Lere rekoñese nia oan Boby sala ■ Oknum PNTL lori duni kilat iha kareta laran

Xefe Estadu Maior Forsa Armadas FALINTIL Forsa Defeza Timor-Leste (F-FDTL), Major Jeneral Lere Anan Timur, rekoñese  asidente tráfegu akontese foin lalais hodi soke mate ema ida no nain hat kanek todan, tanba  nia oan Boby mak sala.

“Asidente iha Bimori ne´e ha´u la nega, ha´u  nia oan sala, sala agora investigasaun seidauk, ha´u nu’udar nia aman hatene nia sala, tanba nia kontra kódigu estrada, dala ruma lanu tan,“esplika Xefe Estadu Maior Forsa Armada F-FDTL Major Jeneral Lere Anan Timur, Kinta (03/05/18), liu  husi konferensia imprensa iha Kuartel Jeral PNTL Díli. Tanba  ne´e, Lere dehan, nu’udar aman ida prontu lori nia oan nia sala.

“Maibe ha´u bele dehan katak, imi mós komprende ha´u nia oan duni, maibe  la´os ha´u mak hakiak, konsekuensia funu nia moris  iha fulan nen   ema haketak  husi inan aman ba tinan 30 iha Indonesia ema mak hakiak,  fo han batar ka fehuk  ita lahatene, agora nia komete ona sala ha´u labele nega ha´u-nia oan, ha´u-nia oan nafatin bele krimi to´o iha ne´ebé mós ha´u-nia oan nafatin, hanoin de´it mak saida mak justisa nian lori ba justisa, saida mak ami familia nian ami rezolve,“dehan Lere Anan Timur.

Nune´e asidente tráfegu  refere, Lere Anan Timur dehan, iha duni kilat kaer husi oknum PNTL iha kareta Ford Ranger laran.

“Horseik ema dehan lori kilat, Polísia ida mak lori kilat tuur  iha laran, ida ne´e Komandante mak la kontorola nia ema sira ne´e mak kilat ne´e lao tun arbiru de´it, mas aban  ne´e sai lisaun ona ba komandante nain rua ne´e, se mak bele lori kilat ba liur, se mak la lori,“ dehan Lere Anan Timur.

Entretantu   kareta  ne´ebé mak Boby kondus Ranger metan  ho sapa matrikula  29-121 TL   soke  bus Vitoria  dirasaun  Dili Baucau, hodi rezulta   Brigida Moreira ho idade Lima Nulu hakotu is no nain haat kanek todan submete  ona ba  prosesu investigasaun iha seksaun Investigasaun Tranzitu Munisípiu Díli.

Kazu  ne´e akontese Tersa (01/05/18) tuku  rua, madrugada iha area  kruzamentu Audian diresaun Bemori no tun ba diresaun Eskola Paulo Sestu Dili.

Vitima sira  ne´ebé mak kanek oras   ne´e  hala´o hela tratamentu iha Hospital Nasional Guido Valadares (HNGV).

Hafoin akontesementu Polísia Unidade Tránzitu to´o kedas iha  fatin hodi halibur dadus no lori kareta Ranger no bus Vitoria ba Komando Munisípiu Díli.

“Imi labele temi fali lider F-FDTL ninia  oan, maibe ita temi de´it si A ka B mak  involve asidente tráfegu ita  labele temi  fali lider F-FDTL nia oan, nia aman  la sala ida, bainhira oan mak halo sala responsabiliza rasik,“dehan Julio Hornay.

Tuir konstituisaun RDTL kona ba defesa no seguransa nasaun nian, iha artigu Artigu 146.(Forsa Armada sira), 1. Forsa Armada Timór-Leste nian, FALINTIL-FDTL, ne’ebé sidadaun nasionál de’it maka halo parte, ne’e mak responsavel ba defeza militár Repúblika Demokrátika Timór-Leste nian no nia organizasaun nu’udar ida mesak ba territóriu nasionál tomak; 2. FALINTIL-FDTL garante independénsia nasionál, integridade territoriál, liberdade no populasaun nia seguransa hasoru agresaun ruma ka ameasa externa, ho respeitu ba orden konstitusionál; 3. FALINTIL-FDTL labele iha partidu polítiku no rona de’it ba órgaun soberanu kompetente sira, tuir Lei-Inan no lei, no sira labele halo intervensaun polítiku naran; no artigu 147. (Polísia no forsa seguransa sira); 1. Polísia sei defende legalidade demokrátiku no garante sidadaun sira-nia seguransa internu, maibé sira labele iha partidu polítiku; 2. Prevensaun kriminál tenke hala’o ho respeitu ba direitus umanus; 3. Lei maka sei harii rejime ba polísia no mós forsa seguransa seluk.avi