JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Projetu manutensaun sentral elektrika 2, Puri Akraya fó karta protestu ba Estadu TL

Projetu manutensaun sentral elektrika 2, Puri Akraya fó karta protestu ba Estadu TL

Kompañia Puri Akraya ne’ebé Governu foti desizaun hodi hapara nia husi projetu manutensaun sentral elektrika Betano no Hera, hodi fó fali projetu ne’e ba kompañia Wartsila, fó karta ba Parlamentu Nasionál (PN), hodi husu PN atu bolu atensaun ba Governu tetu didi’ak desizaun ne’ebé mak foti ona.

Antes ne’e, deputadu sira mós levanta kestaun ne’e iha plenária katak, kontratu ba projetu manutensaun sentral elektrika rua ne’e hateten katak, kuandu kontratu sei la’o hela mak iha mudansas ruma, no la konsidera kompañia ne’ebé mak hala’o hela projetu manutensaun ne’e, kompañia ne’e bele lori Estadu TL ba tribunal internasionál, no Estadu TL ameasadu selu multa US$ 5 milloens.

“Komisaun E semana kotuk simu tan karta ida husi kompañia Puri Akraya, ami husu nafatin ba Governu atu bele tetu ho didi’ak ba, tanba ne’e kompetensia imi nian,” informa Manuel de Castro iha plenária PN, Segunda (24/04).

Nia hatutan, karta ne’ebé mak sira simu ne’e, sei diskuti hamutuk iha komisaun E, no sei aprezenta ba Prezidenti PN hodi hatene.

“Ami husu nafatin ba Governu ho seriu, ho atensaun, kuidadu tebes ho sasan sira ne’ebé mak iha, liu-liu ba Mega Projetu sira ne’ebé mak iha,” katak Manuel de Castro.

Alende ne’e, Prezidenti Parlamentu Nasionál, Aderito Hugo da Costa husu ba Sekretáriu Estadu Asuntu Parlamentar  atu hato’o iha Konsellu Ministrus  hodi Governu bele hatene kompetensia ida-idak nian.

Aderito Hugo dehan, PN fó ona nia hanoin hotu ho rekomendasaun ida konkreta ba Governu, tanba desizaun ne’e iha Governu nia liman.

“Tanba ne’e mak Parlamentu Nasionál hato’o ninia rekomendasaun ba Governu atu iha desizaun ba prosimu jestor ba manutensaun ne’e, tenki ho kuidadu no rigor. Se ita halo desizaun sala, obra investimentu bo’ot ne’e bele infrenta obstaklu,”katak Aderito Hugo.

Lee hotu :   Manutensaun ba sentral elektrika 2, PN husu Governante kuidadu ho dezisaun

Aderito dehan, di’ak liu esplika klaru de’it ba setór privadu sira karik prosesu ruma seida’uk hotu, labele hateten fali dehan, hein karta husi PN.

“Membru Governu sira fó esplikasaun ba sira nia parseiru setór privadu sira ne’e, hatene kompetensia apropriadu sira nian. Ezemplu, sei dehan atu halo desizaun mak hein fali karta husi Parlamentu Nasionál, ne’e ha’u senti ladun los ona karik,” lamenta Aderito.

Antes ne’e, Manuel de Castro mós hateten katak, desizaun Governu nian hodi hapara kompañia Puri Akraya atu fó fali ba kompañia Wartsila, Governu ameasadu atu selu multa US$ 5 milloens ba kompañia Puri Akraya.

“Ami haree iha kontratu ne’e hateten katak, enkuantu kontratu ne’e la’o hela, Governu labele halo buat ida. Se karik kompañia ida mak halo tan, Governu tenki kona multa, tanba ne’e mak ami fó hanoin de’it, keta halo ita kona tan multa hanesan iha 2013, ita selu ba kompañia internasionál ida ne’ebé halo ita nia portu Hera. Karik ida ne’e mak akontese ba kompañia Puri Akraya atu lori ba tribunal, no ba mak nia manan, entaun ita tenki selu ba kompañia ne’e US$ 5 miloens,” relata Manuel de Castro ba plenária Parlamentu Nasionál Segunda (10/04) liu ba.cos

Add to Comments Here!!!!

error: Content is protected.
Secured By miniOrange
You might also like:
SERVE fo ona lisensa negosiu ba Regal Kasino

Servisu Rejistu Verifikasaun Emprezarial (SERVE) fo...

Manutensaun ba sentral elektrika 2, PN husu Governante kuidadu ho dezisaun

Parlamentu Nasionál (PN) bolu atensaun ba...

PN preokupa negosiante Chines barak loke kios iha TL

Prezidenti bankada Partidu Demokratiku (PD), Adriano...

Close