Selebrasaun tinan 30 vizita Papa João Paulo II mai TL, PR Lu Olo agradese Igreja Katólika-juventude rezistensia sira-nia brani

Estadu Timor-Leste (TL), selebra tinan tolu nolu (30), Papa João Paulo II vizita TL iha loron 30 fulan Outubru tinan 1989 iha Tasi-Tolu Díli, ne’ebé iha momentu ne’eba TL sei sai hanesan provinsia ida husi Indonézia.

Iha selebrasaun ne’e, Prezidente Repúblika, Francisco Guterres Lu Olo,  hato’o nia agradesimentu ba Igreja Katólika no Juventude rezistensia sira, ne’ebé iha momentu ne’eba hatudu sira-nia brani, hametin rezistensia kultural, iha vizita Papa João Paulo II nian ne’e.

 “Tinan 30 kotuk liu ba, santu padre João Paulo II mai Timor-Leste, nu’udar misionáriu ida mós atu habelar solidariedade no fraternidade, nia misaun mai Timor-Leste mak hodi haree no rona rasik povu  Timor-Leste nia lian halerik no hakarak, no iha tempu ne’eba maioria povu hili tiha on relijiaun katólika, liu husi misaun espesial ne’e, faze foun ida hahú iha ita-nia luta ba independensia”, dehan Prezidenti Repúblika iha nia intervensaun ba selebrasaun loron Jubileu Extraordinariu no tinan 30  Papa João Paulo II nia vizita mai Timor-Leste,  iha Tasi-Tolu, Díli Kuarta (30/10/2019).

PR Lu Olo senti haksolok Igreja Katólika, tanba hori uluk kedas Igreja Katólika organiza juventude sira ho brani hodi organiza manifestasaun públika hasoru okupasaun indonézia, maske iha situasaun ne’ebé manas tebes maibé, Igreja no juventude sira hatudu brani no determinasaun.

“Papa nia vizita mak dada jornalista husi rai oin-oin mai  Díli, sira nia filme hatudu violénsia husi tropa indonézia, hodi dada atensaun husi komunidade internasional ba povu Timor-Leste nia halerik no hakarak rasik. Ha’u aproveita lori naran Estadu Timor-Leste nian ha’u hakarak agradese  mós ba Igreja Katólika, ne’ebé ajuda hametin ita-nia kultura rezistensia kultural durante tinan 25, no fó mós mahon no naroman ba sarani sira. Agradese mós ba juventude sira ne’ebé habrani aan, iha tinan 30 liu ba, iha fatin istóriku ida ne’e, no la para habrani aan to’o ita restaura ita-nia independénsia iha tinan 2002 liu ba”, subliña PR Lu Olo.

Igreja husu povu respeita fatin santuáriu Tasi-Tolu

Entretantu, Prezidente Konférensia Episkopal , Bispu Dioseze Maliana, Dom Norberto Amaral , husu ba povu Timor-Leste atu tane aas nafatin , fatin istóriku no santuáriu Tasi-Tolu.

“Selebrasaun ne’e atu hanoin fila-fali vizita São João Paulo II iha ita-nia rai doben Timor-Leste (TL), ida ne’e,  tan ida ne’e ita agradese tebes ba Nai Maromak nia tulun, mudansa hodi lori mai ita to’o ohin loron ida ne’e, agradese ba nai ulun sira ba sivíl ho militar sira. Fatin ida ne’e fatin sagradu  fó hanoin mai ita hotu katak, fatin ida ne’e ho nia história rasik,  ne’eduni ita soi duni hodi agradese hodi buka tane lisuk ita-nia rai doben ida ne’e”, katak Dom Norberto Amaral iha nia homilia wanhira prezidi misa iha Tasi-Tolu.

Fatin Tasi-Tolu ne’e hetan vizita primeiru , husi Papa Saun João Paulo II , iha loron 12, fulan Outubru , tinan 1989, wainhira Timor Leste sei sai pronvísia ida husi Indonézia.

Atu relembra , momentu istóriku ne’e , iha Kuarta, loron tolu nulu  fulan Outubru ne’e, sarani sira husi Dioseze Maliana , Baucau no Díli  selebra misa , Jubeleu Extraordinária misaun kreda nian, no komemora tinan 30 vizita amu Papa João Paulo II mai Timor-Leste.

Dom Norberto Amaral afirma, fatin vizita São João Paulo II ne’e sai sagradu ona no fó hanoin hikas mai Timor-oan sira, tanba iha nia história rasik.

Prezidente Konférensia Episkopal  ne’e husu nafatin ba sarani katólika TimorLeste , reza no agradese ba Nai Maromak atu tulun nafatin rai ida ne’e, atu sai susesu nafatin iha futuru.oly/tos