PN husu MS kontrola aimoruk herbal fa’an online

Deputadu komisaun F ne’ebé trata asuntu saúde nian, iha Parlamentu Nasionál (PN), António Verdial husu Ministériu Saúde (MS) atu kontrola aimoruk herbal sira ne’ebé fa’an online, tanba bele fó impaktu ba ema nia saúde, bainhira konsumu la tuir regras.

Deputadu komisaun F ne’ebé toma konta kona-bá saúde, seguransa sosial ne’e informa, tempu badak, komisaun F sei ko’alia ho parte kompetente, hodi kria regras rigorozu ruma.

“Iha tempu badak komisaun F sei tau atensaun no ba iha futuru komisaun F sei buka meius oinsa atu hamosu sistema ida, hodi regulariza sistema hirak ne’ebé la’o latuir regras”, hatete deputadu Verdial ba jornalista sira iha PN, Segunda (18/11/2019).

Maske nune’e, deputadu husi bankada KHUNTO ne’e rekoñese, seidauk iha regras ruma hodi kontrola, maibé iha tempu badak sei buka meius atu hadi’ak sistema ba importasaun aimoruk iha rai, liu-liu meius online ne’ebé dadaun ne’e.

“Klaru katak, komisaun F sempre hala’o nia kna’ar, iha  operasaun, em marsa nafatin iha territóriu tomak. Iha informasaun mós komisaun F simu, komisaun F aguarda, no informasaun hirak ne’e sai referensia ne’ebé kmanek atu iha futuru komisaun F bele halo sistema ida hodi  bele regulariza situasaun sira ne’e hotu”, tenik Verdial.

Reprezentante povu ne’e hato’o informasaun ne’e, tanba dadaun ne’e, iha aimoruk herbal barak mak fa’an husi utilizadór média sosial sira, liu husi meius online, sem liu husi estudu ka teste laboratóriu ruma ba aimoruk refere.say