Rekrutamentu F-FDTL 2020, Lere insiste tenki fó prioridade ba veteranu nia oan

Xefe Estadu Maior FALINTIL Forsa Defeza Timor-Leste (F-FDTL), Maijor Jeneral Lere Anan Timor hatete, dadaun ne’e ekipa komisaun ba rekrutamentu membru F-FDTL foun iha ona, no rekrutamentu ne’e sei fó prioridade ba veteranu sira-nia oan.

Rekrutamentu membru F-FDTL foun ne’e, posibilidade sei hala’o iha tinan oin.

 “Ami forma komisaun ida, kuaze barak ne’e husi F-FDTL nia ema, no ami mós iha ona kritériu ba rekrutamentu ne’e, para haruka ba Governu, bainhira Pirmeiru Ministru aprova, ami sei servisu tuir kritériu refere, no kritériu ne’e la ses husi nasionalismu no patritismu ba Timor-oan ne’ebé hakarak tama ba instituisaun seguransa no defeza”, informa Lere Anan Timor ba Jornalista sira, Kuarta (6/11/2019), iha Palásiu Prezidensial Nicolau Lobato Bairo Pité Díli.

Lere haktuir, seguransa no defeza ne’e labele kompara ho instituisaun seluk, ezemplu polítiku ka Governu  kada tinan 5 troka malu, kuandu funu ruma sira mós  bele halai ba ema nia rain, mak mai fali mós diak maibé ema militar la hanesan ne’e, tanba iha juramentu hatete ona katak, kuandu nesesáriu fó vida rasik, tanba ne’e presiza sidadaun Timor ne’ebé iha nasionalismu, ne’ebe FALINTIL hatudu ona durante tinan 24 nia laran.

“Ita hatene katak, FALINTIL  nia dever no obrigasaun uluk iha ai laran, hodi liberta povu no nasaun, dever  ne’ebé FALINITIL iha tinan 24 liu ba mak mate ba nasaun  no mate ba povu, tanba ne’e  FALINTIL foun tenki iha sentidu espíritu  nasionalismu, no patriotismu mak tenki makas”, relata Lere.

Komandante F-FDTL ne’e subliña liu taan, militar tuir hirarkia ne’ebé iha, maske Vise Xefe Estadu F-FDTL Brigadeiru Jeneral Falur Rate Laek ko’alia ona kona bá la fó prioridade, husik ko’alia ba, tanba agora ne’e Timor iha direitu hanesan maibé, hakarak hatete katak, tenke prioridade ba veteranu nia oan.

“Timor-oan ne’e  Timor-oan duni  maibé, kestaun dignidade no onra ita la hanesan, demokrasia ne’e los maibé,  direitu ne’e la hanesan, tanba ne’e veteranu nia oan ne’e nafatin, importante mak bele priense kritériu ne’ebé iha, ezemplu hanesan, kuandu iha moras oin-oin  ne’e labele, maske nia  veteranu nia oan”, katak Lere.

Antes ne’e, Vise Xefe Estadu Maior F-FDTL, Falur Rate Laek hatete, rekrutamentu F-FDTL iha tinan 2020 ne’e, prioridade ba Timor-oan tomak, ne’ebé kontrariu ho deklarasaun Lere Anan Timor nian.oly