JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Ofisialmente PR Lú Olo publika ona tratadu FM ■ Kontinua estuda LFP-LAP

Ofisialmente PR Lú Olo publika ona tratadu FM ■ Kontinua estuda LFP-LAP

Prezidente Repúblika (PR), Francisco Guterres Lú Olo, ofisialmente publika ona tratadu Fronteira Marítima entre Timor-Leste ho Austrália, no promulga ona diploma Lei Tributária (LT) ho Rejime Laboral no Migratória Espesial (RLME) ne’ebé aplikavel ba projetu Bayu Undan.

“PR nia kompetensia mak haruka publika tratadu ne’e iha Jornal da Repúblika. Hafoin publika ona iha orgaun espesial ida ne’e maka tratadu ne’e hahú iha forsa no efikasia lei nian. Ha’u asina ona rezolusaun PN ne’ebé ratifika tratadu tasi entre Timor-Leste ho Austrália no sei haruka ohin (Horiseik) ba PN. No Lei Tributária (LT) ho Rejime Laboral no Migratória Espesial (RLME) ne’ebé aplikavel ba projetu Bayu Undan PR la haree problema ida iha alterasaun ne’e. Tanba ne’e promulga ona no tuir prosesu baibain sei haruka ba hodi hato’o ba Jornal da República”,deklara Prezidente Repúblika (PR), Francisco Guterres Lú Olo, iha Sala Konferensia Nino Conis Santana, Palásiu Prezidensiál Nicolau Lobato, Bairo Pite, Díli, Kinta (22/08/2019). Dekretu lei

Enkuantu Alterasaun Lei Fundu Petrolíferu (LFP) no Lei Atividade Petrolíferu (LAP), PR sei kontinua estuda no tetu antes foti desizaun.

Tuir artigu 85, Prezidente Repúblika iha kbiit atu  promulga ka veta Dekretu ne’ebé simu  husi Parlamentu Nasional iha loron 30 nia laran. Iha loron 20 nia laran, Prezidente Repúblika bele mós husu fiskalizasaun preventina ba konstitusionalidade husi Tribunal Rekursu katak iha ka lae buat ruma hasoru Konstituisaun. Enkuantu hein Akórdaun husi Tribunal, prazu loron 30 suspende no hahú sura fila fali hafoin loron ida simu akórdaun  husi Tribunal Rekursu. Hafoin simu akórdaun husi Tribunal Rekursu maka Prezidente deside promulga ka veta Dekretu husi Parlamentu Nasional.

Lee hotu :   PSHT apoiu másimu ba AMP manan absoluta iha EA

Prosesu hatama Tratadu  kona-ba Fronteira Tasi-Timor  iha orden jurídika Timor-Leste nian la tuir dalan hanesan ho Dekretu aprova iha Parlamentu Nasional.

Tratadu  ne’e  aprova ona husi Governu Timor-Leste, no ratifika ona husi Parlamentu Nasional, no tuir  artigu 85 alinea a  Konstituisaun RDTL,  Prezidente Repúblika nia kompeténsia mak haruka publika Tratadu ne’e iha Jornal Repúblika.

Hafoin publika ona iha órgaun ofisial ida ne’e, mak Tratadu ne’e hahú iha forsa no efikásia lei nian.

Prezidente Repúblika, nu’ udar Xefe Estadu, hakruuk ba Konstituisaun, lei-inan ne’ébé Estadu Timor-Leste adopta, bainhira ita restaura ita-nia  independénsia.

Ha’u asina ona Rezolusaun Parlamentu Nasional ne’ebé ratifika Tratadu Fronteira Tasi-Timor entre Timor-Leste no Austrália no sei haruka ohin ba Parlamentu Nasional.

Tuir prosesu baibain, Parlamentu Nasional mak sei hato’o ba Jornál Repúblika.

Tuir Konstituisaun RDTL, ha’ u hatete fila fali, kompeténsia Prezidente Repúblika nian mak  asina no haruka publika Tratadu ne’e iha Jornal Repúblika.

Kona-ba Dekretu rua husi Parlamentu Nasional ne’ebé iha relasaun direta ho Tratadu ne’e, Lei Tributária no Rejime Laboral no Migratóriu Espesial Aplikável ba Projetu Bayu-Undan.

Prezidente Repúblika la haree problema iha alterasaun ne’ebé Parlamentu Nasional halo no, tanba ne’e,  promulga ona no, tuir prosesu bainbain,  sei haruka ba Parlamentu Nasional hodi hato’o ba Jornal Repúblika.

Diploma lejislativu  ne’ebé  iha relasaun ho Tratadu ne’e sei hahú aplika hafoin Tratadu ida ne’e  tama ona iha orden jurídika Timor-Leste nian.

Kontinua estuda LFP-LAP

Alterasaun ne’ebé Parlamentu Nasional halo ba Lei Fundu Petrolíferu (LFP) no Lei Atividade Petrolífera (LAP), iha matéria kona-ba Fundu,  la iha relasaun direta ka formál  ho Tratadu Fronteira Tasi entre Austrália no Timor-Leste.

Lee hotu :   Lista kandidatura AMP, mantein ho deputadu 35 iha PN "Logo boña mean aprovadu"

Prezidente Repúblika presiza tetu didiak alterasaun sira ne’ebé Parlamentu Nasional halo ba lei rua ne’e.

Presiza haree oinsá  alterasaun sira ne’e afekta Fundu Minarai tanba  Fundu ne’e mak sustenta Orsamentu Jeral Estadu ne’ebé permite tanen instituisaun Estadu no ninia servisus bázikus ba Povu ninia moris loron-loron.

Alterasaun ne’ebé Parlamentu Nasional halo ba Lei Fundu Minarai labele loke dalan atu hasai osan arbiru de’it husi Fundu ne’e.

Hasai arbiru  signifika osan Fundu nian sei hotu lalais iha tempu badak.

Alterasaun ne’ebé  Parlamentu Nasional halo ba Lei Atividade Petrolífera, labele loke dalan ba   Governu uza osan Fundu Minarai nian,  dalan rua, ba infraestruturas, Ida,  liuhusi Orsamentu Jeral Estadu hodi investe iha infra-estruturas hanesan estrada, pontes, gazodutu no refinaria. Rua,  hasai osan diretamente husi Fundu Minarai hodi investe iha infraestrutura sira  ho justifikasaun katak iha relasaun ho atividade petrolífera.

Maibé Lei Atividade Petrolífera  la iha relasaun ho Fundu Minarai atu fó justifikasaun hodi hasai osan diretamente husu Fundu soberanu ida ne´e.

Fundu Minarai iha objetivu no mekanismu  jestaun di’ak to’o ohinloron. Ida ne´e mak halu Fundu ida ne´e sustentavel.

Tanba ne’e alterasaun ba lei rua ne’e labele halakon objetivu no mekanizmu gestaun no kontrole ba Fundu ida ne’e.

Ho  osan Fundu Minarai nian mak ita bele investe  iha  saúde, edukasaun, agrikultura, bee moos, saneamentu públiku no área sira ne’ebé sei hasa’e dezenvolvimentu ekonómiku no sosial no kualidade vida ba Povu tomak.

Prezidente Repúblika sei matan moris neon-nain ba ita-nia rikusoin no  husu  Povu tomak atu tau matan lesuk ba oinsá  gasta osan husi Fundu Minarai, tanba Fundu ne’e mak garante Orsamentu Jeral Estadu nian, tinan-tinan.*/Ito

Add to Comments Here!!!!

error: Content is protected.
Secured By miniOrange
You might also like:
Dia 22/08/2019/GMNTV LIVE STREAM/ JORNAL NASIONAL KALAN

Dia 22/08/2019/GMNTV LIVE STREAM/ JORNAL AS 12

Dia 22/08/2019/GMNTV LIVE STREAM/ GRANDE ENTREVISTA

Close