JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Hakotu impase polítiku, PR Lú Olo hakarak diálogu

Hakotu impase polítiku,  PR Lú Olo hakarak diálogu

Prezidenti Repúblika (PR), Francisco Guterres ‘Lú Olo’, hateten, nia parte halo ona reflesaun sériu hodi deside hakarak halo diálogu ho líder polítiku sira seluk hodi buka solusaun ba impasse polítiku ne’ebé akontese iha rai laran.
Xefe Estadu koalia lia hirak ne’e iha selebrasaun Natál hamutuk ho funsionáriu no membru Konselho Estado iha Salaun Xina, Sesta (28/12/2018), iha Palásiu Prezidensial, Bairo-Pite, Díli.
Lú Olo mos rekoñese, durante nia mandatu hasoru dezafiu oi-oin, primeiru dezafiu maka konstrusaun Estadu direitu Demokratiku no dadaun ne’e maka afirmasaun ba Estadu Direitu Demokratiku.
“Antes ne’e hau dehan dezafiu boot liu ba hau durante hau nia mandatu ida ne’e maka konstrusaun do Estado de Direito Democrático, ohin Natál hamutuk ida ne’e atu lori ita ba halo reflesaun, ha’u bele hateten fila fali katak, dezafiu la’os ba konstrusaun do Estado de Direito Democrático, maibe dezafiu ba afirmasaun do Estado de Direito Democrático la dok malu husi liafuan ida uluk ha’u dehan, maibe ida uluk nudar sekuensia mos ida seluk nian”, hatete Lú Olo.
Prezidente Repúblika ne’e dehan, ita harii ona Estado ida ne’ebé ita bolu naran Estado de Direito no direito para sai demokratiku, harii Estadu ida husi vontade kolektiva povu tomak nian ne’ebé mai husi luta naruk ida, no vontade ida ne’e manifesta liu husi rezistensia ida ne’ebé kleur, rezistensia ida ne’ebé mai husi kustus oi-oin, finalmente ho orgulho konsege duni fila fali ita nia liberdade ida ne’e hodi harii Estadu ida ho ita hotu nia vontade kolektiva.
Veteranu FALINTIL nee hatutan, hafoin simu posse iha loron 20 Maio 2017 nia rasik iha konsiensia rasik, katak dezafius barak sei akontese, maibe prezidenti fiar metin ba nia an, fiar ba povu ida ne’e, prezidenti mos fiar ba orgaun soberano sira seluk, katak hamutuk bele fo liman ba malu bele hakat liu dezafiu sira ne’e hotu hodi lori ita nia povu sai povu ida no sai nasaun ida duni ho nia maneira moris rasik.
Lú Olo hautan bainhira assume dezafiu ida ne’e hanesan dezafiu kolektivu xefi Estadu fiar katak sei bele hakat ba oin, bele ultrapassa ka hakat liu dezafiu oi-oin ne’ebé maka mosu, dezafiu ne’ebé loron kalan hasoru hela nafatin ou satan netik ita nia moris, satan netik ita nia hahalok, satan netik ita ema nia vontade atu bele hakat liu, no Prezidenti Repúblika iha konsiensia kona ba ida ne’e.
Nune’e Prezidenti Repúblika dala barak liu iha hanoin atu oinsa ita atu bele hetan dalan diak, mas dala ruma mos atu hakat liu, Prezidenti Repúblika mos tenke hola desizaun, desizaun para bele ultrapassa situasaun ne’ebé satan ita nia dalan para halo fali buat foun ida hodi halibur nafatin para hakat hamutuk, realmente ida ne’e duni maka Prezidenti Repúblika halo iha ninia mandatu to’o agora. Dezafiu oi-oin, maibe Prezidenti Repúblika mos iha konsiensia katak se bainhira hasoru dezafiu oi-oin, dezafiu simplesmente hanesan halo teste ba própria kapasidade prezidenti para oinsa hodi bele hanesan Xefi Estadu para hakat ba oin.
“Koalia ida ne’e, hau hakat tama ba hau nia própria rezilensia, reziliensia ho sentidu ida atu bele halo reflesaun ba ha’u nia an rasik, oinsa Chefe de Estado bele serbisu hodi lori Estado ida ne’e ba oin. Reziliensia no sentidu ida iha Creatividade, iha dificuldade nia laran, oinsa maka atu bele kreativu hodi bele hetan solusaun ba problema sira ne’ebé afeta ita nia rain no ba ita nia povu. Liu husi reziliensia ida ne’e ha’u halo reflesaun badak, reflesaun seriu no ha’u hetan dalan ida deit ba ha’u, dalan maka diálogu, dalan diálogu diak liu para ita atu bele hetan solusaun ba problema, laiha dalan para tuku malu, laiha dalan para insulta malu ninian, laiha dalan seluk ida, maibe dalan maka diálogu para ita koalia ba malu”, dehan PR Lú Olo.
Lú Olo dehan diálogu ne’e hanesan instrumentu ida, diálogu ne’e para evita husi extremo ida ba fali sorin para bele hola dalan klaran ho sentidu hodi hetan solusaun. Maibe, tuir Xefi Estado mos diálogu la’os solusaun, maibe diálogu ne’e hanesan dalan, meius, instrumentu ida maka atu bele hetan dalan ida ne’e maka vontade resiliente, ne’ebé Prezidenti Repúblika nian iha para la’o tuir, maibe buka solusaun ba problema ne’e iha ninia kontextu rasik.
Lider masimu nasaun ne’e fó hanoin katak Mundu tomak iha problema, la’os iha Timor-Leste deit maka hetan problema, mundu tomak hasoru hela dezafiu boot ida kona ba demokrasia ninian, no Timor-Leste hetan demokrasia iha ninia kontextu rasik, hanesan iha kontextu iha konstrusaun do Estado de Direito Democrático no iha kontextu de afirmasaun do Estado de Direito Democrático nian.
Tuir Lú Olo iha kontextu ida ne’e maka ita buka solusaun ba problema, kada problema sidi ita nia ain ba no hot-hotu halai hamutuk para buka solusaun ba problema hodi hasai netik fatuk ne’ebé iha ita nia dalan hodi hakat ba oin.
“Ha’u hein deit vontade husi maluk sira hotu, maun sira, alin sira ne’ebé maka iha para ita hotu hamutuk, kria kondisaun diak atu hakat ba oin hodi lori ita nia rain ba dalan diak atu bele fo fila fali esperansa ba povu ida ne’e, hau lakohi povu nia fiar lakon. Iha ha’u nia ulun hau hanoin maka ami katuas sira ne’e sei husik hela buat diak ba jerasaun foun sira atu bele banati tuir”, termina PR Lú Olo. Mia

Lee hotu :   Mandatu iha RAEOA besik remata, Alkatiri: Ha’u sei ko’alia ho PM atu kontinua ka la’e

Add to Comments Here!!!!

error: Content is protected.
Secured By miniOrange
You might also like:
GRANDE ENTREVISTA, Loron-27 Fulan-Dezembru Tinan-2018, Asuntu: KNAR FOIN SA’E PROCESSO KONSTRUSAUN ESTADO

JORNAL NACIONAL GMNTV KALAN, Loron-27 Fulan-Dezembru Tinan-2018

JORNAL NACIONAL GMNTV MEIU DIA, Loron-27 Fulan-Dezembru Tinan-2018

Close