Vítima inséndiu 199 husi munisípiu 4 hetan ona apoiu emerjensia

Sekretáriu Estadu Protesaun Sivil Alexandrino da Costa Xavier, hatete, inséndiu  ne’ebé  akontese iha Munisípiu haat hetan ona apoiu emerjensia.

“Dezastre ne’ebé akontese iha munisipiu 4 Ermera,Liquisa,Aileu no Bobonaro  neste momentu dadus atual hamutuk  572 husi dadus refere ita apoiu emerjensia ona  199 no sei kontinua iha levantamentu dadus husi autoridade lokál sira husi munisipiu hodi kontinua fó apoiu emerjensia.Apoiu ne’e iha tipu 2 ida mak apoiu emerjensia hanesan fós,mina,ikan lata no supremi ,lona no sanan no ida seluk apoiu rekoperasaun ka rekonstrusaun. Ahi han ho eskala bo’ot nune’e presiza mós ministériu saúde ,tamba balun afeta hodi moras ,ahi suar no kanek ne’e presiza tratamentu  konaba kauza insendiu ne’e SEPS servisu hamutuk ho PNTL no SEMA atu kontrola ema sunu rai ,tamba ne’e krime ambiental  ,tamba ne’e husu ba komunidade sira atu labele sunu rai arbiru,tamba  oras ne’e bai loron naruk nune’e diak liu kuda ai oan atu bele prezerva ita nia futuru ba oin ,tamba sira bele prezerva be’e ba ita nia oan no bei oan” Sekretariu Estadu Protesaun Sivil hato’o asuntu ne’e ,hafoin partisipareuniaun Konsellu Ministru  iha Palasiu Governu,Kuarta (09/10).

Tuir dadus Sekretáriu Estadu Protesaun Sivil dezastre inséndiu ne’ebé akontese iha Munisipiu Ermera,  Liquisa,Aileu no Bobonaro  hamutuk uma kain atus lima hitu nulu resin rua no husi númeru referidu iha uma kain atus ida sia nulu  resin sia mak hetan ona apoiu emerjensia husi Governu no Cruz Vermelha Timor-Leste.

Sekretáriu Estadu Protesaun Sivil Alexandrino da Costa Xavier, hatete, ajudu ho tipu emerjensia ne’ebé Governu liu husi Sekretáriu Estadu Protesaun Sivil fahe ona ba vítima inséndiu hirak ne’e mak hanesan, fós, mina,ikan lata , supremie ,lona no sanan.

Sekretáriu Estadu Protesaun Sivil kontinua hala’o levantamentu dadus ba vítima inséndiu ne’ebé akontese iha Munisípiu sira no hein dadus husi autoridade lokál sira husi Postu Administrativu,Sukus no Aldeias.

Alexandrino da Costa Xavier ,apela ba populasaun iha teritóriu Timor laran tomak ,atu labele sunu rai arbiru ,maibé tenki kuda ai oan hodi haburas rai nudar parte ida husi prevensaun mudansa klimátika.Tos