Deskonfia “Zebra Metan” moras tumor, KO 25 husu Governu transfere urjente ba Malázia

Sekretáriu  Jerál Organizasaun Popular Juventude Loriku Aaswain Timor-Leste (OPJLATIL)  Julião Mausiri “ Zebra Metan”  baixa  iha   Hospital Nasionál Guido Valadares (HNGV) tanba deskobre husi médiku sira deskonfia  hetan moras tumor iha nia kakutak. Tanba ne’e Komité Orientador 25 husu Governu transfere urjente ba Malázia

Dadauk ne’e Zebra Metan baisa hela iha HNGV  iha sala Very Important Persons (VIP).

Manuel Mausiri nu’udar  veteranu Zebra Metan nia maun alin  haktuir,   Zebra moras komesa  iha tinan 2017, bainhira nia hala’o hela servisu nia senti moras, depois  família sira desidi  lori    ba HNGV hodi  konsulta ba nia moras.   Iha  momentu ne’ebá mós  médiku sira hakarak  Computerized Tomography (CT) Scan atu bele deskobre saida mak akontese ba   iha nia ulun fatuk, nune’e  momentu ne’ebá Computerized Tomography Scan a’at hela, entaun presiza  ténki iha intervensaun lalais.

“Momentu  ne’ebá  CT scan a’at tiha, maibé família sira tenta  hakarak buka hatene  Zebra nia moras,  opsaun ikus para bele halo  referal ba  fatin sira seluk  ne’ebé  iha ekipamentu kompletu para bele deskobre lolos moras  iha ulun  ne’e,  maibé  buat sira hotu la akontese.

Mas  iha junta medika deklara katak,  kazu ne’e la presiza halo referal tanba  moras tensaun.

Entaun familia sira lori Zebra alta husi ospitál   hodi fila-fali ba uma.

 “Maibé  iha Kinta  semana kotuk dadersan de’it  Zebra  monu ba rai. Nia hader mai  nia bilan kedas. Mas  momentu nia monu  ne’e nia familia sira hare’e nia  koalia la normal ona.  Entaun familia lori Zebra Metan ba fali sala emerjensia HNGV, depois halo ct scan, mas horseik nia ba baisa tiha iha sala interna, entaun horseik mediku spesialista ba saraf ct scan deskonfia buat ruma ba  iha  tumor otak”,esplika Manuel Mausiri, ba  jornalista sira, liu husi konfrensia imprensa Domingu (10/10/19), iha sala VIP HNGV.

Alende ne’  iha  Domingu (10/11/19)   Prezidente   Komité   Orientador 25  Costancio Pinto “Terus”  ho membru Komite  Orientador 25,  hala’o vizita  ba iha ospitál refere hodi    haree dereitamente Zebra Metan  nia kondisaun hodi fó korajen no motivasaun atu nia bele forsa nafatin.

Relasiona   Zebra Metan nia  moras Prezidente   Komité   Orientador 25  Costancio Pinto “TERUS”  liu husi konfrensia imprensa, husu Oitavu Governu, atu halo evakuasaun urjenti, Veteranu Zebra Metan ba Malaisia hodi hala’o tratamentu ba nia moras, ne’ebé mak nia sofre hela.

“Ita  nia maun alin  Mausiri  ne’ebé hetan duni pankada husi  Indonézia, ne’ebé   iha tempu barak nia hetan sofre  ne’e, ne’ebé  ami hotu nia hare’e veteranus  ténki iha tratamentu espesial  labele  hein de’it halo homenajem, sira presiza iha tratamentu espesefiku ida, liu-liu halo check up regular ba sira, diak liu tan  governu harii klinika espesefiku ba  veteranus,”,dehan Costancio Pinto “TERUS”.

Costancio Pinto, rekomenda mós ba oitavu governu konstituisionál atu tau matan ba Veteranu Zebra nia moras.

“Ami husu ba  governu atu intervein emediatu sé bele halo evakuasaun urjenti ba Malaisia  hodi bele hala’o  tratamentu ho diak”,dehan  Costancio Pinto.

Alende ne’e, José  Manuel Fernandes “Nakfilak” husi OPJELATIL mós konkorda,  governu ténki transfere veteranu Zebra Metan ba halo tratamentu iha Malázia.

“Ita-nia maun Mausiri  kombatente ida mai  husi asaun ida, wainhira  iha situasaun ida,  Estadu Unidu Amerika mai haree situasaun violasaun  direteitu umanu sekuensia mai husi 12 Outobru sira halo manifestasaun iha fulan Janeiru  komesa iha loron 17 to’o 19 iha tinan 1990, mak ikus liu mak nia hetan pankada iha kedas terenu, depois   Indonézia sira kaptura kedas nia hodi halo interogatóriu, imajina komesa iha 1990 to’o agora  atu besik  tinan 30 ona, depois  ita hetan ukun-an  durante tinan 20 nia laran, ema sira la hetan atensaun ruma. Tan ne’e mak ami suporta tomak  deklara Komite Orientador hatete presiza iha atensaun espesial ba veteranu no presiza iha klínika no presiza halo evakuasaun  maun Mausiri ba Malázia”,dehan  dehan José Manuel Fernandes Nakfilak.

Dadauk  ne’e, Veteranu Zebra  Metan, sei kontinua hala’o hela  tratamentu iha HNGV. Veteranu Zebra  Metan dadauk ne’e ho idade  tinan 53.avi