Auto-estrada Suai nakfilak ba Lagoa

Deputada bankada Frente Revolucionario do Timor-Leste Independente (FRETILIN), konsidera auto-estrada Suai liga Zumalia ne’e hanesan Lagoa ida, tanba kuandu iha tempu udan, bee sa’e, hodi hakonu auto-estrada refere, nune’e difikulta teb-tebes movimentasaun transporte ne’ebé ba mai, tanba la hetan dalan atu liu.

“Iha dia 22 Dezembru 2019, depois de ita remata debate OJE 2019, tuku 3 oras Timor-Leste, ha’u aranka husi ne’e (Díli-red), ha’u liu husi auto-estrada tuku 7 ho balun estrada laiha, tanba bee sa’e estrada no sai hanesan lagoa boot ida, entaun dezenaraska ha’u ta’uk, ha’u tenki manda motorista fila-fali, liu fali dalan públiku bai-bain”, deputadu bankada FRETILIN ne’e liu husi ninia intervensaun polítika, iha primeira plenaria iha tinan 2019, Segunda (07-01-2019).

Nia akresenta, Governu tenki toma atensaun la-lais, tanba auto-estrada ne’ebé liga Suai ba Zumalai ne’e, iha kilometru 13 partensia ba suku Matai ho suku Labarai, aldeia Hol-Belis ninian, dau-daun ne’e arame sira ne’ebé maka dada hodi sátan animal tama ba auto-estrada ne’e populasaun no mota komesa sobu dau-dauk ona.

“Liga ba kestaun auto-estrada, iha kilometru 13 partensia husi suku Matai ho suku labarai, aldeia Hol Belis, arame sira ne’ebé maka dada hodi sátan netik animal sira, ne’e populasaun no mota mós sobu dau-dauk ona, entaun animal libre tama estrada laran, ida ne’e fó perigu ba ema ne’ebé maka uza auto-estrada, maibé bai-bain ami Suai oan foti kestaun ida ne’e iha PN para loke dalan alternativu ba komunidade asesu, maibé laiha realizasaun”, haktuir Alexandrinho Cardoso.

Nia hateten, dau-daun ne’e foin maka udan loron hira de’it auto-estrada sai hanesan Lagoa ona, kuandu udan semana tomak ida, saida maka atu akontese ba auto-estrada ne’e, tanba ne’e parte kompotente tenki toma atensaun.

“Ha’u hanoin auto-estrada ne’e bele estraga, ita lakon osan boot, maibé ita lakoi haree di-diak, lakoi buka para prevene buat sira ne’e, ita husik hela de’it, kuandu át total gasta osan boot, tanba ida ne’e husu nafatin para Governu bele toma atensaun ba kestaun ida ne’e”, informa deputadu bankada FRETILIN ne’e.

Entretantu iha loron 17, fulan Novembru, tinan 2018 ne’e, Ministru  Óbras Públikas (MOP), Salvador Pires ho Ministru Estadu Prezidénsia Konsellu Ministru (MEPKM), Agio Pereira, inaugura primeira auto-estrada suai liga ba Fatukai, Zumalai ho nia naruk kilometru 30.3, gasta orsamentu USD ho montante 304.000. ves