Senáriu Lay out V lejislatura, PD-FDD besik FRETILIN, PLP-KHUNTO rabat CNRT

Lay out sala plenária Parlamentu Nasional (PN), bankada Partidu Demokrátiku (PD) no bankada FRENTI Dezenvolvimentu Demokrátiku (FDD) besik bankada FRETILIN, no bankada PLP ho KHUNTO iha bankada CNRT nia sorin.

Xefi bankada CNRT, Arão Noe, hateten, lay out (Formatu) sala plenária V lejislatura aprezenta husi bankada hotu iha PN.

“Senáriu permanente hodi forma bankada sira-nia fatin iha plenária laran mak hanesan, FRETILIN iha sorin, bankada PD no FDD iha klaran, CNRT, PLP no KHUNTO iha sorin,” relata Arão Noe ba jornalista iha PN Tersa (12/6/18).

Nia haktuir, plenária V lejislatura sei realiza iha loron 13 fulan Juñu, bainhira hahú primeiru reuniaun V lejislatura nian.

Arão Noe mós esplika katak, lider bankada sira iha PN konkorda hotu atu AMP hari bankada tolu (3) iha PN, tanba rejimentu Parlamentu Nasional rasik mós fó dalan.

“Rejimentu Parlamentu Nasional artigu 11 hateten, bankada ou koligasaun sira bele rekere atu forma bankada ketak-ketak. Depois artigu 15 lei eleitoral mós ko’alia kona ba oinsa halo substituisaun ba partidu sira ne’ebé hetan asentu iha Parlamentar,” relata Arão.

Nia afirma, iha konstituisaun RDTL mós laiha artigu ida atu bandu kona ba forma bankada iha Parlamentu Nasional.

“Tanba ne’e mak ami kumpri saida mak lei fó dalan, AMP bankada ketak-ketak, FDD bankada ida, hanesan mós FRETILIN ho PD,” tenik Arão Noe.cos