JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Impase polítiku kontinua eziste, PN: Líder sira mak arogante lakohi halo diálogu

Impase polítiku kontinua eziste, PN: Líder sira mak arogante lakohi halo diálogu

Deputadu bankada Partido Democrático (PD) iha Parlamentu Nasionál (PN), Mariano Assanami Sabino konsidera, Timor-Leste kontinua la’o moris iha impase polítiku, tanba líder partidu polítiku sira ne’ebé povu fó fiar hodi ukun arogante no laiha kapasidade no responsabilidade atu halo diálogu.

“Atu rezolve, ita labele hein fulan oin ka tinan oin mai, ne’e líder sira hatudu jestaun la di’ak, impase polítiku sei iha inserteza nia laran, tanba nia fukun mai husi kapasidade líder sira, nune’e líder sira tenke leno-an iha responsabilidade ne’ebé povu fó konfiansa hodi fó nia votus, tanba ukun ne’e povu ni’an, ita boot sira uza hanesan arogante ne’e sala”, deputadu bankada PD ne’e ba jornalista sira iha PN, Segunda (13-01-2020).

Ho impase polítiku ne’ebé kontinua iha inserteza nia-laran, Assanami husu ba povu karik vota labele haree ba istória, kolega, emosaun ka sentimentu, maibé vota ba oan sira-nia moris di’ak no konstrusaun Estadu direitu demokrátiku.

“Ha’u sempre dehan atu halakon liafuan exelensia, lia ida ne’e halo ita destinji ita ukun, tanba empresta husi povu, podér iha ita diferente ho povu, loloos ne’e hanesan deit ho povu, ita servisu sai servidór duni, povu fo konfiansa atu kumpre ita-nia promesa ba povu. Impase polítiku iha inserteza nia-laran, maske ohin loron bele la gosta malu, maibé povu hili, ita tenke iha responsabilidade, to’o agora seidauk debate hodi monu fali explorasaun ba ema homen por homen. Ita adora ema no seluk tan, hodi lakon responsabilidade serve povu, demokrásia la’o ho situasuan ne’ebé explora homen por homen, sentimentu istória gosta ka la gosta malu, demokrásia tenke la’o iha level rasionalidade diskusaun”, afirma deputadu bankada PD ne’e.

Lee hotu :   HUGO REJEITA PN KO’A SALÁRIU DEPUTADU BA MANUTENSAUN PRADO

Nune’e mós, deputadu Partido Libertação Popular (PLP), Sabino Soares “Guntur”, hateten, governu aprezenta ona Orsamentu Jerál Estadu (OJE) 2020, maibé membru governu seidauk kompletu, ne’e fó impaktu ba  prosesu dezenvolvimentu nasional, liu-liu ba povu nia moris di’ak.

“Sé mak atu responsabiliza ba situasaun ida ne’e, mak Primeiru Ministru   (PM), Prezidente Repúblika (PR), loloos ne’e sira tenke tau prioridade ba kestaun ne’e, hanesan eis Prezidente Repúblika, José Ramos Horta, hateten, impase polítiku kontinua iha inserteza nia-laran, tanba sala husi Xefe Estadu no husi VII Governu konstitusionál, to’o ohin loron la’os la’o hamutuk konspirasaun ne’ebé mak lori husi liur mai, hodi soran ita-nia líder sira, ida ne’e mak sai problema nia-hun ba implikasaun. Karik membru governu na’in 9 ne’ebé komete kazu ruma iha tribunal, Xefe Estadu iha kompeténsia sujere hodi halo anorasaun, la’os foti desizaun hodi impede, tanba parte ne’ebé iha kompeténsia julga sidadaun sira mak tribunal. Sira komete duni kazu ka la’e, loloos ne’e Xefe Estadu iha dever no obrigasaun atu asegura estabilidade nasionál, sistema governativa no integridade sosiál”, afirma Guntur.

Entretantu, lista kandidatu governu da-ualu ba PR, Francisco Guterres “Lú Olo”, maibé kandidatu na’in 9 mak Xefe Estadu rezeita, tanba husu AMP atu pondera mak, José Turquel, Sergio Lobo, Virgilho Smith, Amandio Benevides, Helder Lopes, Jacinto Rigoberto, Tomas Cabral no Francisco Kalbuadi Lay, ho António Verdial ne’ebé rejigna-an tiha ona husi lista refere.

Alende ne’e, kandidatu rua seluk, hanesan Kay Rala Xanana Gusmão ho Alfredo Pirez mós deside la simu pose, tanba fó solidariedade ba kandidatu na’in 9 ne’e.

PLP: Responsabilidade veteranu nian tanba sira mak ukun

Lee hotu :   CNE aprova ona partidu koligasaun AMP, FDD no MDN

Deputadu Partidu Libertasaun Popular (PLP), Sabino Soares Guntur, hateten, impase polítiku ne’ebé to’o agora kontinua eziste iha Timor-Leste, nu’udar responsabilidade veteranu sira nian, tanba  dadaun ne’e veteranu mak kaer ukun, hanesan Prezidente Repúblika, Francisco Guterres Lú Olo, ho Primeiru Ministru, Taur Matan Ruak rasik.

“Sira nu’udar veteranu, depois Prezidente Repúblika mós, nasaun ne’e agora sira mak ka’er, tanba ne’e responsabilidade moral sira nian, tanba sa mak sira halo desizaun ida ne’e ba rai ida ne’e nia vida, ne’e sentidu katak, sira ne’e laiha responsbailidade moral hotu, sira mai husi veteranu, tuir loloos  sira-nia responsabilidade moral ba povu ne’e nia vida, se karik Prezidente Repúblika ka Primeiru Ministru ka se de’it mak foti desizaun sala, ne’e ema ne’ebé laiha responsabilidade ba Estadu no povu ida ne’e nia vida, labele halimar  Estadu nia vida, labele halimar ho povu nia vida”, tenik Guntur ba jornalista iha PN, Segunda (13/01/2020)

Kona-bá asuntu remodelasaun, deputadu AMP ne’e konsidera asuntu prioridade ne’ebé tenke implementa, maibé presiza konsentra uluk ba diskusaun OJE ba tinan 2020, nu’udar asuntu urjensia.

“Ita haree asuntu ida-ida, remodelasaun ne’e importante liu para atu konsolida instituisaun Estadu nian, liu-liu membru governu pendente sira, ida ne’e presiza rezolve, para bele reforsa tan ba sistema, tanba ne’e mak remodelasaun ne’e mós haree ba kestaun sira ne’ebé mak la’o ladun di’ak, ministru sira ne’ebé laiha kapasidade, laiha responsbailidade, maibé agora dadaun ne’e ami sei fokus liu ba diskusaun orsamentu jerál Estadu, depois mak haree kestaun seluk. Se CNRT hakarak remodelasaun uluk ne’e kestaun métodu, maibé agora ne’e ita haree uluk lai buat ne’ebé urjensia liu, tanba fulan Juñu ou Jullu mak foin Governu halo tinan rua, tanba ne’e sei tempu para atu hasa’e prosesu dezenvolvimentu, maibé antes ne’e tenke halo remodelasaun, hodi haree ba membru governu sira ne’ebé mak laiha kapasidade, laiha vizaun no responsabilidade moral”, Sabino realsa.

Lee hotu :   PR Lú Olo: Timor la’os iha krize polítika, maibe krize lideransa

Antes ne’e, eis Prezidente Repúblika, José Ramos Horta deklara, impase polítiku kontinua eziste, tanba hun mak Prezidente Repúblika ne’ebé lakohi fó posse ba kandidatu membru governu na’in 9 ne’ebé sei pendente hela.

Nune’e, deputadu FRETILIN, Francisco Miranda Branco rejeita deklarasaun ne’e, tanba konsidera, impase ne’e responsabilidade polítiku hotu ne’ebé ka’er ukun, no nia hun mak arogansia polítika.Ety/say

Add to Comments Here!!!!

error: Content is protected.
Secured By miniOrange
You might also like:
Oan Soru: Verifikasaun dadus veteranu paradu tanba hein OJE 2020

Sekretáriu Estadu ba Asuntu Kombatente Libertasaun...

PD: Traballadór sira labele kontinua moris ho saláriu mínimu

Atu dignifika traballadór sira ne’ebé kontribui...

MAP monta GPS identifika peskadór no ró ilegál iha Tasi Mane

Ministru Agrikultura no Peska (MAP), Joaquin...

Close