enkontru altu nível global ne’ebé konvida husi Skeretariu Jeral ONU António Guterres.

Antes ne’e, Parlamentu Nasionál mós la aprova ajenda viajen Xefi Estadu Francisco Guterres Lú Olo nian, ne’ebé atu ba Portugal iha loron 9, fulan Jullu, tinan ne’e.

PD lamenta PPN vota kontra

Nune’e mos, Xefi bankada Partidu Demokrátiku (PD), Adriano do Nascimento, lamenta ho aktu Prezidente Parlamentu Nasional (PPN), Arão Noe, ne’ebé vota kontra mós proposta vizita Estadu Prezidente Repúblika (PR), Francisco Guterres ‘Lú Olo’, ba Estadu Unidu Amérika (EUA) ne’ebé sei halo iha fulan ida ne’e.

“AMP vota kontra no ha’u lamenta teb-tebes, deputadu sira seluk bele vota kontra, mas kuandu PPN mós vota kontra vizita Estadu PR ne’e maka ha’u lamenta, hanesan polítiku jerasaun foun tristi teb-tebes, tanba PPN la’os de’it PPN, maibé lider órgaun soberanu, segundo homem iha nasaun ida ne’e,” Xefi bankada PD ba jornalista sira hafoin remata votasaun asentimentu deslokasaun PR ba EUA, iha uma fukun PN, Díli, Tersa (18-09-2018).

Nia esplika, loloos PPN vota abstensaun de’it, tanba sé PPN no PR vota kontra malu ne’e tristeza boot ida, tanba deputadu sira seluk bele exerse ninia direitu vota kontra, maibé PPN pelumenus abstensaun.

“Ita hotu hatene katak PR ida agora dau-dauk ne’e labele ba vizita nasaun liur dala rua ona, demokrásia sim, mais sentidu Estadu, ita iha prosesu konstrusaun Estadu, ita satan no hatu’un malu de’it, ha’u senti sai problema boot iha ita nia nasaun,” haktuir Adriano do Nascimento.

Lee hotu :   Harii KIP investiga projetu anterior

Nia akresenta, PPN vota kontra PR nia viajen ne’e signifika fila kotuk ba malu hela no husi aktu ida ne’e sei hamosu efeitu, tanba ema númeru 1 no númeru 2 iha nasaun de’it mós kontra malu, sá sidadaun sira seluk.

“PPN la’os prezidente AMP, PPN é segundo homem ou orang kedua iha nasaun ida ne’e, sé sira nain rua maka vota kontra malu, ha’u hanoin ne’e lamentavel teb-tebes. Ha’u fiar katak efeitu husi lider sira fila kotuk ba malu sei iha, tanba tuir lo-loos PPN no PR ne’e akomoda malu, pelumenus abstensaun, tanba sira nain rua maka kontra malu ona, entaun ki’ik oan sira ne’e kontra malu to’o hotu,” afirma Xefi bankada PD ne’e.

Tuir deputadu bankada CNRT, Patrocinio Fernandez, konsidera PPN, Arão Noe nia votu kontra viajen PR Lú Olo ne’e, la’os votu husi PPN nian, maibé ne’e votu hanesan deputadu husi CNRT nian.

“Ha’u hanoin PPN em prinsipiu nia deputadu ida, votu ne’e la’os votu PPN ninian, maibé ida hanesan deputadu husi bankada CNRT ninian, tanba PPN ne’e prosesu halo eleisaun iha PN, para depois eleze PPN para fasilita dirizi meja. PPN nia votu ne’e reprezenta desizaun polítika, tanba nia deputadu ida, ne’ebé ninia votu ne’e votu deputadu nian, la’os PPN, tanba PPN ne’e para jere meja, mais ninia votu ne’e do deputadu,”relata deputadu CNRT ne’e.say/ves

Add to Comments Here!!!!

error: Content is protected.
Secured By miniOrange
You might also like:
TL hahú jornada orsamental 2019, PM Taur lakohi haree korrupsaun

Maske distinu Orsamentu Jeral Estadu (OJE)...

FRETILIN promete aprova lei anti korupsaun ■TL susar kombate subornu estranjeiru

Atu kombate prátika Korupsaun, Koluzaun no...

Komunidade Aldeia Terus Na’in la hetan Bee Moos tinan 3 ona

Komunidade aldeia Terus Na’in, suku Vila-Verde,...

Close