La involve feto iha dezenvolvimentu, Vise PPN: Sei la alkansa objetivu promosaun igualdade

Vise Prezidente Parlamentu Nasional (PN), Maria Angelina Sarmento, hateten, wainhira la involve feto iha prosesu dezenvolvimentu, sei la alkansa objetivu promosaun inkluzaun no igualdade.

Tanba ne’e, VIII Governu konstitusional kontinua exerse polítika ne’ebé existi iha Timor-Leste, hodi promove feto iha área oi-oin.

“Inkluzaun no iguladade polítika husi VIII governu, kontinuasaun polítika sira ne’ebé existi tiha ona, la’o iha ita nia rai, hodi kontinua hakbi’it promove no haforsa partisipasaun feto iha aspetu hotu-hotu“, Vise Prezidente PN ne’e ba jornalista sira hafoin partisipa kongresu nasional Rede Feto Timor-Leste ba dala-5, iha Centro Convenções de Díli (CCD), Kinta (24-10-2019).

Entretantu kongresu nasional Rede Feto Timor-Leste ba dala-5 ne’e ho ninia tema “Feto Nia Asaun Determina Dezenvolvimentu Inkluzivu nia Sustentável”.

Kongresu nasional refere partisipa husi espoza Prezidente Repúblika, Diretora husi organizasaun Feto sira, husi munisípiu 12, inklui Rejiaun Administrativa Espesial Oecusse Ambeno (RAEOA). ety