JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

CNRT krítika MP la halo akuzasaun hasoru autoridade RAEOA

CNRT krítika MP la halo akuzasaun hasoru autoridade RAEOA

Foto:Facebook

Bankada CNRT iha Parlamentu Nasionál krítika maka’as servisu Ministériu Públiku (MP) nian ne’ebé la halo akuzasaun hasoru autoridade Rejiaun Administrativa Espesiál Oecusse-Ambeno (RAEOA), maske Tribunal de Contas hasai ona relatóriu ofisial katak, iha infrasaun finanseira ne’ebé komete husi autoridade RAEOA rasik.

“Parsialidade hatudu hosi laiha inisiativa Ministériu Públiku ba rezultadu auditória RAEOA/ZEESM ho Câmara das Contas katak iha infrasaun finanseira milhões dolares ne’ebé komete hosi Autoridade RAEOA/ZEESM iha ezekusaun orsamentu tinan 2014-2015. Klaramente iha rekomendasaun lubuk-ida iha ne’ebá, faktus hatudu momos katak, laós deit sufisiente ba melhoramentu jestaun finansas no administrasaun projetu ZEESM nian, maibé priense ona rekijitus atu Ministériu Públiku atu halo akuzasaun,”dehan Veneranda Lemos Martins iha plenária PN, Segunda 19/02/2019, hodi avalia servisu MP nian durante ne’e.

Membru orgaun lejislativu dehan tan, relatóriu Câmara de Contas ne’ebé haruka diretamente ba iha PJR, PN no PM ho rekomendasaun katak, depois de simu tiha relatóriu ida ne’e, instituisaun kompetente tenke halo implementasaun. Signifika katak, Ministériu Públiku tenke halo ona investigasaun ba iregularidade hirak ne’ebé haktuir iha relatóriu Câmara das Contas sobre orsamentu RAEOA/ZEESM. Instituisaun hirak ne’e tenke implementa ona tuir idak-idak ninia knaar konstitusional. Maibé to’o agora, infelismente, ita seidauk rona buat ruma.

Nia dehan tan, relatóriu Câmara das Contas ba RAEOA/ZEESM tinan 2014-2015, hatudu projetos ho valor hamutuk 28.9 milhões de dolares, seidauk tán ho orsamentu 2016-2018 ne’ebé mak fó ona prejuízu maka’as ba osan Estadu nian, tanba autoridade halo deit ajudikasaun direita, preço de marcação (hasa’e folin), prátika kolusaun, nepotismo no korrupsaun.

Kontinua dehan tan, relatóriu Câmara das Contas ba RAEOA/ZEESM públika iha sira-nia website, ne’e akontese tanba haktuir mandatu Lei N.º 9/2011 de 17 de Agosto sobre Orgânica da Câmara de Contas do Tribunal Superior Administrativo, Fiscal e de Contas, artigu 7 ponto 2 katak, “A Câmara de Contas pode ainda decidir a difusão dos seus relatórios através de qualquer meio de comunicação social, após comunicação às entidades interessadas”.

Lee hotu :   PD promete dezenvolve industria masin Manatuto •Promove sentru Marmore

Ne’e signifika katak, invenção auditória Câmara das Contas ba RAEOA/ZEESM ba ezekusaun orsamentu tinan 2014-2015 halo ona publikasaun iha website formal, ema barak hatene no ema barak mós asesu tiha ona, nune’e laiha violasaun ba segredu justisa nian.

Nia dehan tan, uluk angariasaun fundus ba partidu CNRT iha tinan 2012 ne’ebé Prokuradora Ana Pessoa selebra investigasaun bazeia deit ba notísia iha Jornal, bele konsidera ona hanesan aktu kriminal ida maske laiha keixa ruma. Maibé Câmara das Contas públika ofisialmente nia relatóriu katak iha violasaun grave iha RAEOA/ZEESM ba ezekusaun orsamentu 2014-2015, maibé Ministéiru Públiku la halo buat ida. Ami-nia pergunta ba Prokuradór-Jeral da Repúblika mak ne’e, ita boot sira halo ona saída ba relatóriu Câmara das Contas ida ne’e? Ami hein resposta husi PJR.

Ida ne’e laós interferénsia, maibé parte hosi fiskalizasaun Deputados nian tuir kna’ar iha artigu 92, Konstitusaun RDTL. Tanba-ne’e, Bankada CNRT sei la admite. Ami hakarak afirma hikas katak, ami kontinua fó apoiu Maun Bót Xanana, no sei halo inisiativas hotu-hotu hodi salva osan Estadu nian.

Iha deklarasaun politika CNRT nian ne’e hatete Prokuradór-Jerál Repúblika rasik mak halo violasaun ba segredu justisa nian, tanba fó informasaun ba Presidente-da-Repúblika, devia nia labele fó informasaun ba Presidente-da-Repúblika ba kazu ne’ebé sei iha prosesu investigasaun nia laran sobre Membru VIII Governo indijitadu nain-hitu. Maibé, bazeia ba informasaun hosi Prokuradór-Jeral, halo Presidente-da-Repúblika la tetu didiak normas no regras constitusionais tuir prinsípios “presunção de inocência” no mós “separasaun poderes” nu’udar objetivu fundamentál ita-nia Estadu Direitu Demokrátiku.

Karik iha problema ruma ho Justisa, Konstituisaun iha nia mekanismu rasik ne’ebé prevê ona, katak Governu ne’e responde ba Parlamentu Nasional, karik iha kazu krime ho kastigu ka pena ruma ho tempo la to’o tinan-rua, mak “tenki autoriza hodi suspende mandatu ne’e”.

Lee hotu :   CNE lamenta Parpol lakumpri Paktu Unidade Nasional

Bankada CNRT mos preokupa ho servisu Prokuradór Jerál Republika (PJR), tanba PJR no Majistrada laiha koñesimentu klean ba kódigu presesual.

Deklarasaun politika bankada CNRT nian iha Parlamentu Nasional nebe le husi deputada Veneranda Lemos Martins haktuir katak Polémika karta Presidente Partidu CNRT Maun Boot Kay Rala Xanana Gusmão ba Prokuradór-Jeral da Repúblika (PJR) komesa hatudu konaba hun hosi problema lolo’os ne’e iha ne’ebé.

CNRT identifika problema lolo’os mak falta koñesimentu servisu prokuradoria nian hodi envia karta la tuir prosedimentu legal, no prosesu administrativas normal iha servisu investigasaun nian.

Bankada CNRT hare’e momos katak, PJR no Majistrada laiha koñesimentu diak ba código prosesual iha sira-nia liafuan no asaun rasik, katak sira lahatene duni diferénsia entre notificação núdar acto judicial no carta de informação núdar acto konsiderasaun ida.

“Ami sente triste tebes ho declarações hosi autór da Justiça hirak ne’e, tanba Estado lakon osan lubuk ida ona hodi investe ba Instituisaun Judisiária sira iha área de capacitação, maibé infelismente hatudu momo’os ba ita katak kapasidade hosi órgaun judisiária, espesialmente, Prokuradoria-Geral da República tenke hetan tán atensaun maka’as liu hosi avaliação técnica jurídica ne’ebé mak rigorozu hosi Inspetores do Ministériu Públiku. Situasaun ida ne’e, ejiji inspetores do Ministériu Públiku ida ne’ebé mak iha kualidade ás no esperiénsia maka’as, hodi nune’e ita bele hadiak diak liután Agentes do Ministériu Públiku nia kapasidade hodi fornese justisa ne’ebé nakonu ho kualidade ba povo, no nasaun doben Timor-Leste,”dehan Veneranda.

Deputada ne’e dehan tan, karta ida ne’ebé mak haruka ba iha Xanana núdar karta notifikasaun hosi Ministériu Públiku, laós karta informasaun ida.

“Ami hakarak dehan katak, karta Maun Boot Xanana ba PJR, laós karta interferénsia ba poder exclusivo Ministériu Públiku nian, maibé hanesan karta reklamasaun no protesta sidadaun ida ho naran Kay Rala Xanana Gusmão ba iregularidade prosesual ne’ebé mak komete hosi ajente Ministériu Públiku. Tanba-ne’e mak, Bankada CNRT bele konsidera karta ba Maun Boot Xanana núdar acto de perseguição política hosi Magistrada do Ministério Público,”  dehan Veneranda Lemos.

Lee hotu :   SEJT halo Inspeksaun Sentru Formasaun Tibar

Nia hatutan tan razaun hirak ne’e mak Maun Xanana kualidade hanesan Prezidente Partidu ka ema ne’ebé simu karta notifikasaun halo protestu ba PJR núdar superior hierarquico Ministériu Públiku nian. Além de ne’e, husu atensaun ba PJR konaba iregularidade seluk ne’ebé fó ona prejuizu maka’as ba osan Povu nian tuir relatóriu Câmara das Contas.

Nia dehan tan foin dadaun ne’e, Prokuradór-Jerál da Repúblika rasik rekoñese katak, aktu haruka karta ba Maun Boot Xanana ne’e kontra lei, la tuir Código Processo Penal, maske nune’e, PJR sei konsidera hanesan buat baibain deit. Hanesan órgaun judisiáriu deklarasaun ne’e tendisiozu, liafuan ne’e lolo’os labele sai hosi prokuradór ida nia-ibun ne’ebé mak iha ona experiénsia barak servisu iha área ida ne’e.

Veneranda hatete tan preokupasaun Presidente CNRT iha fatin duni, hanesan Povu no foti parte iha dezenvolvimentu instituisaun ida ne’e, labele husik sé deit, inklui prokuradór-ida atu impoin ninia interese iha sistema justisa. Aktu Prokuradora manifesta ninia personalidade la imparsial no la independente tanba uza Ministériu Públiku hodi deskredita líderes Partidu CNRT liuhosi kna’ar sagradu ne’ebé Povu deposita ba nia.

Konaba deklarasaun polítika CNRT nian ne’e, Jornalista JNDiário tenta halo komfirmsaun ba PJR José Ximenes, maibe tuir informasaun husi gabinete PJR hatete katak PJR halo hela vizita trabalho ba rai liur. Maske nune’e antes ne’e PJR José Ximenes hatete katak, kona ba haruka karta notifikasaun ba Prezidente CNRT Xanana Gusmão, ne’e la tuir lei, maibe hanesan fo ba atu nune’e Prezidente CNRT bele fo atensaun ba Sekretariu Jeral CNRT, Francisco Kalbuadi Lay, atu bele ba hatan iha justisa kona-ba deskonfia involve iha kazu brankeamentu capital.Nes

Add to Comments Here!!!!

error: Content is protected.
Secured By miniOrange
You might also like:
SEFOPE sei kansela traballador kriminozu ba rai-liur

Sekretáriu Estadu Formasaun Profisional no Empregu...

HABURAS VIDA ESPIRITUAL GMNTV, Edição 67 Versão Português

HABURAS VIDA ESPIRITUAL GMNTV Edisaun 66

Close