Coliati simu pose ba Xefi Estadu Maior F-FDTL ■PR Lú Olo fiar kapasidade Coliati

Prezidenti Repúblika (PR), Francisco Guterres ‘Lú Olo’, Segunda (29/10/18), fo pose ba estrutura Falintil Forsa Defeza Timor Leste (F-FDTL), Coronel Calisto Santos “Coliati” hodi asumi kargu nu’udar Xefi Estadu Maior Forsa Armada hodi troka Xefi Estadu Maior sesante Brigadeiru Jeneral Falur Rate Laek.

Iha diskursu PR Lú Olo hatete, Coliati kaer kna’ar importante ida, tamba ne’e Xefi Estadu enkoraja Coliati atu kontribui ba forsa armada atu  dezenvolve no moderniza instituisaun  seguransa  ne’e.

“Ha’u felisita Koronel Coliati tamba simu  pose atu kaer kna’ar importante  tebes ida, iha diresaun Estadu Maior Kordenador Konjuntu no hamutuk  ho Vise Xefi Estadu Maior Jeneral  Forsas  Armadas, sei fo akonsellamentu ba Xefi Estadu Maior Jeneral Forsas  Armadas”,dehan PR Lú Olo, hafoin remata fo pose ba Coliati, iha Palásiu Prezidensial Nicolau Lobato Bairo Pite, Dili, Segunda (29/10/2018).

PR Lú Olo fiar katak, Coliati sei servisu maka’as hodi kontribui ba dezenvolvimentu forsa armada, nu’udar instituisaun ida ne’ebé tane a’as nafatin espíritu, valor no  determinasaun asuain Falintil sira nian, hodi la’o ba oin.

“Señor Coliati hatudu kualidade  pessoal téknika no profisional no mos virtude militar durante nia kareira tomak, hodi servi instituisaun militar no nasaun, kualidade sira ne’e hotu maka sai fator determinante ba nia nomeasaun nu’udar  Xefi Estadu Maior”,realsa PR Lú Olo.

Iha okaziaun  ne’e, Xefi Estadu Maior Jeneral F-DTL, Major Jeneral Lere Anan Timur, akresenta, husi  pose ba  Coronel Coliati, hatudu ohin ba oin hahú komando forsa armada atu entrega ba jerasaun foun, ne’ebé lori tempu, hahú husi tinan 2012 to’o tinan 2018.

“Ami  la’os atu profisionaliza forsa armada, maibe ami atu prepara sira, atu iha futuru mai sai forsa profisional iha mundu rai klaran, ha’u nu’udar Xefi Estadu Maior Jeneral Forsa Armada,  ha’u dehan katak sira bele duni,  maibe presiza esforsu bo’ot husi komando rasik, tamba ita kuandu  koalia kona ba profisionalizmu forsa armada ninian hateke deit ba material no meius ne’ebé uza, maibe determinante ba profisionalizmu disipilina, responsablidade, barani atu bele lori instituisaun ne’e  ba profisionalizmu”,hatutan Lere.

Entretantu tuir Calisto  Santos “Coliati” hatete, nia senti haksolok tamba nia kareira politika no kareira militar, nia bele alkansa postu ida ne’e, maibe ba nia ne’e nudar dezafiu foun ba nia kareira militar.

“Hau nia papel, no hau nia servisu ne’ebé hau atu halao, atu kontinua servisu Xefi Estadu Maior ne’ebé Brigadeiru Falur Rate Laek husik hela, ida ne’e mak hau sei kontinua no hau sei buka kompleta, karik presiza hadia depois hau sei hadia, se karik seidauk kompleta hau buka para kompleta”, Subliña Coliati. Oly