MEJD sei halo adenda foun ho Embaixada Portugal

Ministra Edukasaun Juventude no Desportu (MEJD), Dulce de Jesus, hateten, Ministériu Edukasaun sei halo adenda foun ho Embaixada Portugal iha Timor-Leste, hodi fasilita viajen profesor portugés sira, ne’ebé sei hanorin iha Centro de Aprendizagem Formação Escolar (CAFÉ).
“ Presiza halo avaliasaun externa ne’ebé sei lori tempu naruk, entaun ami halo hela adenda to’o agora tanba husi Portugal seidauk haruka karta mai”, informa MEJD, Dulce de Jesus, ba Jornalista sira tersa (24/09/2019) iha Vila-Verde Dilí.
Ministra haktuir, oras ne’e dau-dauk husi Portugal halo ona selesaun ba profesores português sira ne’ebé iha interese, atu kontinua hanorin iha eskola Café iha Timor hamutuk 12 inklui Regiaun Administrativa Espesial Oe-cusse Ambeno (RAEOA).
Nia dehan, tinan-tinan profesor sira ne’ebé hanorin iha eskola Café sira mai Timor iha fulan Marsu, entaun tinan ida ne’e MEJD hakas an atu profesores sira mai sedu ho nune’e Ministériu husu atu Embaixada fo lista naran profesor sira ne’ebé atu mai iha tinan 2020 hodi prosesa sira nia viajen.
“ Inisiu anu letivu ita iha ona profesores sira iha eskola Café, atu nune’e labele akontese tan hanesan tinan hirak liu ba profesor sira sempre to’o iha Timor tarde, entaun iha fulna Outubru nia laran Ministériu bele sosa bilhete profesor sira ne’ebé hakarak mai Timor,”hatete nia.
Dadaun ne’e profesores português hamutuk 140 mak hanorin iha eskola Café iha Munisipu 12 inklui RAEOA, ho total estudantes hamutuk 7000, no tuir planu iha tinan 2020 aumenta tan profesores, tanba estudante sira iha ona klase desimu primeriu ano maibé depende ba Embaixada Portugal. Fel