Relatóriu duo désimu ba VIII Governu preparadu ■Ezekuta deit 65%

Ministru Planu Finansa (MPF), Rui Agosto Gomes, informa, relatóriu ezekusaun orsamentu duo désimu husi VII Governu preparadu ona, hein de’it tempu hodi aprezenta ba VIII Governu.

“Relatóriu prepara hotu ona, hein loron atu entrega, depois ami sei tau hotu iha relatóriu, kada fulan ezekusaun ne’e por volta 65%, ita lakonsege ezekuta tomak, osan ne’e iha, kada fulan ita tau 106 ou 107 milloens, maibe ezekuta de’it 65%,”relata ministru finansa, Rui Agosto Gomes, ba jornalista iha Palaçio Governo, semana kotuk.

Governante ne’e informa tan, VII Governu sei kontinua garante funsionamentu mákina Estadu nian, to’o mandatu VIII Governu.

“Saláriu funsionariu sira foin dadauk  simu ona, veteranu sira-nia tranferensia la’o hela, sei to’o Juñu to’o governu foun mai, laiha buat ida, ami asegura hotu ona,”informa Rui Gomes.

MPF VII Governu ne’e sujere ba Governu foun, atu bele buka meius oinsa hodi labele dependente de’it ba fundu mina rai iha Timor-leste.

“Hau espera katak governu foun mai bele mantein rigor, dixiplina iha kontas estadu, tranparensia, servisu maka’as, e dezafiu bo’ot ida ba Timor-Leste, no ba governu sese de’it atu mai, tenke tau matan ba oinsa ekonómia non petrolíferu ne’e mak bele subtitui fundu mina rai nian,”dehan Rui.

Antes ne’e, deputadu bankada CNRT, Arão Noe husu Tribunal Rekursu atu bele aselera anunsia rezultadu eleisaun antesipada nian, hodi nune’e governu foun bele aprezenta ona orsamentu jeral ba tinan 2018 nian, tanba estadu Timor-Leste labele moris tempu naruk ho orsamentu duo désimu.Say