FRETILIN apresenta relatoriu KIP ba MP

Bankada FRETILIN hato’o relatóriu Komisaun Inkéritu Parlamentár (KIP) nian, ba Ministériu Públiku (MP), hodi halo investigasaun ba violasaun sira ne’ebé identifikadu iha relatóriu KIP nian iha projetu 143.

“Bankada Parlamentár FRETILIN hato’o ona ba Ministériu Públiku kona-bá, relatóriu komisaun inkeritu Parlalmentar (KIP) hodi husu MP atu halo investigasaun ba violasaun hasoru lei no regras ne’ebé vigora iha TL, ne’ebé identifikadu husi KIP,  ba projetu 143”, hateten Vise Xefe bankada FRETILIN, Francisco Miranda Branco ba jornalista Kuarta (28/08/2019), liu husi konferensia ba imprensa iha PN.

Branco afirma tan, Bankada FRETILIN mós preokupa maka’as ba rezultadu husi KIP, ne’ebé presiza halo investigasaun ba faktus hotu ne’ebé iha, relasiona ho projetu 143, ne’ebé governu ajudika direta, antes realiza eleisaun jerál tinan 2017.

“Iha karta ba Prokurador Jerál da Repúblika, José Ximenes, deputadu sira bankada FRETILIN nian, tanba haree faktus sira ne’ebé mak KIP detekta, hanesan aktu ne’ebé halo ona violasaun grave ba TL nia lei aprovizionamentu. Hafoin tetu buat hirak ne’e hotu, FRETILIN iha dever bo’ot hodi husu MP atu halo investigasaun kle’an atu nune’e bele hatene lolo’os sala ne’e iha ne’ebé, no semak iha responsablidade ba aktu sira ne’e, no investigasaun ne’ebé di’ak liu ne’e tenki mai husi MP atu nune’e , iha futuru mai sala sira hanesan ne’e labele repete tan”, tenik Deputadu opozisaun FRETILIN ne’e.

Iha sorin seluk, Xefe Bankada CNRT, Duarte Nunes akresenta, tuir lolo’os, relatóriu KIP  ne’e sei konfedensial, tanba ne’e seidauk bele públika maibé, bankada FRETILIN hakarak uza dadus ne’e hodi halo keixa ba MP ne’e, direitu bankada ida-idak nian

“Atu halo keixa ruma mak informasaun hotu ne’ebé ita hato’o ne’e, MP sei investiga tuir, tanba ne’e bankada  CNRT laiha direitu atu impede ema nia direitu ne’e, importante atu fó sai ba públiku katak, relatóriu ne’e la fó sai ba públiku tanba tuir regras ne’ebé iha, komisaun halo relatóriu no Parlamentu halo apresiasaun, depois mak halo rezolusaun de’it”,dehan deputadu AMP ne’e.

 Antes ne’e, Prezidente Parlamentu Nasionál deklara ona relatóriu KIP ne’e sumba, tanba relatóriu KIP ne’e la lori ba iha plenária hodi halo apresiasaun, tanba  la konsege aprova iha komisaun tuir tempu ne’ebé determina ona iha rejimentu Parlamentu Nasionál nia.say