Autór soke mate abitante nain rua aplika TIR

Autór JVRSS  ne’ebé mak soke mate abitante   nain rua iha Praia dos Coqueiros,  Ministériu Públiku aplika de’it Termu Identidade Rezidénsia (TIR).

“Parte seksaun  investigasaun tránzitu husu  orientasaun husi Ministériu Públiku no Ministériu Públiku nia orientasaun haruka  para fó TIR ba nia depois submete nafatin ba prosesu no família sira komunika ba malu, família suspeitu  no família vítima komunika ba malu  ne’ebé sira hasoru malu ona. PNTL sempre rona orientasaun husi Ministériu Públiku, ami labele hakat liu orientasaun, naran katak, ami PNTL aguarda suspeitu labele halai lakon. Suspeitu ami garante katak labele halai tanba nia inan rasik mós servisu iha Ministériu Públiku, portanto nia labele halai lakon”,esplika Segundu Komandante PNTL munisípiu Díli Superintendente Asistente Euclides Belo, ba  jornalista sira Segunda (02/12/19), iha Kuartel PNTL munisípiu Díli.

Euclides Belo akresenta, parte PNTL la obriga parte suspeitu ho vítima atu komunika ba malu, maibé PNTL firme nafatin tuir prosedimentu legal ne’ebé mak iha, tanba ne’e mak suspeitu hamutuk ho  família, maibe nafatin kontribui ba  prosesu investigasaun, ne’ebé mak seksaun tránzitu promove.

Alende ne’e, Euclides Belo rekoñese suspeitu iha duni  karta kondusaun tanba suspeitu atinji ona idade 17.

“Nia iha  karta  kondusaun hanesan ha’u dehan idade minoria normalmente iha karta kondusaun pedidu husi inan aman”,dehan Euclides Belo.

Asidente  tráfegu ne’e akontese  iha Sabdu (30/11/19) iha Praia dos Coqueiros  Díli, iha meiudia oras Timor-Leste.

Enkuantu mate isin nain rua, transporta ona ba Tapo, Memo, Maliana hodi hala’o seremonia funebre.avi