Deside halo remodelasaun, FRETILIN: VIII Governu laiha kapasidade

Vise Xefi bankada Frente Revolucionário do Timor-Leste Independente (FRETILIN), Francisco Miranda Branco, konsidera, partidu koligasaun Aliansa Mudansa ba Progresu (AMP) deside halo remodelasaun, tanba VIII governu laiha kapasidade.

“Ita hotu akompañia no haree, povu rasik mós akompañia halo avaliasaun ba kapasidade VIII governu ida ne’e, povu rasik sinti laiha kapasidade, razaun dala barak ami hateten ona problema boot liu poder informal, komandu husi kotuk poder informal sai fator hamenus kapasidade governu ida ne’e ni’an”, Vise Xefi bankada FRETILIN ne’e ba GMN iha PN, Tersa (19-11-2019).

Reprezentante povu ne’e, informa, bainhira mosu tiha remodelasaun no atu forma fali governu, membru partidu FRETILIN sei la hola parte iha estrutura ne’e.

“Iha balun dehan falta membru governu ou inkompletu, maibé Xefi governu rasik deklara maski VIII governu la’o ho roda tolu, di’ak hela, ida ne’e la aselera hotu-hotu nia espetativa, ami nia haree la’os ida ne’e maka determina, maibé determina iha fator seluk poder informal husi liur maka trava prosesu sira ne’e hotu”, tenik Francisco Branco.

Hatán ba kestaun ne’e, Vise Xefi bankada Congresso Nacional Reconstrução de Timor (CNRT), Patrocinio Fernandes, hateten, AMP halo remodelasaun la haree ba tempu, maibé  haree ba servisu membru governu sira ni’an ne’e atinji metas ka la’e.

“Ita rekoñese ho probema ahi mate, laiha fasilidade iha ospital, ita presiza enkontru no halo avaliasaun, buat balun ne’ebé ita presiza atu kuriji tenki kuriji, ho avaliasaun servisu VIII governu ne’e, bele hadi’a di’ak liu tan servisu governu ni’an hodi atinji metas no benefísiu ba povu ka la’e, posibilidade bainhira AMP halo remodelasaun, inklui partidu seluk, ha’u labele fó komentáriu desizaun prosesu kona-bá remodelasaun oinsa seidauk ida ne’e polítika, tanba ne’e, kona-bá modelu remodelasaun, AMP seidauk deside oinsa remodelasaun bele iha administrasaun polítiku, postura governu remodelasaun la haree ba tempu, maibé la haree ba servisu atinji metas ka la’e, ne’e parte avaliasuan servisu”, tenik Patrocinio.

Antes ne’e, iha Sábadu, loron 16, fulan ne’e, AMP halo konferensia nasional daruak iha Sentru Formasaun Tibar-Liquiça no husi konferensia ne’e, AMP deside sei halo remodelasaun no redusaun ba orsamentu Jeral Estadu (OJE) tinan 2020.