Responsável veteranu juramentu iha semitériu herois Metinaru

Ekipa responsável klandestina, sei halo juramentu iha semitériu herois Metinaru, antes atu halo verifikasaun ba dadus veteranu sira nian.

Prezidente Komisaun Homenajen, Virgílio Smith ‘Karanik’ hatete,ekipa responsável klandestina 170 sei tuir formasaun kona ba estatuto Kombatentes Libertasaun Nasional nian, no halo mós juramentu iha semitériu herois Metinaru, nune’e prosesu verifikasaun refere bele la’o ho justu no moos.

Virgílio Smith  hato’o asuntu ne’e, liu husi komfrensia imprensa iha edifísiu Sekretariadu Estadu Kombatentes Libertasaun Nasional Kaikoli Díli horseik.

 “Husu ba verteranus kombatentes libertasaun nasional, hahú fulan ne’e ekipa komisaun ne’ebé komisaun homenagen estabelese ona atu mai tuir formasaun kona ba lei estatuto kombatentes liberatsaun nasional nian, atu dekor artigu sira ne’e, nune’e wanhira halo verifika dadus bazea estatuto ne’ebé iha tiha ona, alende ne’e ekipa sira ne’e mõs sei halo juramentu iha semetériu heroe Metinaru, nune’e halo verifikasaun dokumentu bele lao los ho justu,” katak Virgilio.

 Virgílio  Smith haktuir,  hahú loron 14 fulan ne’e, ekipa responsável sira sei halo verifikasaun ba dadus veteranus ne’ebé rejistu iha tinan 2009 to’o agora, ne’eduni husu ba veteranu hotu ne’ebé mak seidauk rejistu bele halo rejistu ona tuir ida-ida nia Munisípiu,  liu husi ida-idak nia responsavel zona nurep no selkom sira.

Nune’e mós Sekretáriu Estadu Kombatentes Libertasaun Nasional, Zil da Costa Monteiro “Oan Soru” hatete, juramentu ne’e parte ida atu ekipa responsável sira bele hala’o servisu ho los no justu tuir prosediamentu ne’ebé iha.

 “Juramentu ne’e la’os foin mak halo maibé, dala barak ema barak mak halo, ne’ebé la’os buat foun, ne’eduni juramentu ne’e parte ida atu halo servisu tuir estatutu kombatentes haruka, alende ne’e atu prevene falsifikasaun dokumentus ruma, ne’eduni bainhira detekta veteranus balun ne’ebé halo falsifikasaun ba dokumentus ruma, sei bolu ekipa responsável ne’ebé verifika dokumentu ho veteranus ne’ebé simu subsídiu husi Estadu sei ba hatan iha tribunal tuir lei ne’ebé previstu ona.aba