SASIN HETAN SUSPEITU TUDA MATEBIAN GABRIEL

Sasin Rozalina  Viegas  da Costa deklara katak, iha akontesimentu  ema tuda mate Gabriel Ximenes Gaio de Araújo, iha  área Beto-Comoro,  nia  hetan suspeitu sira helik  iha rin eletrisidade mak hodi tuda sira nain rua iha motor leten hodi monu tun ba estrada laran.

Kazu  ne´e akontese Sabadu (28/07/18) mais ou menus tuku 3 madrugada oras Timor-Leste,  wainhira  Gabriel Ximenes Gaio de Araújo, nu´udar matebian ho vítima Rozalina  Viegas  da Costa, fila husi festa kazamentu ida iha Delta Nova,  ho motorizada liu husi área Rotunda Lafatik Comoro hodi tesik fali mai área Beto kruzamentu hafoin mak hetan tuda husi suspeitu sira.

Iha akontesimentu ne´e matebian Gabriel Ximenes Gaio de Araújo hetan tuda  husi suspeitu sira  ho pankada maka´as monu kedas ba rai depois ulun fatuk kotuk baku ba estrada laran  to’o  ulun nakfera. Enkuantu Rozalina  Viegas  da Costa hetan kanek todan iha parte ain no kidan.

Matebian Gabriel Ximenes Gaio de Araújo, submete  ona ba autopsia iha hospital Nasionál Guido Valadares (HNGV) parte familia lori matebian fila ona ba uma iha loron Segunda  (30/07/18) no  iha Tersa (31/07/18) familia halot ona iha simiteriu Becusi  Díli.

Nune´e vitima  Rozalina  Viegas  da Costa agora dadauk iha ona nia rejidensia   Bairu Matan Ruak Fatuhada Díli.

“Ami sai husi festa Delta Nova   tesik mak mai to´o Rotunda Lafatik kontinua fila-fali viazen liu husi estrada boot  área Beto nian hare´e dalan fuik los, maibe derepenti ema hakat ain sai kaer ho fatuk  tuda,  ha´u sei dehan ba alin  hakruk-hakruk, maibe  ema tuda kona duni alin Gabriel Ximenes Gaio de Araújo ninia ibun, entaun motor ne´ebé mak Gabriel Ximenes Gaio de Araújo kondus nakdoko, hodi monu tun ba rai,  wainhira monu oin nakukun,  ha´u loke matan hare´e  ema nain tolu tesik mai dehan tau-tau,  keta husik, depois nain ida atu foti fatuk riba mai mai  ha´u, maibe la konsege. Ha´u bolu ha´u nia alin la hatan, depois ha´u obriga hader ba hi´it ha´u nia alin hare´e nia ran, depois ha´u foti telemovel leno  matebian nia ulun ran sulin,“esplika Rozalina  Viegas  da Costa, ba GMN  Kuarta (01/08/18) iha Bairu Matan Ruak Suku Fatuhada Díli.

Wainhira  Rozalina  Viegas  da Costa hare´e nia alin Gabriel Ximenes Gaio de Araújo  ran sulin,  Rozalina Viegas da Costa,  Bus Doping  hodi tula ba iha Hospital Nasionál Guido Valadares (HNGV), maibe  Gabriel Ximenes Gaio de Araújo konsege hakotu nia iis hodi husik hela mundu ne´e.

Relasiona ho kazu ne´e,   Leonel Gaio  Ximenes nuudar matebian Gabriel Ximenes Gaio De Araújo nia maun ba keisa ona iha  Eskuadra Polísia Dom Alexio Comoro hodi nune´e buka suspeitu sira bele kaptura nune´e bele lori kazu ne´e ba oin.

“Ha´u hanesan maun boot senti tristi tanba alin  ne´ebé mak durante  ne´e ha´u sempre hamutuk ho nia, wainhira tama sai servisu sempre kontrola nia, maibe nia nunka mais rona ha´u, nia ulun toos to´o ikus nia simu realidade ne´ebé mak akontese ba nia vida rasik, entaun hanesan maun kazu ne´e ténki levanta, ha´u presiza to´o iha Tribunal,“dehan Leonel Gaio  Ximenes.

Antes ne´e Segundu Komandante PNTL Munisípiu Díli Superintendente Asistente Euclides Belo  hateten,  vitima Gabriel Ximenes Gaio de Araújo mate, tanba tuda husi  ema  deskoñesidu. Maibe parte  seksaun Informasaun Polísia Dom Alexio suspeita  hela  ema balun  ne´ebé mak seidauk divulga hanesan suspeitu lolos.avi