Francisco David ofisialmente subtitui matebian Gilman Exposto

Meza Parlamentu Nasionál (PN), iha plenária Segunda (02/12), ofisialmente anunsia ona substituisaun matebian deputadu Gilman A.Exposto dos Santos ho deputadu Francisco Xavier David Carlos alias Abono Ramkabian.

Substituisaun ne’e anunsia, antes abertura sesaun diskusaun orsamentu iha faze jeneralidade nian.

Deputadu Francisco ne’ebé substitui matebian Gilman Exposto, sente triste ho substituisaun ne’ebé nia parte hetan, tanba lakon deputadu di’ak ida iha dalan klaran.

“Infelizmente substituisaun ne’e ho falesimentu saudozu Gilman Exposto, tanba primeira dia, ha’u lakohi halo deklarasaun barak, tanba ne’e, ha’u sei halo adaptasaun, maibé ha’u sente abituadu ona, tanba sempre mai akompaña plenária, bainhira ha’u sei hanesan asesor jurídiku, maibé iha teoria ita haree buat oin seluk, iha realidade buat oin seluk, tanba ne’e ha’u sei akompaña de’it debate durante loron tolu iha faze jeneralidade ne’e”, tenik deputadu foun UDT ne’e.

Xavier Carlos akresenta, kona-bá mandatu hanesan Xefe bankada ba UDT/FM, seidauk iha koordenasaun ho parte Frente Mudança, tanba foin anunsia ofisial ba nia mandatu.

Deputadu UDT ne’e mós preokupa, tanba Orsamentu Jerál Estadu ba tinan 2020 ne’ebé ho montante bo’ot demais, billaun USD 1.950

“Orsamentu tinan kotuk ita haree ki’ik-oan, maibé agora bo’ot teb-tebes, maibé relasaun ho OJE ne’e, ha’u seidauk bele adianta buat ruma, tanba agora sei iha jeneralidade, ita seidauk iha final, hodi foti konkluzaun. Kona-bá proposta, ami seidauk iha liña koordenasaun ba malu, embora bankada ida, ami seidauk tu’ur hamutuk, hodi ko’alia relasaun ho proposta ruma, ba OJE ne’ebé mak bo’ot, atu hamenus ka aumenta, ne’e ami seidauk ko’alia ba malu, tanba ha’u foin mai, iha periodu adaptasaun”, tenik Carlos.

Francisco Xavier David Carlos rasik, assume kargu nu’udar Sekretariu Jerál, iha partidu Uniaun Demokrata Timorense (UDT), tanba ne’e hetan nomeasaun hodi subtitui matebian Gilman, tanba nia mak hanesan ema númeru 2 iha partidu, bazeia ba estatutu partidu polítiku nian.say