Tribunal absolve Martinho Gusmão no kondena Gastão Sousa

Tribunal Distrital Díli liu husi leitura akordaun kondena arguidu Gastão Sousa no Diogo da Costa ho pena suspensaun no absolve arguidu Martinho Gusmão, Ferlio Sousa ho Jordão Sousa.

Tribunal kondena arguidu Gastão ho pena prizaun tinan rua fulan neen, suspende ba tinan rua fulan neen no arguidu Diogo pena prizaun tinan ida fulan neen, suspende ba tinan ida fulan neen.

Alende ne’e tribunal mós kondena arguidu Gastão ho kustu judisial U$100.00 no arguidu Diogo U$50.000

Razaun tribunal kondena arguidu nain rua ho pena refere, tanba konsidera katak arguidu nain rua nia hahalok ne’ebé hatene katak, kareta ne’e partense ba Estadu nian, maibé sira autoriza ba ema seluk uza fali ba nesidade privadu, nune’e hahalok arguidu nain rua nian ne’e priense rekezitus krime pekulatu no pekulatu da uzu ne’ebé previstu iha kodigu penal Timor-Leste.

Alende ne’e tribunal mós absolve arguidu Gastão husi krime administrasaun danoza no arguidu Diogio absolve husi krime falsifikasaun dokumentus.

Infelismente hafoin desizaun defensor públiku husi arguidu Gastão la menta no deside sei halo rekursu hodi kontra desizaun primeiru instansia ne’e.

“Ami la simu no sei halo rekursu, tanba hau nia kliente ne’e la nein komete krime pekulato ou pekulato da uju, tanba ne’e aban ami hein deit tribunal notifika ami sei halo ona rekursu ba Tribunal Rekursu,’’ dehan Fernando ba jornalista sira iha TDD, Tersa (9/10).

Iha parte seluk Estaqui Guterres hanesan Defensor Públiku husi arguidu Martinho, Ferlio no Jordão apresia ho desizaun tribunal ne’ebé absolve nia kliente nain tolu ne’e.

“Hau apresia ba desizaun tribunal ne’e, tanba antes ne’e kedas hau husu absolve ba hau nia kliente sira ne’e, tanba sira la sala duni,’’ tenik Estaqui.

Audensia julgamentu ne’e prejidi husi juiz koletivu, Albertina Neves, António do Carmo ho juiza Zumiaty Freitas, Ministériu Públiku reprezenta husi prokurador Jacinto Babo no arguidu sira hetan asistensia legal husi Defensor Públiku. nia