PNTL husu Oecusse-oan lalika tauk ■ Hetan ameasa kesar lalais

Komandante  Polisía Nasionál Timor-Leste (PNTL), Munisípiu Dili, Superintendente Xefe, Pedro Belo husu ba Oecusse-oan  sira  ne’ebé hela iha kapital Dili labele tauk ho ameasa.

Pedro Belo mos husu ba Oecusse-oan sira atu informa lalais ba PNTL, bainhira hetan ameasa husi ema deskoñesidu sira.

“Ha´u hateten ba Oecusse-oan sira keta  tauk, imi tauk sira bele  terror nafatin. Ne´e duni lalika tauk ho sira, sira mós han etu, imi mós han etu,  sira mós hemu be, imi mos hemu be, ne´ebé ba  ne´ebé de´it la’o ba. Hanesan ha´u fó sai ona,  kuandu buat ruma akontese liga lalais urjenti ita mós responde urjenti kedas,“esplika Superintendente Xefe, Pedro Belo,  ba  GMN Sesta (25/05/18)  iha KuarteL PNTL, Caicoli Díli, relasiona ho kazu ema baku labarik minoridade Oecusse-oan sira iha Raikotu.

Pedro Belo dehan, kazu  ema halo agresaun fíziku hasoru labarik Oecusse oan sira iha Raikotu,  Polisía   investigasaun tun kedas  iha fatin akonetsimentu hodi bolu ona vítima nain hat  ho testamuña  balun fó ona sira nia deklarasaun, auto notisia kompletu ona, ekipa investigasaun haruka  ona ba  iha Ministériu  Públiku hodi  bele  promove ba Tribunal bele hetan mandadu detensaun.

“Ita tempu ne´e ami seidauk bele book-an, maibe agora ami halo identifikasaun de´it, tanba  iha kazu ne´e akontese Polisía la´os haree ho matan no kaer ho liman,“dehan Pedro Belo.

Tuir Pedro Belo, kuandu mandadu Tribunal sai tarde, suspeitu sira bele halai. Tanba ne´e Tribunal husu atu hasai lalais mandadu kapturasaun ba suspeitu sira.

“Oras ne´e dadauk intelijen sira mós akompaña hela sira, hanoin dala ruma sira mós bele halai, tanba dala ruma  ita demora demais nia mós bele halai. Tanba  ne´e mak  husu tribunal atu hasai lalais mandadu para  ita bele hala’o servisu ida  ne´e,“dehan Pedro Belo.

Kazu ne´e akontese iha loron 21, fulan Maiu, tinan ne´e, iha area eskola São Miguel,  Raikotu-Comoro, husi autor ne’ebé deskonfia husi militante partidu FRETILIN.

Antes ne´e mós  Adjunta Sekretariu Jeral Partidu FRETILIN, Cipriana da Costa Perreira, deklara, Partidu FRETILIN hakribi violensia no nunka orienta ninia militante atu halo krime. Tanba ne´e  Cipriana husu ba PNTL atu kaptura autor ne´e hodi submete ba prosesu legal.

Vítima ba agresaun fíziku ne’e mak hanesan Mateus Bubun, Jefriano Eko,  Leonardo Elo no Januario Quefi.avi