Eis Deputadu balu privatiza ona kareta Prado ■Lakohi hatama ba PN

Deputadu sira ne’ebé la re-eleitu ba IV lejislatura ne’e, to’o agora seidauk hatama kareta Prado ba Patrimoniu Parlamentu Nasionál (PN), tanba xapa matríkula no dokumentu kareta nian, muda ona ba privadu.

Xefi bankada FRETILIN, Francisco Branco, rekoñese katak, husi bankada FRETILIN nian difisil atu eis deputadu sira entrega fali kareta, tanba eis deputadu sira ne’e, difisil ona atu kontakta sira.

“Tanba ne’e mak bankada FRETILIN hato’o ona ba eis deputadu sira atu kumpri saida mak deside tiha ona. Maibé deputadu balu ne’ebé la re-eleitu,  ami kontaktu atu mai hatama kareta mós telefone mate,”katak Francisco Branco ba jornalista sira iha PN, Sesta (29/09).

Nia hatutan, eis Prezidenti Parlamentu Nasionál, Aderito Hugo da Costa hasai ona desizaun kona ba suspensaun alinasaun kareta Prado III lejislatura nian. Maibé balun to’o agora seidauk entrega.

Maske nune’e Xefi bankada FRETILIN ne’e afirma, deputadu barak mak entrega fali ona kareta ba patrimoniu Parlamentu Nasionál.

“Komplikadu oituan kuandu ita haree husi aspetu legalidade, tanba xapa matríkula no dokumentu sira ne’e, privadu tiha ona, entaun ita tenki haree ho didiak para labele kria problema, tanba xapa ne’e sira muda tiha ona legalmente husi servisu kompetente,”tenik Francisco Branco.

Nia afirma, agora dadauk Konsellu Administrasaun, Prezidenti Parlamentu Nasionál ho Xefi bankada sira enkontru hela atu foti desizaun kona ba sosa kareta foun ba deputadu IV lejislatura.

Nune’e mós, Xefi bankada CNRT, Arão Noe Amaral, hateten, Konsellu Administrasaun aprova ona deliberasaun ida katak, kareta sira ne’ebé  deputadu sira atu halo leilaun ne’e, kansela no kareta sira ne’e entrega fali ba patrimoniu Parlamentu Nasionál.

Arão Noe haktuir, ida ne’e meja Parlamentu Nasional  no Sekretariadu mak iha kna’ar atu bele rekolla  fila-fali kareta sira ne’e husi deputadu sira ne’ebé la re-eleitu ona.

Deputadu balu entrega ona sira-nia kareta, no hein katak, deputadu balu ne’ebé la re-eleitu, bele entrega hotu kareta atu Parlamentu Nasionál bele re-organiza kareta sira ne’e deputadu sira ne’ebé eleitu fila-fali iha IV lejislatura ne’e.

“Deputau CNRT  nian la re-eleitu ne’e, iha nain walu, maibé balu entrega ona  sira-nia kareta, no balu mak seidauk hanesan mós bankada sira seluk. Maibé kona ba atu hatama fali kareta ka la’e ne’e, la’os ona kompetensia bankada nian, maibé kopetensia Sekretariadu Parlamentu no Prezidenti Parlamentu,”relata Arão Noe.

Deputadu sira ne’ebé la re-eleitu ona iha IV lejislatura ne’e, husi bankada FRETILIN nain 5, CNRT na’in 8, PD nain 6 no FRENTI Mudança  nain 2.

To’o notísia ne’e públika, GMN seidauk halo konfirmasaun ho Sekretariadu Parlamentu Nasional no Prezidenti Parlamentu Nasional, Aniceto Guterres.

Bainhira Grupo Média Nacional tenta konfirma ho deputadu ne’ebé seidauk hatama kareta Prado ba patrimoniu Parlamentu Nasional, maibe deputadu sira laiha resposta.

 MUTL  husu  eis  deputadu  entrega  kareta  prado

Husi sorin seluk Movimentu  Universitariu  Timor-Leste (MUTL)  husu  ba  eis membru Parlamentu Nasional iha III Legislatura  atu entrega  hikas  kareta prado  ho emediatamente. Liu husi Porta Voz   MUTL, Jones  Chega,  husu ba  lider  partidu  politiku husi  Bankada  FRETILIN, CNRT, PD, ho  FRENTE  MUDANÇA  iha III Legislatura nian atu  ejiji  ba  nia membru sira entrega Estadu nia kareta prado ne’e.

Bazeia ba asaun  pasifika  no edukativa  ne’ebé  mak  MUTL  hala’o iha fulan  ida liu ba, konsege  obriga  no rejulta  deklarasaun husi bankada  4  iha Parlamentu  Nasional  katak,  sei entrega  hikas  kareta  65  no la tuir  prosesu  alineasaun.    Maibé, realidade    hatudu  katak,   eis  membru  parlamentu  balun  seidauk  entrega  kareta prado  no   balun  troka tiha ona  xapa  matrikula  ba privadu.

MUTL  husu  mós  ba  membru  parlamentu  husi  IV legislatura  hodi  hasai  rezolusaun  ba  eis  deputadu  sira  husi  terseiru  legistura  hodi mantein  nafatin  lelaun  kareta  prado.

Jones  Chega,  hatete  deputadu  husi  IV legislatura  no  eis   membru  parlamentu  nasional  husi  III  legislatura  la responde  ejijensia  hirak ne’e, maka MUTL  sei hala’o  asaun pasifika  iha  tempu badak  nia laran. Cos/ tos