JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Kampaña FRETILIN iha Aileu, Alkatiri konsidera EA hanesan referendum 2

Kampaña FRETILIN iha Aileu, Alkatiri konsidera EA hanesan referendum 2

Kampaña polítika partidu FRETILIN ba dala nen (6), iha Munisípiu Aileu, militante no simpatizante sira FRETILIN nian, ho entusiaizmu tebes hodi rona programa FRETILIN nian ne’ebé aprezenta husi Sekretáriu Jeral Marí Alkatiri.

Ba militante no simpatizante sira, Mari Alkatiri hateten, programa VII Governu ne’e mak baze ba planu dezenvolvimentu nasionál. Tanba ne’e, Alkatiri husu ba militante no simpatizante sira FRETILIN nian, iha Aileu atu labele vota sala, maibé vota ba FRETILIN atu hadia faillansu sira ne’ebé la’o durante tinan 10 ne’e.

“Eleisaun Antesipada ne’e hanesan segundu referendum ba povu Timor Leste, atu liberta povu, tanba durante tinan 10, povu Timor Leste ki’ak ba beibeik. Referendum ida primeiru ita liberta pátria, agora FRETILIN atu liberta povu,” katak Mari Alkatiri iha komísiu aberta ba militante no simpatizante sira iha Aileu, Sábadu (15/04).

Alkatiri hatutan, eleisaun dala hira ona, FRETILIN nunka manan iha Aileu, maibé EA ne’e, Alkatiri fiar FRETILIN sei manan iha Aileu, tanba povu matan nakloke ona.

“Ha’u promete ba imi joven sira katak, bainhira FRETILIN manan sei loke fila fali artemarisiais atu funsiona fila fali iha Timor Leste, tanba artermasiais sira mós kontribui ba prosesu Timor Leste ukun-an. Ita labele kondena artermarsiais sira, hodi hateten katak, sira ba jura fali iha bandeira merah putih, ida ne’e lalós, joven artermarsiais ida mak sala, nia mak tenki responsabiliza nia hahalok ba komarka, labele kondena organizasaun artemarsiais hotu,” katak Alkatiri.

Mari Alkatiri hatutan, dadaun ne’e lider balun hatun ona sira nia-an, maibé nia la presiza atu hatán ba ida ne’e, tanba kampaña la’os atu hatun malu, maibé atu hato’o programa.

“Ita tenki hadia ita nia agrikultura ba integradu, ba agrikultura família, la’os fahe tratór arbiru de’it, agrikultura tenki liga ba ekonómia total, no liga ba merkadu. Baze ba programa VII Governu ne’e mak baze ba planu dezenvolvimentu nasionál, maibé planu estratéjiku dezenvolvimentu nasionál ne’e, la’os mai iha Governasaun FRETILIN, maibé aprova iha Governasaun CNRT, maibé Planu Estraetjiku Dezenvolientu Nasional (PEDN) ne’e, sira implementa la tuir dalan. Tanba ne’e mak VII Governu atu muda PEDN ne’e tuir nia dalan,” dehan Alkatiri.

Sekretáriu Jerál FRETILIN ne’e afirma,  programa VII Governu atu hadia saida mak presiza atu hadia, tanba programa H6  ne’e hadia to’o hamos korupsaun, tanba ne’e mak sira tauk hamos korupsaun ne’e.

Lee hotu :   Juventude ParPol asina kompromisu paz ho CNJTL

“Povu kole ona ema mai halo promesa, no povu kole ona atu ema ba sosa votus ho foos sosiál nian. Ha’u mai para aprezenta programa, tanba ita ba fatin hotu ita haree problemas atu hanesan de’it, ita esforsu atu dada kadoras mai Timor Leste, maibé kadoras bee moos de’it durante tinan 10 la tama iha uma kain ida-ida povu nian,” Alkatiri haklaken.

Lider másimu partidu istóriku FRETILIN ne’e fundamenta katak, programa prioridade mak dada bee moos ba povu, no halo uma digñu ba povu atu povu bele senti Timor Leste nia ukun-an.

Alén de ne’e, Alkatiri dehan, veteranu sira moris hanesan ne’e nafatin, maibé veteranus bo’ot sira ne’e uma di’ak no bo’ot ona, agora sira mai promete atu tau matan ba veteranus.

“Atu la’o ba oin, presiza halo dezenvolvimentu ida iha setór hotu, tanba ida ne’e mai husi konstituisaun kedas. Programa VII Governu atu hadia edukasaun, para labarik sira bele eskola iha eskola ne’ebé digñu, labele bo’ot sira nia oan ba eskola iha rai liur, povu nia oan hakdasak iha rai laran. Maibé edukasaun saida mak ita sei fó ba povu, kuandu ita nia ukun na’in sira la hamutuk no la unidade,” lider másimu partidu ho númeru sorteiu hat (4) ne’e hateten tan.

SekJer FRETILIN ne’e dehan, Governu tenki haree ba mestre sira atu oinsa sira hanorin di’ak liu, tanba mestre sira ba hanorin to’o Suku, maibé uma ba sira laiha, oinsa mak sira bele iha dignidade, hodi hanorin labarik sira ho di’ak.

“Polítika saúde públika atu hakbesik pesoal saúde sira ba povu atu hanorin povu hado’ok-an husi moras. Aumenta kapasidade ita nia sentru saúde sira, no postu saúde sira, atu uza klínika movel atu la’o buka hatene moras saida de’it mak povu infrenta,” katak Alkatiri.

Nia salienta, ko’alia konaba turízmu, TL ne’e furak tebes ba turízmu, maibé jestaun laiha atu haree ida ne’e. iha Aileu ne’e furak tebes ba turízmu, maibé ema labele mai haree Aileu, tanba Hotel de’it mós laiha.

Lee hotu :   La diskuti MS, AMP konsidera PPN la konsistente ho deklarasaun

“Joven barak remata eskola laiha servisu, tanba ekonomia iha Timor Leste paradu, ekonomia ne’e laran metin ba minarai, mina maran, lahatene atu halo saida. Sira kria fali lei reforma tributária, atu impede fali ema hodi mai halo investimentu iha Timor Leste, tanba ne’e mak ema lakohi atu mai investe iha Timor Leste. Agora ita halo jalan tol ida, ita tau kareta hotu iha Timor Leste atu halai iha jalan tol ne’e atu selu osan mai Estadu, osan jalan tol ne’e nia folin sei la tama mai fali, entaun jalan tol ne’e serve ba saida lós. Sé ita halo de’it estrada ida di’ak atu haburas duni agrikultura, aban bainrua minarai atu mai mak ita halo jalan tol, ida ne’e foin lós, maibé ida ne’e halo ain tun ulun sa’e,”katak Alkatiri.

Nia afirma, Governu mós  halo aeroportu ida iha Suai, agora ema husu atu aluga aeroportu ne’e, maibé labele tanba Aeroportu ne’e seidauk hotu, maibé sira ansi ba inaugura ona,

“Tanba selebra ho sira nia tinan, no halo kampaña ba sira nia partidu, ita kahur buat hotu arbiru lós,” katak Alkatiri.

Nune’e mós membru Comite Central FRETILIN (CCF), Abílio Araújo, sente triste tanba, kampaña FRETILIN nian iha Aileu ne’e, kamarada sira ne’ebé uluk hahú FRETILIN iha Aileu ne’e, la marka prezensa. Maibé Abilio Araújo sente kontenti tanba, Aileu oan sira nakonu no resin iha kampu Aileu Villa hodi partisipa iha kampaña FRETILIN nian ne’e.

“Tanba ne’e duni mak ha’u mai hamriik iha ne’e, atu husu ba Aileu oan sira atu ita hamriik repete fali movimentu ne’ebé ita hahú iha 1974, tanba ha’u lahaluha katak, 1974, kuandu Maubisse tomak tama ho intimidasaun sira labele ko’alia konaba FRETILIN. Maibé ami ba hamriik iha ne’eba hodi fó surat ida ba Ministru Portugal hodi hateten katak, povu Timor Leste hakarak ukun rasik-an,” dehan Abílio Araújo.

Nia hatutan, VII Governu ne’ebé povu TL tenki tane-as iha EA ne’e, sei mai halo dezenvolvimentu iha Aileu, tanba FRETILIN hatene katak, durante tinan 10 ne’e, Aileu sei iha terus no susar nia laran.

Lee hotu :   AMP halo konsolidasaun iha Venilale Alin Laek apela ba militantes mantein paz

“Tinan 10 nia laran, osan 14 biloens mak ita gasta, maibé osan ida ne’e nia rezultadu ita haree oituan de’it, tanba barak liu estraga de’it, no osan barak hatama de’it iha sira nia bolsu, ema barak ba halo uma di’ak iha Bali, Jakarta, no rai sira seluk. Agora ha’u husu ba imi hotu atu ba tuku odamatan família sira seluk nian, atu konvida sira hodi mai hamutuk ho ita FRETILIN,” katak Abílio Araújo.

Emprezáriu Timoroan ne’e mós reforsa katak, Igreja mós apoiu programa di’ak VII Governu, no Igreja mós apoiu atu kontra korupsaun iha TL.

“Eleisaun Antesipada  ne’e importante tebes, tamba oras ne’e ita nia osan minarai iha US$ 16 biloes, tanba ne’e ita tenki vota FRETILIN atu salva osan US$ 16 biloens ne’e. Ita tenki vota FRETILIN hodi hahú VIII Governu atu halo mudansa,” nia esplika.

Alén de ne’e, Adjuntu Sekretariu Jerál Partidu FRETILIN, José Manuel ‘Nakfilak’ hateten, FRETILIN manan tiha ona, tanba hahú kampaña FRETILIN iha Manatuto to’o Aileu, povu hatudu katak, FRETILIN mak merese ba ukun.

Nia haktuir, povu Aileu tenki sai fatór determinante ba dezenvolvimentu Aileu rasik, tanba programa VII Governu mak povu halibur hamutuk iha FRETILIN.

“Governasaun AMP mak manan tender hodi sosa foos ba povu, maibé husu tok, sé mak manan kontratu ba sosa foos ba povu, sé mak halo portu Hera,” katak nia.

Tanba ne’e Nakfilak dehan, povu hatene ona atu halo julgamentu ba sira katak, sira lamerese atu ukun, no FRETILIN mak bele lori povu no nasaun TL ba oin.

Kampaña partidu FRETILIN nian iha Munisípiu Aileu ne’e, hetan seguransa másimu no konjunta husi Polisia Nasional Timor Leste no FALINTIL Forsa Defeza Timor Leste, no hetan mós observasaun husi Comissão Nacional de Eleições (CNE) no Sekretariadu Tékniku Administrasaun Eleitorál (STAE), inklui mós observador internasional sira.

To’o remata, kampaña partidu istóriku ne’ebé manan iha eleisaun lejislativu iha fulan jullu 2017 ho porsentu 29,6 ne’e, kontinua la’o hakmatek no paz nia laran. Tuir kalendáriu ne’ebé CNE aprova, partidu FRETILIN kontinua kampaña aberta iha Munisípiu Viqueque iha loron Tersa feira (17/04/2018).cos

Add to Comments Here!!!!

error: Content is protected.
Secured By miniOrange
You might also like:
MS Rui Araújo vizita aldeia izoladu husi sentru saúde

Ministru Saúde dr. Rui Maria de...

AMP sei formaliza lei GAM

Povu Timor Leste liu-liu Grupu Arte...

MDN iha pilar importante tolu ba dezenvolvimentu TL

"Atu dezenvolve país ida, iha pilar...

Close