PNTL detein feto ida naok Taxi

Polísia seksaun Tránzitu Munisípiu Díli detein feto ida, tanba  naok kareta Taxi ho sapa matríkula 33-982 TL  hodi halai husi área Aeroportu Internassionál Nicolau Lobato.

Kazu  ne’e akontese Kuarta (13/03/19), mais ou menus  tuku 10 kalan oras Timor-Leste.

Rumaldo de Jesus Correia nu’udar kareta nain  haktuir, kronolojia husi akontesimentu ne’e katak, kareta ne’e travaun avaria, tanba    ne’e mak  nia  kareta para hela  de’it  iha estrada ninin Aeroportu Rotunda Comoro, maibe xavi  iha hela kareta laran,  derepenti de’it rona ema halo moris kareta talia korea  tarutu.

“Entaun ha’u dehan sé mak  trabalha ha’u nia kareta ne’e halo moris entaun ha’u sai mai hare’e kareta ne’e  ema lori halai liu tiha ona, ha’u tenta duni tuir komesa husi área Aeroportu nian sae too rotunda Nicolau Lobato nian ne’e ha’u senti labele, ha’u husu ajuda   joven sira  hela iha kos mak ajuda motor tolu hodi duni tuir toman iha Kampung-Alor  ninian,  maibe  suspeitu ne’e atu soke sala-sala ema nain tolu la’o iha Estrada ninin, ne’ebé ha’u dehan ba kolega sira diak liu ita la’o ses, se lae suspeitu ne’e bele soke mate ita,  ne’ebé ami halai ses uluk tiha taxi ne’e mak hodi loke kareta nia odamatan tama iha laran  hodi dudu ses suspeitu ne’e, hodi hamate kareta ne’e lao neneik mak para iha Tiger Fuel ninian ne’e”,esplika Rumualdo de Jesus Correia, ba GMN Kuarta (13/03/19iha Bebora area Tiger Fuel Díli.

Rumaldo de Jesus Correia akresenta, nia  mós la hatene suspeitu ne’e. Tanba  ne’e mak informa ba Polísia seksaun Trânsito Munisípiu Díli,   too iha area Tiger Fuel Díli Bebora, hodi  asegura kareta ne’e no lori kedas suspeitu ba iha Eskuadra Dom Alexio hodi loke prosesu investigasaun.

Segundu Komandante PNTL Munisípiu Díli Superintendente Assistente Euclides Belo hateten,   nia parte rona radio komunikasaun  orienta kedas Polísia seksaun Trânsito  ba kedas  iha  Tiger Fuel, iha  Bebora hodi halo  halo identifikasaun  Eskuadra Dom Alexio.

“Tanba  ne’e mak  kazu ne’e nia prosedimentu tomak  iha área Eskuadra Dom Alexio nian, ami seidauk simu relatoriu  formal, maibe  PNTL nia kna’ar mak asegura uluk objetu, asegura pesoal bele involve  iha kualker krimi”,dehan Euclides Belo.

Enkuantu kona-ba suspeitu atu detein ka lae, depende ba iha prosesu investigasaun  Eskuadra Dom Alexio.avi