DEPUTADU IV LEJISLATURA SEI SIMU POSE IHA LORON 21

Parlamentu Nasional (PN) ajenda ona semana oin loron 21, hanesan última plenária ba mandatu III lejislatura no primeira sesaun ba IV lejislatura nian.

“IV lejislatura husi bankada lima, FRETILIN, CNRT, PLP, PD no KHUNTO, haktuir Prezidente Parlamentu Nasional, Aderito Hugo da Costa ba jornalista sira, iha Parlamentu Nasional, Segunda (14/08/2017). Aderito dehan, iha tempu badak PN sei distribui konvite ba kandidatu deputadu sira husi partidu lima ne’ebé hetan asentu iha Parlamentu Nasional, hodi halo kolaborasaun ba prosesu transformasaun lejislatura. “Provizoriamente ami fiksa ona data ba 21, ita konta deit loron ona para III lejislatura atu termina nia mandatu no iha tempu badak ami sei distribui konvite ba kandidatu deputadu IV lejislatura nian, hodi koordena malu para oinsa prosesu tomak ba loron 21 nian, konaba regras subtituisaun, deputadu eleitu ruma, no data 21 ne’e fiksa ona, maibe depende ba negosiasaun ba forma Governu ne’ebé partidu lima (, FRETILIN, CNRT, PLP, PD no KHUNTO) ne’ebé hetan asentu iha parlamentu nasional halo dadaun, maibe laiha obstakulu sériu, entaun ami fiksa ona loron ne’e,”dehan Hugo. Aderito mós informa, téknikamente  preparasaun ba seremonia transformasaun lejislatura kompletu ona. “Ajenda dahuluk depois simu posse mak, aprezentasaun kandidatu ba prezidente Parlamentu Nasional foun no eleisaun, no loron tuir maka eleisaun ba membru meja foun,  kuandu prosesu negosiasaun ne’e la’o loos ona, no mekanizmu ka sekuensia transferensia ne’e, deputadu III lejislatura loke plenária no taka III lejislatura sira hamriik sei priense kedas ho deputadu IV lejislatura sira iha  kadeira III lejislatura nia fatin,”haktuir Aderito. Entretantu Plenária dahuluk ba IV lejislatura no última plenária ba III lejislatura ne’e sei hala’o iha Parlamentu Nasional.say