PROPOSTA FOTI OSAN FP IHA ONA PR

Parlamentu Nasionál (PN) V lejislatura haruka ona proposta lei VIII Governu nú 1/V (1ª) primeira autorizasaun extraordinaria ba realizasaun transferensia Fundu Petrolíferu (FP) ba Prezidente Repúblika (PR), Francisco Guterres ‘Lú Olo’ hodi promulga, relata Vise Prezidente PN, Maria Angelina Sarmento ba jornalista, Segunda (23/07/2018).

 Deputada PLP ne’e haktuir, proposta lei refere passa ona iha Parlamentu Nasionál ho karakter urjensia, hafoin deputadu sira diskute no aprova iha jeneralidade no espesialidade ho votus a favor 35, kontra 25 no abstensaun 3.

“Proposta ida ne’e iha Sesta kalan ami halo ona aprovasaun iha jeneralidade no espesialidade ba pedidu autorizasaun extraordinaria atu foti osan husi fundu petrolíferu 140 miloens, halo mós alterasaun oituan ba kontiudu proposta lei ne’e, tanba ne’e mak ohin dader (horseik dader) komisaun C reuni fali hodi diskute versaun final ba proposta lei ne’e hodi aprezenta ba PR, Prezidente Parlamentu sei asina proposta lei ne’e, depois orsida lorokraik (horseik lorokraik) Parlamentu Nasionál haruka ba Prezidente Repúblika atu promulga ou veta ne’e kompetensia ba Xefi Estadu nian,” relata Vise Prezidente PN.

Proposta lei nú 1/V (1ª) autorizasaun extraordinaria ba realizasaun transferensia fundu petrolíferu ne’e, Governu aprezenta ba Parlamentu Nasionál iha loron 12 fulan Jullu tinan ne’e,no entrega ba Komisaun C asuntu finansa públika hodi diskute no aprova iha loron Kinta loron 19, fulan Jullu, durante oras 24 lori hikas ba plenaria hodi deside nia karakter urjensia iha loron 20 fulan ne’e.

Tuir Konstituisaun RDTL (K-RDTL) artigu 88, alinea 1 hateten, iha prazu loron 30 nia laran, hahú husi simu diploma husi Parlamentu Nasionál atu promulga hanesan lei, inklui Prezidente Repúblika bele mós uza direitu vetu nian, hodi husu apresiasaun foun kona-ba lia-tatoli ne’e ho fundamentu.Say